شعور نیوز( ویب ڈیسک): پاکستان میں سرمایہ دارانہ نظام کی اہم علامت بحریہ ٹاؤن کے ہیڈ آفس پر ایف آئی اے کا چھاپہ مارا گیا ہے۔ایف آئی اے کے اینٹی منی لانڈرنگ سیل نے کراچی کے ہیڈ آفس میں ایک منظم چھاپہ مار کارروائی میں متعلقہ اہم اور حساس ریکارڈ تحویل میں لے لیا۔

ادارہ تحقیقات کے مطابق پاکستان میں ملک ریاض حسین کے خلاف اور کراچی میں زمینوں پر ناجائز قبضوں میں ملوث سندھ کے طاقتور سسٹم سے وابستہ بااثر افراد کے خلاف تعطل کا شکار کارروائی پوری شدت کے ساتھ بحال کر دی گئی ہیں۔ اس سلسلے میں یہ پہلا چھاپہ مارا گیا ہے جس میں بحریہ ٹاؤن کراچی کا مکمل لے آؤٹ پلان، زمینوں کی الاٹمنٹ، ٹرانسفرز اور دیگر کلیدی دستاویزات ایف آئی اے کی تحویل میں لے لی گئیں، جنہیں آئندہ قانونی کارروائی کے لیے فیصلہ کن شواہد قرار دیا جا رہا ہے۔

اس ہائی پروفائل کارروائی کے لیے ایف آئی اے کراچی کے تمام سرکلز سے افسران اور اہلکاروں کو طلب کیا گیا تھا، جن میں خواتین افسران و اہلکار بھی شامل تھیں۔ کارروائی کے دوران دفتر میں موجود کسی بھی شخص کو باہر جانے کی اجازت نہیں دی گئی، تاہم تاحال کسی گرفتاری کی تصدیق نہیں کی گئی۔

ذرائع کا کہنا ہے کہ یہ چھاپہ تقریباً 6 سے 8 گھنٹے تک جاری رہا، جس دوران ایف آئی اے کی ٹیم نے نوٹسز کے ذریعے طلب کیے گئے تمام ریکارڈ کو باقاعدہ قبضے میں لیا۔ یہ ریکارڈ گزشتہ برس شروع ہونے والی انکوائریوں کا حصہ تھا، جس میں بحریہ ٹاؤن کی انتظامیہ کی جانب سے مبینہ طور پر عدم تعاون سامنے آیا تھا۔

ملک ریاض حسین کے خلاف ایف آئی اے میں گزشتہ سال متعدد انکوائریوں کا آغاز کیا گیا تھا، جن میں منی لانڈرنگ، زمینوں پر غیرقانونی قبضوں اور سرکاری و نجی اداروں سے روابط کے الزامات شامل ہیں۔ ایف آئی اے حکام کے مطابق ضبط شدہ ریکارڈ کی باریک بینی سے جانچ کے بعد مزید چھاپوں، طلبیوں اور ممکنہ قانونی کارروائی کا دائرہ وسیع کیے جانے کا امکان ہے۔ نیب میں بحریہ ٹاؤن کے خلاف 14 مقدمات قائم ہیں ،باقی ادارے الگ ہیں۔

ذرائع کا کہنا ہے کہ اس کارروائی کے بعد سندھ کے اہم سسٹم سے منسلک کئی بااثر نام ایک بار پھر تحقیقاتی دائرے میں آ سکتے ہیں، جبکہ کیس میں آنے والے دنوں میں مزید چونکا دینے والی پیش رفت متوقع ہے۔
اگست 2025 میں نیب نے 190 ملین پاؤنڈ کیس میں بحریہ ٹاؤن کے 2کارپوریٹ دفاتر سمیت اربوں روپے مالیت کی چھ جائیدادوں کی نیلامی کرنی تھی جس میں سے ایک روبیش مارکی 50 کروڑ 80 لاکھ روپے میں نیلام کی گئی، بقیہ کے لیے مطلوبہ بولی نہیں آئی تھی۔اُنہی دنوں وفاقی وزیر اطلاعات کہہ چکے تھے کہ ایف آئی اے نے بحریہ ٹاؤن کرپشن کیس میں ایک ارب 12 کروڑ روپے کی منی لانڈرنگ کے حوالے سے کئی شواہد حاصل کرلیے ہیں۔
3 ماہ قبل عدالتی احکامات پر جامشورو میں بحریہ ٹاؤن کی غیر قانونی تعمیرات مسمار کردی گئی تھیں۔جامشورو کے دیہہ مول میں 893 ایکڑ اراضی پر بحریہ ٹاؤن کا قبضہ غیرقانونی قرار دیا گیا تھا۔
5 دن قبل ڈائریکٹر جنرل راولپنڈی ڈویلپمنٹ اتھارٹی نے بحریہ ٹاؤن پنڈی میں صارف سے رقم لے کر زمین نہ دینے پر بحریہ ٹاؤن کے ملوث ملازمین کے خلاف ایف آئی آر کے اندراج کی ہدایات جاری کر ی تھیں۔

اب یہ وہی بحریہ ٹاؤن ہے جس کے لیے آج بھی پاکستان میڈیا اپنی مرضی سے کوئی منفی خبر کسی طور نہیں چلاتا۔سرمایہ کا اندھا جامع لادینی نیٹ ورک چلانے ، پاکستانی معاشرت میں لادین سرمایہ دارانہ اقدار کو فروغ دینے والا سب سے نمایاں کردار ملک ریاض حسین کا رہا ہے ، جس کے اثرات کو اب اُس سے بڑا طاقتور کچلنے پر آگیا ہے۔