شعور نیوز( ویب ڈیسک):وزارتِ خزانہ کی دستاویزات کے مطابق جولائی تا ستمبر 2025 (رواں مالی سال کی پہلی سہ ماہی) میں وفاقی حکومت کے امور چلانےکے اخراجات142 ارب 47 کروڑ 60 لاکھ سے بڑھ کر 161 ارب 17 کروڑ 70 لاکھ روپے ہو گئے، یعنی 13.13٪ اضافہ ہو اہے ۔

’ترقی‘ کی خوفناک سرمایہ دارانہ قدر کو لیکر سود پر کھڑی پاکستان کی معیشت میں کم خرچ خواب میں بھی ممکن نہیں رہ گیا کیونکہ لوگ خواب میں بھی جلد امیر بن کر پر تعیش زندگی ہی چاہ رہے ہیں۔

حکمرانوں کی زبان پر کفایت شعاری ، سادگی اور اخراجات میں کمی کے خیالی نعرے ہیں، مگر سرکاری دستاویزات خود بتا رہی ہیں کہ ریاستی مشینری کو چلانے کی قیمت ہر سال بڑھی ہے، کم نہیں ہوئی۔

فروری 2023 میں اُس وقت کے وزیراعظم شہباز شریف نے اعلان کیا تھا کہ
وفاقی وزارتیں اور دفاتر اپنے اخراجات میں 15٪ کمی کریں گے،
وزراء و مشیروں کو ہدایت دی گئی کہ:
- تنخواہیں اور مراعات نہ لیں،
- لگژری گاڑیاں، بزنس کلاس سفر اور غیر ضروری بیرونی دورے ترک کیے جائیں،
- فوج نے بھی ’’نان کومبیٹ‘‘ اخراجات میں کٹ کی یقین دہانی کروائی۔حکومت نے اُس وقت دعویٰ کیا تھا کہ اس سے سالانہ تقریباً 200 ارب روپے کی بچت ہوگی۔
ستمبر 2024 میں وزارتِ خزانہ نے سرکلر جاری کیا جس میں:
ہر قسم کی نئی سرکاری گاڑیوں کی خریداری پر پابندی (سوائے ایمبولینس، فائر بریگیڈ وغیرہ کے)،
غیر ضروری غیر ملکی دوروں، سیمیناروں، ورکشاپس اور پروٹوکول اخراجات پر کٹ،
فرنیچر، تزئین و آرائش، سرکاری تقریبات وغیرہ میں سخت کمی کی ہدایات شامل تھیں۔

کاغذوں میں کفایت شعاری کے احکامات نظر آئیں گے ، مگر حکومتی امور چلانے کی اصل لاگت میں کمی کہیں نظر نہیں آتی ۔

سکے کا دوسرا رُخ:80 کھرب کے قرض کا پہاڑ

جون 2025 کے اختتام پر پاکستان کا کل سرکاری عوامی قرض (Total Public Debt) تقریباً 80.5 کھرب (ٹریلین) روپے ریکارڈ ہوا،
جو جون 2024 کے 71.2 کھرب روپے کے مقابلے میں تقریباً 9.3 کھرب روپے زیادہ ہے۔

80 کھرب روپے سے زائد قرض کے ساتھ سرمایہ دارانہ نظم میں “خرچ کم” ہونا ممکن ہی نہیں ہوتا۔

2024-25 کے وفاقی بجٹ پر کیے گئے ایک تجزیاتی نوٹ کے مطابق: بجٹ کے مجموعی اخراجات میں تقریباً 9.7 کھرب روپے صرفسود (interest payments) کی مد میں رکھے گئے تھے — یعنی قرآں مجید کے مطابق تشریح کی جائے تو پاکستان کے حکمرانوں نے اس بار بھی قوم سے جمع شدہ پیسوں یعنی قومی خزانے کے بجٹ کا سب سے بڑا حصہ اللہ و اس کے رسول سے جنگ کے لیے خرچ کیا گیا۔

مسئلے کی نظاماتی جڑ:

معاشی ماہرین کے نزدیک موجودہ صورتِ حال سرمایہ دارانہ مالیاتی نظم (capitalist fiscal order) کی بنیادی ساختی (structural) خصوصیت ہے۔جس میں:

بجٹ خسارہ مستقل رہتا ہے ۔
- ٹیکس نظام، درآمداتی انحصار اور اشرافیائی مراعات کی وجہ سےریاست مسلسل خسارے میں رہتی ہے،جسے پورا کرنے کے لیے ہر سال نیا قرض لیا جاتا ہے۔
سود کو اوّلین ترجیح
- مقامی و بین الاقوامی قرض دہندگان کو ہر صورت میں سود اور اصل زر کی بروقت ادائیگی یقینی بنائی جاتی ہے۔
- بجٹ میں Debt Servicing کو ’بغیر سوال کیے‘ سب سے اوپر رکھا جاتا ہے، اور کفایت شعاری زیادہ سے زیادہ
  چھوٹے انتظامی اخراجات تک محدود رہتی ہے۔
ریاستی مشینری کا پھیلاؤ
- دفاع، سکیورٹی، بیوروکریسی اور ریگولیٹری اداروں کی ساخت ایسی رکھی جاتی ہے کہ انہیں کم کرنا سیاسی طور پر تقریباً ناممکن ہوتا ہے۔
- اوپر سے مہنگائی اور تنخواہوں میں اضافہ مزید بوجھ ڈال دیتا ہے۔
- پاکستان 2001 سے مستقل حالت جنگ میں ہی ہے۔ جیسے ہی امن آتا ہے کچھ عرصے میں کہیں نہ کہیں سے کچھ شروع ہوجاتا ہے اور یوں اخراجات کا لایعنی سلسلہ شروع ہوجاتا ہے۔
  ایسے نظام میں اخراجات واقعی کم کرنے کا مطلب بنیادی ساخت کو چیلنج کرنا ہوتا ہے جو سرمایہ دارانہ نظم کے اندر رہتے ہوئے عملاً کبھی نہیں کیا جاتا۔
  لہٰذا اخراجات میں کمی کے دعوے زیادہ تر سیاسی نعرے رہتے ہیں، جبکہ بجٹ کے بڑے اعداد و شمار ہر سال یہ ثابت کرتے ہیں کہ
  ’سرمایہ دارانہ مالیاتی نظم میں ریاستی اخراجات کم ہونے کے بجائے قرض اور سود کے ساتھ مستقل بڑھتے ہی رہتے ہیں۔‘