شعور نیوز(انٹرنیشنل ڈیسک): امریکی پابندی کے باوجود مصنوعی ذہانت کے دو بڑے ناموں نے ڈیزائنر بچے پیدا کرنے کے منصوبے میں ہاتھ ڈال دیئے۔لیبل اس بار بھی باطل نظریہ ’ہیومینٹی ‘ کا لگایا ہے یعنی انسانوں میں سے موروثی بیماریوں کا خاتمہ ۔ جدید سائنس اپنے آغاز سے ہی خدا کے وجود سے بغاوت پر کھڑی ہے۔ گذشتہ 200 سالوں میں اہل حق نے مستقل یہی صدا لگائی ہے مگر ٹیکنالوجی کے رعب کا شکار ہو کر لوگ اپنی اصل سے ہٹتے چلے گئے۔

امریکی اخبار وال اسٹریٹ جرنل کی ایک رپورٹ کے مطابق امریکا کے دو ارب پتی افراد، اوپن اے آئی کے سربراہ سیم آلٹ مین اور کرپٹو کرنسی پلیٹ فارم کوائن بیس کے شریک بانی برائن آرمسٹرانگ اس میں شامل ہیں۔ دونوں کی مالی معاونت سے قائم امریکی بایوٹیک کمپنی خفیہ طور پر اس منصوبے پر کام کر رہی ہے ۔ منصوبے کا مقصد جینیاتی طور پر تیار کردہ ’’ڈیزائنر بچے‘‘ پیدا کرنا ہے۔

سان فرانسسکو میں قائم اس اسٹارٹ اپ کمپنی کا نام ’’پریوینٹو‘‘ ہے جسے رواں سال جین ایڈیٹنگ کے ماہر لوکاس ہیرنگٹن نے قائم کیا۔ کمپنی کا دعویٰ ہے کہ وہ پیدائش سے پہلے انسانی جنین میں جینیاتی تبدیلی کے ذریعے موروثی بیماریوں کا خاتمہ کرنا چاہتی ہے۔ ماہرین کے مطابق، اگرچہ جین ایڈیٹنگ ٹیکنالوجی کا استعمال دنیا بھر میں بالغ افراد کے علاج کیلئے کیا جا رہا ہے، تاہم بچوں کی تخلیق سے قبل جنین میں تبدیلی کرنے پر امریکا سمیت کئی ممالک میں پابندی عائد ہے۔

2018 میں چین کے سائنس دان He Jiankui نے ایسے جڑواں بچوں کی پیدائش کا اعلان کیا جن کے DNA میں تبدیلی کی گئی تھی — اس پر دنیا بھر میں شدید مذمت ہوئی اور اسے تین سال قید کی سزا ملی۔

ایسے بچے بنانا جدید لبرل معاشروں میں ابھی اس لیے بھی ممنوع ہے کہ اس میں سائنسی، اخلاقی، مذہبی اور سماجی خطرات شامل محسوس ہورہے ہیں۔اس ضمن میں تین اہم مقدمات ہیں:

انسان کی تخلیق میں مداخلت: جینیاتی ایڈیٹنگ (gene editing) براہِ راست انسانی فطرت اور خالق کی تخلیقی اسکیم میں مداخلت سمجھی جاتی ہے۔
نسلی جنگ کا خطرہ: اگر جینز کو مرض ختم کرنے کے بجائے ذہانت، خوبصورتی یا طاقت بڑھانے کے لیے تبدیل کیا گیا تو معاشرہ ایک نئی نسل کی "نسلی برتری" (genetic inequality) میں تقسیم ہو سکتا ہے جو نسلی جنگ کی طرف جا نے کا اہم قدم ہو سکتاہے۔
اخلاقی حدیں مٹ جاتی ہیں: یہ تو تاریخ ہے کہ ایک بار اجازت ملنے کے بعد کسی کی کوئی حد باقی نہیں رہتی ۔
غیر متوقع نتائج: انسانی ڈی این اے میں تبدیلی کے بعد کوئی گارنٹی نہیں کہ وہ تجربہ کتنا کامیاب ہوگا ؟ اسکا بھی سو فیصد امکان ہے کہ یہ انسانی جسم کے دوسرے حصوں کو بھی متاثر کر سکتاہے، جس سے نئے، لاعلاج امراض پیدا ہو سکتے ہیں۔
یہ سارے وہ نتائج و دلائل ہیں جو خدا مائنس سرمایہ دارانہ جدید سائنس کی آمد سے شروع ہوئے اور آج بھیانک شکل اختیار کر چکے ہیں۔
اب سب سے بڑا سوال اُن کئی ارب انسانوں سے ہے جو یہ مانتے ہیں کہ وہ کسی خالق و مالک کی پیدا کردہ ہستی ہیں جسے اشرف المخلوقات کے طور پر پیدا کیا گیا ہے ۔ وہ کیسے "احسن تقویم" پر بنےہوئے انسان کی فطرت میں ایسی مداخلت کر سکیں گے یا جواز نکالیں گے جو نسلِ انسانی کی ساخت بدل دے۔