شعور نیوز( ویب ڈیسک): پاکستان سے ہر سال صرف امتحان لینے کے نام پر 50 ارب روپے برطانیہ منتقل کرلیتا ہے اور لوگ بھی خوشی خوشی دیتے ہیں۔استعمار ی قوتوں کا نئے علاقوں پر قبضے و لوٹ مار کا طریقہ 300سال پہلے بھی منفرد تھا اور آج بھی ایسا ہی ہے۔

برٹش کونسل کے مطابق اس سال پاکستان سے ایک لاکھ طلبہ او لیول امتحانات میں شریک ہوں گے، جبکہ آٹھ مضامین کی فیس 2 لاکھ 11 ہزار روپے مقرر ہے۔

اس بنیاد پر صرف ایک او لیول سیشن میں کیمبرج بورڈ پاکستان سے 21 ارب روپے وصول کرے گا۔

جبکہ فیڈرل گورنمنٹ کا پورے سال کا ہائر ایجوکیشن کا بجٹ 6 ارب روپے ہے۔

صرف ایک o لیول کے امتحان میں ہماری ایلیٹ کلاس 21 ارب خرچ کر دیتی ہے جبکہ قائد اعظم یونیورسٹی کا یہ 7سال کا بجٹ ہے ۔

نظریاتی تعلیم کے دستیاب ماہرین کے مطابق یہ صرف رقم کا مسئلہ نہیں — بلکہ ایک پوری نسل کی نفسیاتی تشکیل، ذہنی محکومی اور مغربی نظامِ تعلیم کے ذریعے فکری قبضہ سب سے بڑا خطرہ بن چکا ہے۔

چاہے مضامین میں اردو اسلامیات بھی پڑھائی جائے ،مگر مغربی نظام سے گزر کر او لیول کا نظریاتی نقصان اُس وقت بڑھ جاتا ہے جب اسے ’بہتر تعلیم‘ سمجھ کر اپنایا جاتا ہے ۔اس کے اندر موجود پورا فکری و تہذیبی نظام نظر انداز کر دیا جاتا ہے ۔ مسئلہ صرف فیس، پیسہ یا بورڈ کی کمائی نہیں ہوتا بلکہ ذہنی و تہذیبی شناخت کے ساتھ او لیول کا نصاب اور اس کی فریم ورکنگ مکمل طور پر سیکولر مغربی فکر پر مبنی ہے۔
اس میں:

اخلاقیات کا تصور مذہب سے کٹا ملے گا۔
انسانی زندگی کا معیار "سائنس، مارکیٹ اور انفرادی آزادی" مانا جاتا ہے۔
مذہب کو پرائیویٹ معاملہ بنا کر پسِ پشت رکھ دیا جاتا ہے۔

ایک ایسا نوجوان جو او لیول سے فارغ ہوتا ہے، وہ مسلم فکری ورلڈ ویو کے مقابلے میں مغربی ورلڈ ویو کو زیادہ ’معیاری‘جاننے لگتا ہے۔

پاکستان سے کیمبرج کی سالانہ کمائی 50 ارب روپے تک

اعداد و شمار کے مطابق:

او لیول، اے لیول، آئی جی سی ایس ای اور جی سی ایس ای کو شامل کیا جائے تو کیمبرج یونیورسٹی ایک سیشن میں تقریباً 30 ارب روپے لیتی ہے۔
چونکہ امتحانات سال میں دو بار ہوتے ہیں، بدین وجہ ہر سال پاکستان سے تقریباً 50 ارب روپے برطانیہ منتقل ہو جاتے ہیں۔
یہ رقم وفاقی حکومت کے پورے سالانہ بجٹ برائے اعلیٰ تعلیم (6 ارب روپے) سے کئی گنا زیادہ ہے۔
یہ رقم قائداعظم یونیورسٹی کے سات سال کے بجٹ کے برابر ہے۔

مزید یہ کہ امریکی، ترک اور دیگر غیر ملکی تعلیمی ادارے الگ سے کماتے ہیں، یوں پاکستان سے ہر سال اربوں روپے کا تعلیمی سرمایہ بیرون ملک منتقل ہوتا ہے۔

بین الاقوامی تعلیمی ادارے ہمارے نظام کی کمزوریوں سے فائدہ اٹھا کر ہمارے مال کو ایسے لوٹ رہے ہیں کہ ہم خوشی خوشی دے رہے ہیں۔ ایسٹ انڈیا کمپنی بھی تاجر بن کر آئی تھی اور جو کچھ اس نے تجارت کے نام پر کیا وہ پورے برصغیر کااستحصال اور برطانیہ کےخزانوں میں اضافے کے سوا کچھ نہیں تھا۔

یہی نہیں بلکہ امتحان کے بعد وہ ہمارے ذہین بچوں کو بھی باہر کھینچ لیتے ہیں ۔ اس نظام تعلیم سے سب دنیاپرست اور پیسے کے غلام ہی پیدا ہوتے ہیں ، پیسہ سارا وہ لے جاتے ہیں ہیں اس لیے پاکستان سمیت تیسری دنیا کے ممالک ہمیشہ وہیں رہتے ہیں۔

جب یہ بات اصولی طور پر سب کے نزدیک طے ہےکہ تعلیم کا تعلق اُس قوم کے نظریات، افکار ، تہذیب، تمدن سے ہوتاہے تو مغربی تعلیم لینے والا مسلم معاشرت میں کیسے فٹ بیٹھ سکتا ہے؟

یہی وجہ ہے کہ آپ پورے ملک میں مذہبی قیادت کو ، مذہبی جماعتوں کو دیکھیں تو وہ بھی اس باطل نظام تعلیم سے ہی مرعوب اور دبی ہوئی نظر آتی ہیں۔آج 76 سال میں مسلمانوں کے اتنے بڑے ملک میں کوئی مسلم معاشرت پر قابل فخر نظام تعلیم ، کورس، نظام امتحانات وضع نہیں کرسکا۔