شعور نیوز( ویب ڈیسک):سوشل میڈیا پر گستاخانہ مواد کی تشہیری مہم کی روک تھام کے لئے عوامی آگاہی کیلئےوفاقی حکومت نے امسال بھی پندرہ مارچ کو یوم تحفظ ناموس رسالت ﷺ منانے کا اعلان کر دیا۔

آج 2026 میں انٹرنیٹ سے جڑے میڈیا کا معاملہ تعلیم یا کسی مثبت استعمال کے بجائے تفریح اور شیطانیت کی پست ترین سطح پر جا چکا ہے ۔ سوشل ہونے کی آڑ میں یہ بے راہ روی، شیطانیت، فحاشی ، عریانی سے آگے بڑھ کر یہ مقدسات دین ، اسلام ، خداوند باری تعالیٰ، حضور نبی کریم صلی اللہ علیہ وسلم، اہل بیت اطہار، صحابہ کرام رضوان اللہ علیہم اجمعین، قرآن مجید سمیت ہر قسم کے تقد س کا علانیہ ، فخریہ پامال کرنے کا مرکز بنا ہوا ہے۔

اس وقت پاکستان کی کئی کورٹس میں سیکڑوں مقدمات سوشل میڈیا گستاخی سے متعلق زیر سماعت ہیں۔ یہ سب اُن سنگین ،منصوبہ بندی والی گستاخیاں ہیں جس کے بارے میں دستیاب ناقابل تردید ثبوتوں سے کسی قسم کی کوئی رعایت ، تاویل، غلط فہمی کا امکان بھی نہیں رہتا۔

پاکستان کی اعلیٰ عدلیہ نے کئی مقدمات کی سماعت کے بعد اپنے فیصلے میں اس بات کا اظہار کیاکہ اس معاملے پر کم از کم قومی سطح پر شعور بیدار کیاجائے،تاکہ کوئی یہ بھی نہ کہے کہ اسکو معلوم نہ تھاکہ یہ کام سخت گناہ ہے اور سخت ترین جرم ہے ۔ یوں ہائی کورٹ کے حکم کے بعد وفاقی وزارتِ مذہبی امور نے بھی اعلان کردیا ہے کہ 15 مارچ کا دن یومِ تحفظ ناموسِ رسالت ﷺ کے طور پر منایا جائے گا۔

صورتحال یہ ہے کہ پی ٹی اے اس ضمن میں اب تک کوئی 10 لاکھ اکاؤنٹس پیجز بلاک کر چکا ہے ،مزید کئی لاکھ اب بھی چل رہے ہیں۔اس ضمن میں والدین کو اپنے بچوں کی سوشل میڈیا حرکات پر نظر رکھنے کی خصوصی ہدایات کی گئی ہیں۔

گستاخانہ مواد کی تشہیر کے خلاف پرنٹ،الیکٹرانک،سوشل میڈیا،جمعہ کے اجتماعات اور تعلیمی اداروں میں تقریبات کے ذریعے آگاہی مہم چلائی جائے۔

اس حوالے سے وفاقی وزارت مذہبی امور کی جانب سے تمام صوبوں کے سیکریٹری مذہبی امور و اوقاف، ڈائریکٹر جنرل این سی سی آئی اے،ڈائریکٹر جنرل پیمرا،چیئرمین پی ٹی اے،چیئرمین ایچ ای سی سمیت دیگر متعلقہ اداروں،وفاق المدارس العربیہ پاکستان کے ناظم اعلیٰ مولانا قاری حنیف جالندھری،مفتی منیب الرحمٰن،صدر وفاق المدارس الشیعہ پاکستان علامہ محمد افضل حیدری،صدر وفاق المدارس السلفیہ پاکستان سینیٹر حافظ عبدالکریم،صدر رابطۃ المدارس مولانا عبدالمالک سمیت دیگر مذہبی اداروں کو الگ الگ مراسلے جاری کئے ہیں۔

اس دن کا مقصد یہ ہے کہ بالخصوص عوام میں نبی کریم صلی اللہ علیہ وسلم کی ناموس کا مقام بلند کیا جائے،اس کی تذکیر ہو، اس کےحوالے سے غلط فہمیاں ختم کی جائیں، مغربی پروپیگنڈے کا توڑ ہو، نبی سے تعلق کا پیغام جائے ، سوشل میڈیا کی تباہی کی آگہی بڑھائی جائے۔