شعور نیوز( انٹرنیشنل ڈیسک):یورپی کمیشن کی سربراہ نے ایک پریس کانفرنس میں خبردار کیا ہے کہ بچوں کے تحفظ کے مسائل، خاص طور پر آن لائن اور ڈیجیٹل دنیا میں، AI کمپنیوں اور ٹیک اداروں کے سلیکون ویلیٰ ماڈل پر نہیں چھوڑے جائیں گے۔

دوسری طرف برطانیہ کے میڈیا ریگولیٹر Ofcomنے ایلون مسک کے AI چیٹ بوٹ گروک کی تصویر بنانے والی خصوصیت کے خلاف تحقیقات کا آغاز کیا ہے جو جنسی طور پر Deepfake بنانے میں تیزی سے استعمال کی جا رہی ہیں۔اس میں صارفین کو ہر قسم کی خواتین اور بچوں کی جنسی تصاویر بنانے اور شیئر کرنے کی سہولت نے معاشرتی طور پر ایسی صورتحال پیدا کر دی ہے کہ برطانیہ کا الٹر لبرل ماڈرن معاشرہ بھی چیخ اٹھا ہے۔

برطانیہ کہ وزیر اعظم کیئر اسٹارمر نے اس تحقیق کا خیرمقدم کرتے ہوئے کہا کہ Ofcom کو "جو بھی مناسب لگتا ہے اسے کرنے کے لیے ہماری مکمل حمایت حاصل ہے۔ ہم بچوں کو آن لائن تحفظ فراہم کرنے اور ضرورت کے مطابق قانون کو مضبوط بنانے کے لیے مزید آگے جانے سے دریغ نہیں کریں گے۔

اب یہ دونوں محض ٹیکنالوجی کی خبر نہیں بلکہ بدترین انسانی بحران کااعلان ہے جسے نظر انداز کرنے سے ہم سب اپنا ہی نقصان کریں گے۔

27 یورپی ملکوں کی نمائندگی کرنے والے یورپی کمیشن کی سربراہ کے مطابق:

مصنوعی ذہانت اور مشین لرننگ کے اس دور میں بچوں کی پرائیویسی اور حفاظت صرف انسانی یا متعلقہ ریاست کی ذمہ داری ہے۔
تجارتی ٹیک پلیٹ فارمز کا ہدف صرف منافع کمانا ہوتا ہے اس لیے وہ خطرناک مواد پرنظر نہیں رکھ سکتے۔
یورپی قوانین انسانی حقوق، خاندان، اور سماجی اقدار کو مقدم رکھیں گے۔

مغربی قوتوں کے مرکزی ادارے کی پالیسی ساز سربراہ کے اس بیانیے نے جدیدیت کے پیدا کردہ تازہ بحرانوں کو داخلی طور پر بھی عیاں کردیا ہے۔

یورپی یونین کی سربراہ کا مؤقف بظاہر تو بچوں کے حق میں ہے، مگر دراصل تین بڑے فکری بحرانوں کی نشاندہی بھی کرتا ہے:

1.مصنوعی ذہانت بحران:

مصنوعی ذہانت کی ترقی تیز رفتاری سے مستقل جاری ہے ۔دنیا دیکھ رہی ہے کہ اس کے ساتھ ہی اخلاقی، سماجی ،انسانی تناظر میں بحرانات بڑھتے جا رہے ہیں:

یہ مصنوعی ذہانت کے تمام سسٹمز خطرناک مواد، تشدد، جنسی استحصال اور نفرت انگیز بیانات کو خود سیکھتے اور پھیلاتے ہیں۔
قتل کے مقدمات درج ہو رہے ہیں۔ یہ ذہانت قتل ہی نہیں خودکشیاں بھی کروا رہی ہے۔
کمپنیاں خود کو بظاہر ’ماہرِ تحفظ ‘ظاہر کر کے اپنی ذمہ داریوں سے اصلاً و عملاً کنارہ کش ہیں ، کیونکہ اُن کا مقصد گاہگ لانا اور لگائی گئی بھاری سرمایہ کاری کو واپس لینا ہے۔اس لیے AI کی بے لگام ترقی ایک معاشرتی بحران بن چکی ہے جس میں سب سے کمزور گروہ — بچے — سب سے زیادہ متاثر ہو چکے ہیں۔

