شعورنیوز( ویب ڈیسک):دسمبر 2025 میں بنگلہ دیش کے طالب علم رہنما شریف عثمان ہادی پر حملے اور بعد ازاں شہادت کے بعد بنگلہ دیش میں نیا سیاسی عدمِ استحکام پیدا ہوا ہے۔اِس دوران بنگلہ دیش کی سابق وزیر اعظم اور بنگلہ دیش نیشنل پارٹی کی رہنما خالدہ ضیا کا بھی انتقال ہوگیا۔اُن کی جگہ لینے برطانیہ سے اُن کا بیٹا طارق رحمان بنگلہ دیش پہنچ گیا ہے۔بین الاقوامی سطح پر اہم خبر یہ آئی کہ 2024 کی طلبہ تحریک کے بعد ابھرنے والی نیشنل سٹیزن پارٹی (NCP) نے جماعتِ اسلامی کے ساتھ انتخابی اتحادکی سمت قدم بڑھایا ہے۔ بی بی سی جیسے متعصب میڈیا نے اس پر طلبہ میں اندرونی اختلافات رپورٹ کیے ہیں۔اس اتحاد کے بعد جماعت اسلامی کی قیادت نے بی این پی کے ساتھ ’وسیع تر تعاون/یونٹی گورنمنٹ‘ جیسے آپشنز پر بھی بات کی ہے۔

بنگلہ دیش میں بھارت کی مداخلت پہلے روز سے ہی بہت گہری رہی ہےبنگلہ دیش میں جو سیاسی فضا بنی ہے اُس میں مذہبی جماعتوں کو کھل کر سامنے آنے کا موقع ملا ہے جس میں سب سے بڑا موقع ’جماعت اسلامی بنگلہ دیش‘ کو ملا ہے۔بنگلہ دیش میں عوامی لیگ اور بی این پی کے بعد جماعت اسلامی تیسری سیاسی قوت جانی جاتی تھی ۔ حسینہ واجد نے جماعت اسلامی پر پابندی لگائی جو نگراں حکومت نے ختم کی ۔اب عوامی لیگ پر پابندی کا دور شروع ہوا ہے۔ اس صورتحال میں بھارت کا معاملہ انتہائی سنگین حد تک سامنے آیا ہے۔

سب سے پہلے عثمان ہادی کیس میں ڈھاکہ میٹروپولیٹن پولیس کے مطابق دو مرکزی ملزمان (فیصل کریم مسعود اور عالمگیر شیخ) ہالواگھاٹ بارڈر کے راستے بھارت (میگھالیہ) کی طرف نکلے، اور اس میں مقامی مدد کا ذکر بھی آیا۔اب سوشل میڈیا پر گردش کرنے والی ویڈیو میں ایک ملزم فیصل نے:

قتل سے انکار کیا۔
’بھارت فرار‘ ہونے کی تردید کی اور دبئی میں موجودگی ظاہر کی۔
اس کے ساتھ ہی اُس نے قتل کی ذمہ داری جماعت اسلامی پر ڈال دی۔
یہ بات بھی رپورٹ ہوئی ہے کہ ویڈیو/دعویٰ کی آزادانہ تصدیق سامنے نہیں آئی، اور متعلقہ سرکاری اداروں کی باضابطہ توثیق واضح نہیں۔
دوسری طرف پولیس فیصل کے گھر سے آلہ قتل بھی برآمد کر چکی ہے ۔ اس کے 2 ساتھی سنجے و سیبون کو سرحد کے قریب سے گرفتار کیا جا چکا ہے جنہوں نے گولی مارنے کا اصل الزام مفرور فیصل پر ڈال دیا ہے۔اُن دونوں کو کورٹ جیل بھیج چکی ہے اور فیصل کی تلاش جاری ہے۔

اس پوری صورتحال میں بھارتی میڈیا نے خاص انداز سے شور مچانا شروع کردیا ہے کہ بنگلہ دیش میں انتخابی مقابلہ اب ’اسلامسٹ جھکاؤ رکھنے والے اتحادوں‘ کے درمیان بنتا جا رہا ہے۔اس معاملے پر چونکہ تمام لبرل ایک ہی پوزیشن پر آجاتے ہیں اس لیے بی بی سی ، پاکستان میں روزنامہ جنگ و دیگر بھی یہی ’اینٹی اسلام‘ لائن چلا رہے ہیں ۔بھارت میں بنگلہ دیش کو لیکر مسلمانوں کے خلاف بھی ایک نئی لہر شروع ہو چکی ہے ۔