شعور نیوز( انٹرنیشنل ڈیسک): آسٹریلیا کی مشہور سڈنی یونیورسٹی میں ہونے والی کام چھوڑ ہڑتال اور 2000 ملازمین اساتذہ و طلبہ کی احتجاجی واک نے عالمی الرٹ جاری کر دیا ہے۔یہ ہڑتال صرف مقامی انتظامی تنازع یا تنخواہوں کا مسئلہ نہیں ، بلکہ تدریسی و انتظامی و دیگر امور میں مصنوعی ذہانت کے استعمال سے نوکریوں کو خطرہ پر بھی ہے۔یہ دنیا بھر کے محنت کشوں اور بالخصوص فکر و دانش سے وابستہ طبقے کے لیے ایک سنگین خطرے کی گھنٹی بھی ہے۔ سڈنی یونیورسٹی کا مرکزی کیمپس تقریباً 178 ایکڑ پر پھیلا ہوا ایک پورا شہر ہے۔ اس کیمپس میں روزانہ 50,000 سے زائد طلبہ اور ہزاروں ملازمین کی آمدورفت ہوتی ہے۔

سڈنی یونیورسٹی آسٹریلیا میں طلبہ اور اساتذہ کی تحریکوں اور ہڑتالوں کا سب سے بڑا مرکز سمجھی جاتی ہے۔ جب 24 گھنٹے کی رسمی ہڑتال کی کال دی جاتی ہے تو تمام فیکلٹیز کے اساتذہ اپنی کلاسز کا بائیکاٹ کر کے باہر نکل آتے ہیں۔سڈنی یونیورسٹی میں 2,000 سے زائد اساتذہ اور عملے کا سڑکوں پر آنا اس حقیقت کا اعلان ہے کہ مصنوعی ذہانت کا پھیلتا استعمال انسان کی سہولت کے لیے نہیں، بلکہ اس کی روزی روٹی چھیننے اور استحصال کے لیے کیا جا رہا ہے۔مغرب نے اپنی یونیورسٹیوں کو تعلیم، تحقیق، تنقیدی سوچ کا مرکز قرار دیا جبکہ اپنی اصل میں وہ صرف منافع کمانے کا اڈہ ہی تھی کیونکہ اُس کو نظام کے لیے افراد ہی تیار کرنے تھے ۔ AI کے چیٹ بوٹس کو آن لائن کلاسز میں استاد کے متبادل کے طور پر پیش کرنے سے جو جدت نظام میں آئی ہے اس نے ہزاروں اساتذہ و دیگر ملازمین کو بھی احتجاج پر مجبور کر دیا ہے۔ یونیورسٹیوں میں "صرف پڑھانے والے" (Teaching-Only) ایسے عہدے متعارف کرائے جا رہے ہیں جن میں نہ تحقیق کا موقع ہے نہ مستقبل کی ترقی کا، تاکہ بعد میں انہیں AI سے آسانی سے بدلا جا سکے۔ AI کو تدریس میں شامل کرنے کی آڑ میں اساتذہ کی جاب سیکیورٹی کو ختم کیا جا رہا ہے۔ہڑتال میں شامل اساتذہ نے درست اشارہ کیا: "ٹیکنالوجی کو ہماری خدمت کرنی چاہیے، نہ کہ ہمیں ٹیکنالوجی کا غلام بننا چاہیے!" لیکن موجودہ اندازِ فکر یہ ہے کہ انسانی روزگار کو ختم کر کے AI چیٹ بوٹس اور آٹومیشن کے ذریعے زیادہ سے زیادہ منافع کمایا جائے۔اگر دنیا کے اعلیٰ ترین تعلیمی اداروں میں انسانوں کو AI کے ذریعے بے دخل کیا جا سکتا ہے، تو کل دیگر شعبہ ہائے زندگی سے تعلق رکھنے والے محنت کش بھی اس کی زد میں ہوں گے۔

اگر ہم نے ٹیکنالوجی کے اخلاقی استعمال اور انسانی وجود کو لاحق خطرات کے لیے آواز نہ اٹھائی، تو کل کو مصنوعی ذہانت بہت کچھ لے جائیگی ۔