یہ بحران صرف ٹیکنالوجی کا نہیں، بلکہ انسانی و اخلاقی عدم توازن کا بھی ہے۔

2. چائلڈ پروٹیکشن میں استعماری قوانین کا بحران

آسٹریلیا کے بعد اب دیگر ممالک میں بھی بچوں پر پابندیوں کا سلسلہ شروع ہونے جا رہا ہے۔یورپ اور امریکہ کی حکومتیں جب چائلڈ پروٹیکشن کے قوانین بنانے بیٹھتی ہیں تو:

وہ اپنے پوسٹ کالونیل، استعماری اور مارکیٹنگ سے متاثر معیار دوسرے معاشروں پر بھی نافذ کرنا چاہتی ہیں۔
بچوں کے تحفظ کا نام لے کر ثقافتی، خاندانی اور مذہبی اقدار کو کم تر قرار دیا جاتا ہے۔
حقیقت میں یہ قوانین مغربی کمپنیوں کو قانونی تحفظ فراہم کرتے ہیں، جبکہ مقامی معاشروں کی خود ارادیت کم ہوتی ہے۔

یہ نظم و نسق دراصل استعماریت کا نیا روپ ہے، جس میں قانون کے نام پر مشینی ثقافت زرِ مبادلہ لاگو کی جاتی ہے۔

3. پوسٹ ماڈرنسٹ مشینی تعبیر کا بحران

آج ہمیں AI کی تشریح پوسٹ ماڈرنسٹ فلسفے کے آئینے سے کی جاتی ہے:

ہر ڈیٹا پوائنٹ ایک نیا معنی رکھتا ہے، ہر تصویر اور لفظ اپنے سیاق و سباق سے آزاد سمجھا جاتا ہے۔
مشینی تعبیر کے اس فکری بنیاد میں انسانی فہم و اخلاقیات حادثاتی یا غیر ضروری قرار دی جاتی ہیں۔

اس سے نتیجہ یہ نکلتا ہے کہ:

خطرناک اور نفرت انگیز AI نتائج صرف ’ڈیٹا کی خرابی‘ ہیں، انسانی نقصان کوئی سنجیدہ مسئلہ نہیں۔

یہ ذہنی فریم ورک خود ایک بحران ہے — جو AI کو بے رحم، اخلاق سے عاری اور خودمختار سمجھتا ہے۔

اس لیے یورپی یونین کی سربراہ درست بیماری تو بتا رہی ہیں مگر وہ خود مغربی تکنیکی استحکام، AI کے مشینی دلائل اور استعماری قوانین کو چیلنج نہیں کر رہی

انسانی اصولوں سے زیادہ منافع اور مشین کی آزادی کو ترجیح ہے
اور فکری تحریکیں مشینی تعبیر کو انسانی فکری مرکزیت کے اوپر رکھتی ہیں۔

ہر جدید ٹیکنالوجی اور آلے کی آمد کے وقت ہی اُس کو مسلمان و روایت پسند مفکرین نے ہمیشہ دینی واخلاقی پوزیشن سے ہی رد کیا ۔ٹینالوجی و سائنسی ایجادات کو قبول کرنے والےماڈرنسٹوں نے اس کے جواب میں ان تمام ایجادات و ٹیکنالوجی کو غیر اقداری و نیوٹرل قرار دیتے ہوئے انسانی سہولت و مثبت استعمال کی دلیل کے طور پر پیش کیا۔ 200 سالہ تاریخ گواہ ہے کہ ان تمام ایجادات کے مثبت استعمال آج صرف ایک کتابی بات کی صورت میں ہیں جبکہ اس کا بدترین منفی استعمال ہی غالب رہا ہے ۔