شعور نیوز( ویب ڈیسک):پاکستان میں گذشتہ 3سال کے دوران 79نئی غیرملکی کمپنیوں کی آمد ہوئی ۔ ان ممالک میں چین، آسٹریا، سوئٹزرلینڈ، اٹلی،کینیڈا، امریکہ، جرمنی، اسپین، سعودی عرب، ملیشیا، عمان سے رجسٹرڈ کمپنیاں شامل ہیں۔سیکورٹیز اینڈ ایکس چینج کمیشن آف پاکستان کے مطابق اس عرصے کے دوران نجی شعبے میں غیرملکی کمپنیوں کی جانب سے 40.7ارب روپے کی سرمایہ کاری کی گئی۔ایس ای سی پی کے مطابق 61 غیر ملکی کمپنیوں نے شئیر کی ٹرانزیکشز کیں جبکہ 29 غیر ملکی کمپنیوں نے اپنے شئیرز دیگر غیر ملکی کمپنیوں کو منتقل کیے۔ملٹی نیشنل کمپنیاں مقامی وسائل استعمال کر کے منافع بیرون ملک منتقل کرتی ہیں یعنی مقامی دولت باہر جاتی ہے۔یہی نہیں بلکہ پاکستان جیسے ممالک سرمایہ و ٹیکنالوجی کے لیے صرف امیر ممالک پر انحصار کرتے ہیں اور ان کی اپنی پالیسی بلکہ ملکی خودمختاری کم ہوتی چلی جاتی ہے اور وہ مستقل اپنا دائرہ بڑھاتے چلے جاتے ہیں۔بڑی کمپنیوں کا ریاستی پالیسی سازی پر لازمی اثر پڑتا ہے ۔ یہ سب اپنی حکومتوں سے جہاں سے وہ رجسٹرڈ ہوتے ہیں وہاں سے ’آشیرواد‘لے کر آتے ہیں ۔ ان میں کوئی نیوٹرل نہیں ہوتا۔ اس کا دوسرا نتیجہ یہ ہوتا ہے کہ مقامی صنعت ملٹی نیشنل کمپنیوں کے مقابلے میں کمزور پڑ تی ہے۔اس طرح کے معاشی تصور کو جگہ دینے کو Neo-colonialism کہا جاتا ہے۔

میڈیا پر جو کمپنی کی تفصیلات آئی ہیں ان میں سوئٹزرلینڈ کے گنوور گروپ نے ٹوٹل انرجیز پاکستان میں شئیر حاصل کیے جبکہ اٹلی کی یوریکم نے فاطمہ یوریکم رائس ملز میں 50فیصد شئیر کی خریداری کی۔

سعودی عرب کی وافی انرجی نے شیل پاکستان کے آپریشنز کی خریداری کی جبکہ امریکا کی کمپنی فائزر نے فاسیٹیکل پلانٹ لکی کور انڈسٹریز کو فروخت کیا۔ ایس ای سی پی کے مطابق دبئی کی ڈی پی ورلڈ اور این ایل سی کے درمیان لاجسٹکس سیکٹر میں جوائنٹ وینچر کیا گیا۔

ہالینڈ کی برکلے اسکوائر ہولڈنگ نے مائنڈ شیئر پاکستان میں 50فیصد شیئر ہولڈنگ حاصل کی۔ ایس ای سی پی کے مطابق متعدد مزید غیرملکی شراکت داری کے معاہدے پائپ لائن میں ہیں جبکہ پاکستان میں فعال غیرملکی کمپنیوں کی تعداد 1,157 ہے۔

سب سے اہم بات یہ ہوتی ہے کہ ان سارے غیر ملکی ممالک کے ساتھ جس قسم کے معاہدے،جن شرائط پر ان کو ملک میں داخل ہونے کی اجازت دی جاتی ہے وہ عوام کے سامنے کبھی لائے نہیں جاتے۔سرمایہ اس پورے معاملے میں کلیدی مقام رکھتا ہے کیونکہ اس کے ذریعہ سرمایہ دارانہ نظام کو ہی تقویت دی جاتی ہے۔ اس کے بہانے استعماراپنا شکنجہ مزید گہرا کرتا ہے ۔اس تنقید کو جب لوگ ہضم نہیں کرپاتے تو کہتے ہیں کہ متبادل کیا ہے؟ اس متبادل کے سوال کا واضح مطلب یہی ہوتا ہے کہ وہ قبول کر رہے ہیں کہ یہ غلامی کا شکنجہ ہے، یہ کوئی کاروبار نہیں یہ بات انکو بھی معلوم ہوجاتی ہے تبھی وہ متبادل مانگتے ہیں اور انکو لگتا ہے کہ متبادل نہ ہونے کی وجہ سے یہ غلامی ہی درست ہے۔ یہ ذہنی غلامی کی اتنی ہولناک سطح ہے کہ انسان غلامی سے نکلنے کا متبادل آنکھیں بند کرکے مانگے اور آنکھیں کھولے بغیر ہی غلامی قبول کرتا چلا جائے ۔