شعورنیوز( ویب ڈیسک):کراچی میں ایک معروف بریانی سینٹر کے مالک کو ملائیشیا کے نمبر سے آنے والی ایک دھمکی آمیز وائس میسج اور گھر کے سیکیورٹی گارڈ کا انگریزی میں بھتہ کا خط شہر کی فضا میں نئی ہلچل مچا گیا۔

بریانی والے کو موبائل پر میسج بھیجنے والے نے نہ صرف گولی مارنے کی دھمکی دی بلکہ دکان کے اوقات، روزانہ کی آمدورفت اور کاروبار کی تفصیلات بھی ایسی اعتماد سے بیان کیں جیسے کوئی شخص دن رات اسے دیکھ رہا ہو۔

ایک مجرم جو پولیس کے ہاتھ آیا وہ سیکیورٹی گارڈ کے طور پر جہاں نوکری کر رہا تھا۔اُس نے اپنی ہی مالکن کی لگژری گاڑی پر انگریزی میں بھتہ طلب کرنے کا دھمکی آمیز خط ڈال دیا۔اس نے بتایا کہ خط لکھنے کے لیے اُس نے مصنوعی ذہانت کی مشہور ویب سائٹ ChatGPT کو استعمال کیا۔ وہ انٹر پاس بھی تھا اور کمپیوٹر کی اتنی تعلیم رکھتا تھا کہ یہ سب کر سکے۔دوسری جانب کروڑ روپے کے بھتے مانگنے والے سے جب پولیس نے پوچھا کہ تمہیں معلوم ہے کہ کروڑ لکھنے میں کتنے صفر ہوتے ہیں تو وہ 7 صفر کا سادہ جواب بھی نہ بتا سکا۔

تحقیقات سے انکشاف ہوا کہ یہ نہ کوئی بڑا مافیا تھا، نہ شہر کے پرانے خوفناک گینگ بلکہ کمپیوٹر، اے آئی اور ٹیکنالوجی کا فہم رکھنے والے لوگ تھے جنہیں جلد سے جلد امیر ہوناتھا۔جدید ٹیکنالوجی، انٹرنیٹ ، اے آئی اور بیرونی نمبروں کا سہارا لے کر مشہور گینگز کے نام پر یہ بھتہ جمع کر رہے تھے ۔پولیس نے جرائم میں تجربہ نہ رکھنے کی وجہ سے ملزمان کو گرفتار کر لیا، جن میں ایک خاتون بھی شامل تھی۔ ان کا ایک ساتھی ملائیشیا میں تھا جہاں سے وہ SIM کارڈز کا انتظام کرتا اور کراچی میں موجود ساتھیوں کو بھیجتا، تاکہ ایک نمبر بند ہونے پر فوراً دوسرا استعمال کیا جا سکے۔

✦ سرمایہ دارانہ نظام +جدید ٹیکنالوجی = حرص وہوس = نیا مجرمانہ امتزاج

یہ واقعہ صرف ایک جرم نہیں، ایک نئے ذہنی و معاشرتی رجحان کا آئینہ ہے۔
معروضی حقیقت یہ ہے کہ جدید سرمایہ دارانہ فکر نے ’’پیسہ‘‘ ہی کو زندگی کا واحد مقصد بنا دیا ہے۔
جب دولت کمانے اور تعیشات حاصل کرنے کا جنون انسان پر غالب آ جائے تو:

حلال و حرام کی تمیز مٹ جاتی ہے
اخلاقی اقدار پس منظر میں چلی جاتی ہیں
عزت، محنت اور پورے عمل کی جگہ ’’شارٹ کٹ‘‘ لے لیتا ہے

سرمایہ دارانہ عقلیت جو ذہنیت پروان چڑھاتی ہے وہ جلد سے جلد پیسے کماکر اپنی اندھی اور مستقل پیدا ہوتی خواہشات کی تکمیل چاہتی ہے۔

✦ جرائم اور ٹیکنالوجی — ایک عالمی تصویر

یہ مسئلہ صرف پاکستان کا نہیں، پوری دنیا میں ’’ٹیکنالوجی + سرمایہ جمع کرنے کی محبت ‘‘ نے بت نئے جرائم کو بڑھاوا دیا ہے :

نائیجیریا میں ہزاروں نوجوان کمپیوٹر مہارتیں حاصل کر کے ’’سائبر اسکیمنگ‘‘ کو روزگار بنا چکے ہیں۔مغربی جریدوں نے رپورٹ کیا کہ یہ گروہ سالانہ اربوں ڈالر لوٹتے ہیں—اور سوشل میڈیا پر اپنی تعیش زدہ زندگی کو فخر سے دکھاتے ہیں۔
بھارت میں سینکڑوں کیس سامنے آئے جن میں مجرموں نے کسی کا AI کے ذریعے آواز کا جعلی نمونہ بنا کر رشتے داروں سے پیسے مانگے۔
چین میں سائبر کرائم کی شرح مستقل بڑھ ر ہی ہے جس سے پورا ملک پریشان ہے ۔

امریکی تحقیقاتی ادارے کے مطابق، صرف 2023 میں سائبر فراڈ سے $12 بلین کا نقصان ہوا ۔

یہ تمام مثالیں ایک عالمی رجحان کی نشاندہی کرتی ہیں:
انسان کی طبیعت جب ’’سرمایہ ہی مقصد‘‘ بنا لے اور جدید ٹیکنالوجی ہاتھ میں آ جائے، تو جرم نہ صرف آسان ہوتا ہے بلکہ ’’پیشہ‘‘ بھی بن جاتا ہے۔

✦ نئی نسل: تعلیم یافتہ لیکن اخلاقیات سے خالی کیوں؟

یہ سوال پاکستان سمیت دنیا بھر کے لیے لمحۂ فکریہ ہے۔

کمپیوٹر جاننے والے
روزگار رکھنے والے لوگ بظاہر رزق حلال کما رہے تھے ، مگر نیت یہ تھی کہ بغیر محنت، بغیر پسینہ بہائے، راتوں رات دولت کیسے حاصل کی جائے۔
یہی وہ ذہنی رویّہ ہے جسے سرمایہ دارانہ کلچر مسلسل پروان چڑھا رہا ہے:

’’بس پیسہ… چاہے جیسے ملے۔‘‘

معاشرتی ترقی، ٹیکنالوجی اور علم کا فائدہ تب ہی ہے جب اخلاقی بنیاد مضبوط ہو۔
ورنہ علم ’’جرائم‘‘ میں بدل جاتا ہے، ٹیکنالوجی ’’آلۂ جرم‘‘ بن جاتی ہے اور تعلیم یافتہ لوگ بھی ’’مجرم‘‘۔

یہ محض پولیس کا مسئلہ نہیں—بلکہ معاشرتی، فکری اور اخلاقی بحران ہے۔