شعور نیوز( انٹرنیشنل ڈیسک): مسلمان خاتون کا حجاب کھینچنے کے معاملے کو لیکر بہار کے وزیر اعلیٰ نتیش کمار کے خلاف تھانوں میں مقدمات کی درخواستیں جمع ہونا شروع ہوگئی ہیں۔بھارت میں 2022 کے بعد دوبارہ مسلم خواتین کا حجاب معاملہ نمایاں اہمیت اختیار کرگیا ہے۔اس دوران مقامی سطح پر مستقل چھوٹے واقعات ہوتے رہے ہیں مگر قومی و عالمی سطح پر یہ دوسرا بڑا واقعہ ابھرا ہے۔

بھارت کے مقبول اردو شاعر منور رانا کی صاحبزادی سمیہ رانا جو سماج وادی پارٹی کی لیڈر بھی ہیں ۔ انہوں نے بدھ کو بہار کے وزیر اعلی نتیش کمار اور اتر پردیش کے کابینہ وزیر سنجے نشاد کے خلاف حجاب کے تنازع پر ایف آئی آر درج کرنے کی درخواست جمع کرادی ہے۔

اسکے علاوہ بنگلورومیں مقیم ایک وکیل نے ڈائریکٹر جنرل اور انسپکٹر جنرل آف پولیس ایم اے سلیم کے ساتھ بہار کے وزیر اعلی نتیش کمار کے خلاف زیرو ایف آئی آر درج کرنے کی درخواست جمع کرادی ہے۔وزیر اعلیٰ کے خلاف شکایت ’غیررضا مندی والے جنسی حملے و جسمانی مداخلت، عورت کی شرم گاہ کو مجروح کرنے، عوامی سطح پر تذلیل اور مذہبی وقار کی خلاف ورزی‘ پر درج کرانے کی درخواست کی گئی ، جسے قبول کرلیاگیا۔

وزیر اعلیٰ و اُس کے ساتھی وزرا، حامیو ، وزیروں نے اس طرح کے رد عمل پر حیرانگی کا اظہار کرتے ہوئے یہ بیانات دیئے ،

’حجاب کھینچنے پر اتنا مسئلہ کیوں؟‘۔

’اگر کوئی اپوائنٹمنٹ لیٹر لینے آیا ہے تو وہ اپنا چہرہ دکھانے سے کیوں ڈرے؟ کیا آپ کو ووٹ ڈالنے کے لیے اپنا چہرہ نہیں دکھانا پڑتا؟

وزیر اعلیٰ نتیش کمار کی کابینہ میں واحد وزیر برائے اقلیت ایک مسلمان ’محمد زما خان ‘ہیں ، انہوں نے کہا ہےکہ

’وزیر اعلیٰ نے صرف ایک مسلمان بیٹی سے محبت کا اظہار کیا۔وہ چاہتا تھے کہ زندگی میں کامیاب ہونے والی لڑکی کاچہرہ بھی لوگ دیکھ سکیں۔وزیر اعلیٰ نے ہمیشہ ملک کی بیٹیوں کا سب سے زیادہ احترام کیا ہے۔‘

مجموعی طور پر اس طرح کے بیانات سے رد عمل میں مزید اضافہ ہوا ہے۔

نتیش کمار صوبہ بہار کا سب سے طویل عرصے سے وزیر اعلیٰ ہے ، وہ اس وقت اپنی 10ویں میعاد کے لیے اس عہدے پر فائز ہے۔ وہ جنتا دل (متحدہ) کا قومی صدر بھی ہے۔عملاً نتیش کمار ہندوتوا نظریے کا سیاست دان نہیں ہے ، وہ سوشلسٹ فکر سے تعلق رکھتا ہے۔ بھارتی صوبہ بہار میں مسلمانوں کی تعداد 18 فیصد ہے جو کسی طور نظر

انداز نہیں کی جا سکتی۔

عورت کی آزادی و حقوق کے تمام جعلی نام نہاد دعویدار سیکولر ، فیمنسٹ ، لبرل طبقات اس معاملے پر منہ چھپاکر بھاگے ہوئے ہیں کیونکہ اصل مسئلہ یہ ہے کہ حجاب مکمل مذہبی حکم ہے ۔ مذہب اُن کو آزادی سے بھی قبول نہیں۔ اس کے باوجود مجموعی طور پر جو دکھاوے کا رد عمل ہے اُس میں ’عورت کی آزادی‘کو لیکر مسلمان ہی احتجاج کرتے دکھائی دے رہے ہیں ،وہ بھی مذہبی و خدائی حکم کی برتری و افضلیت کو موضوع نہیں بنا رہے۔