شعور نیوز( ویب ڈیسک):سینیٹ میں 27ویں آئینی ترمیم ( تبدیلی) منظور کرلی گئی، 96 میں سے 64 اراکین نے ووٹ دیا جو بالکل 2 تہائی تعداد بنتی ہے۔یہ تعداد پوری کرنے کے لیے ایک تحریک انصاف کے سیف اللہ ابڑو کو اور ایک جمعیت علمائے اسلام کے رکن کا ووٹ نامعلوم طریقے سے لے لیا گیا۔تحریک انصاف کا سربراہ جیل میں اور جمعیت علمائے اسلام کا سربراہ بنگلہ دیش میں کانفرنس سے خطاب کرنے گئے ہوئے ہیں۔

اہم بات یہ ہے کہ یہ دونوں سینیٹر ز اپنی اپنی پارٹی میں پیراشوٹ تھے،مطلب پارٹی ورکروں یا رہنماؤں کو چھوڑ کر اُن کو پراسرا ر جگہ دی گئی تھی۔

ایسےتاریخی موقع پرپاکستان کی وفاقی شرعی کورٹ، رکن اسلامی نظریاتی کونسل،سپریم کورٹ شریعت اپیلیٹ بینچ کے سابق جج مفتی تقی عثمانی نے ملک میں جاری 27 ویں آئینی ترمیم سے متعلق بحث پر اہم تبصرہ کرتے ہوئے سوشل میڈیا پلیٹ فارم ایکس پر اپنے اکاؤنٹ میں لکھا ہے کہ
’ اسلام میں کوئی بھی شخص چاھے وہ کتنے بڑے عہدے پر ھو کسی بھی وقت عدالتی کارروائی سے بالاتر نہیں ھو سکتا خلفاء راشدین کی مثالیں سب کو معلوم ہیں ہمارے دستور میں پہلے بھی صدر کو صدارت کے دوران تحفظ دیاگیاتھا جو اسلام کے خلاف تھا اب تاحیات کسی کو یہ تحفظ دینا شریعت اور آئین کی روح کے بالکل خلاف ہے جو ملک کے لئے نہایت شرمناک ھوگا اللہ تعالیٰ ملک کو اس بے عزتی سے بچائیں آمین پارلیمنٹ کے ارکان سے دردمندانہ درخواست ہے کہ وہ یہ گناہ اپنے سر نہ لیں۔‘

مفتی تقی عثمانی کے ایکس اکاؤنٹ  کا اسکرین شاٹ

مفتی تقی عثمانی نے اس عمل کو گناہ قرار دیتے ہوئے خلفائے راشدین کی مثال بھی دی ہے اور اس کو ملک کی بے عزتی بھی کہا ہے ۔ مفتی تقی عثمانی نے ارکان پارلیمنٹ سے دردمندانہ درخواست کی ہے کہ وہ آئین کی روح کے خلاف کام نہ کریں ۔

پاکستان میں 13 مہینوں میں دوسری مرتبہ اور 1973 کے بعد سے 27 ویں بار آئین میں تبدیلی ہورہی ہے۔59 کے قریب تبدیلیاں میڈیا پر بتائی جا رہی ہیں۔ ان میں جو سب سے حتمی تبدیلی سامنے آئی ہے وہ ’تا حیات جرائم سے تحفظ ‘ کی شق ہے۔

ماہرین و مخلصین پاکستان کہہ رہے ہیں کہ جب پاکستان کے آئین میں لکھا ہوا ہے کہ خلاف قرآن و سنت کوئی آئینی تبدیلی نہیں ہو سکتی ، کوئی قانون بھی نہیں بن سکتا تو خلفائے راشدین کی اتنی بڑی نمایاں واضح مثال کے بعد ایسا کرنا نئی راہیں کھولے گا۔اسی کو سیکولرائزیشن کہتے ہیں۔ ایسا ہر عمل جو دین اسلام کی تعلیمات کو بائے پاس کرکے کیا جائے وہ سیکولرائزیشن ہے اور اگر اسکے پیچھے مادی مفادات ہیں تو یہ عمل لبرل سرمایہ دارانہ نظام کا آئینہ دار کہلائیگا۔
پارلیمنٹ میں موجو دسب سیاسی پارٹیاں پہلے ہی ڈھیر ہو چکی ہیں۔جو پارٹیاں اسمبلی میں ہیں نہیں وہ بغلیں جھانک رہی ہیں۔جن سے جو ڈیل بن سکتی ہے وہ بنا رہے ہیں۔

ترمیم کے جو بھی نکات سامنے آئے ہیں وہ اپنی نہاد میں انتہائی حیرت انگیز نوعیت کے ہیں۔مفادات کی ایسی سطح ناقابل بیان ہے۔پاکستان ابھی تک 26 ویں ترمیم کے اثرات اور آفٹر شاکس سے نہیں نکلا کہ27 ویں کے جھٹکے بھی اس میں شامل ہوگئے۔

کوئی یہ بھی پوچھنے کی جرأت نہیں کر رہا کہ ملک کا صدر یا کوئی اور عہدے دار ایسے جرائم کرے گا ہی کیوں کہ کوئی اُس کے خلاف مقدمہ بنائے؟