شعور نیوز( انٹرنیشنل ڈیسک): بھارتی ریاست کیرالا جسے ’100% خواندگی کی ماڈل اسٹیٹ‘ کہا جاتا ہے ، وہاں مقامی پولیس نے دنیا کی سب سے بڑی جعلی ڈگری فیکٹری پکڑ لی۔ اڈے سے ایک لاکھ سے زائد تیار شدہ ڈگریاں، ہائی ٹیک پرنٹنگ مشینیں اور 28 مختلف بھارتی یونیورسٹیوں کی جعلی مہریں برآمد ہوئیں۔کیرالہ پولیس کے مطابق انہوں نے کوئی 100 کروڑ روپے مالیت کی جعلی ڈگری بنانے والے اس گروہ کا پردہ فاش کیا ہے۔ پولیس کے مطابق جعلی اسناد کی اصل تعداد 10 لاکھ سے تجاوز کر سکتی ہے۔کئی افراد ان جعلی ڈگریوں کی بنیاد پر بیرونِ ملک ملازمتیں بھی حاصل کر چکے ہیں۔

ہر ڈگری کی قیمت 75 ہزار تا 1.5 لاکھ بھارتی روپے وصول کی جاتی تھی، اور دستاویزات اس قدر پیشہ ورانہ طریقے سے بنائے جاتے کہ روایتی ویریفیکیشن کے ذریعے ان کا پکڑ پانا تقریباً ناممکن تھا۔

نیٹ ورک کے مراکز کیرالا، تامل ناڈو، بنگلورو، دہلی، آندھرا پردیش، گوا، مہاراشٹر اور مغربی بنگال تک پھیلے ہوئے تھے۔اب تک 11 افراد گرفتار ہو چکے ہیں جبکہ پولیس نے ملک گیر سطح پر تحقیقات شروع کر دی ہیں کہ کہیں یونیورسٹی عملہ اس گھناؤنے کاروبار میں شامل تو نہیں تھا۔

یہ خبر صرف ایک مجرمانہ واقعہ نہیں ۔ بھارت میں یہ سلسلہ بالکل عام ہے۔ صرف بھارت ہی نہیں پاکستان میں بھی یہ سلسلہ اپنی جڑیں رکھتا ہے۔ پریشان مت ہوں برطانیہ، یورپ ، امریکہ میں بھی یہ سب موجود ہیں۔ اس لیے یہ ایک پورے تعلیمی تصور کی ناکامی کی علامت ہے۔

بھارت ،پاکستان کا ذکر اس لیے کیا گیا ہے کہ یہاں ہزاروں سال سے اُن کی اپنی تہذیب و مذہبی روایات کے مطابق بہترین تعلیمی نظام رائج تھا جسے بدترین جبر و تشدد سے انگریز استعمار نے تبدیل کرایا۔

استعماری تعلیمی نظام کی بنیاد میں موجود خرابی

جب برصغیر ہی نہیں استعمار کے زیر اثر تمام خطوں میں ’علم ‘ کی اصل تعریف تبدیل کر کے اسے استعماری فریم ورک میں ڈالا گیا تو اس کا بنیادی مقصد کبھی بھی انسان سازی ، تربیت، اخلاق سازی نہیں رہا؛ بلکہ انسان کو اُس کی روایتی معاشرت سے کاٹ کر :

اصل قدر = سرمایہ بن گئی جس کے لیے

مرکزی مقصد = نوکری بن گیا اور

معیار = کاغذی اسناد ہوگئیں۔ اس لیے

اخلاقیات = غیر ضروری بوجھ ہوگئیں۔

اس تبدیلی کا سیدھا نتیجہ یہ نکلا کہ تعلیم ایک بازاری مصنوع (commodity) میں بدل گئی۔ یہی وجہ ہے کہ تعلیم ، تعلیمی ادارے، اسکول، کالج، یونیورسٹی ، ٹیوشن سینٹر سب کے سب ایک منافع بخش کاروبار بن چکے ہیں۔جہاں کاغذ کا ایک ٹکڑا (ڈگری) علم، قابلیت، کردار اور مہارت پر فوقیت لے گیا۔

جب “علم” کو سرمایہ پیدا کرنے کی مشین سمجھا گیا، تو پھر:

جعلی ڈگری
جعلی اسناد
پیپر لیک
امتحانی مافیا
ٹیوشن انڈسٹری
رٹہ سسٹم
نوکری کی دوڑ
سرٹیفکیٹ کلچر

— یہ سب نہ صرف ممکن ہوئے بلکہ نظام کا حصہ بن گئے۔

کیرالا کا اسکینڈل دراصل اسی سرمایہ-مرکوز اور اخلاقی طور پر دیوالیہ تعلیمی ماڈل کا منطقی انجام ہے۔

یہ واقعات صرف بھارت کی بدنامی نہیں ہوتے ؛ یہ لارڈ میکالے کے مسلط کردہ نوآبادیاتی تعلیمی ماڈل کی عالمی ناکامی کا اعلان ہے۔

عالمی تناظر — یہ مسئلہ صرف بھارت تک محدود نہیں

کیرالا میں پکڑی جانے والی 100 کروڑ کی جعلی ڈگری فیکٹری کوئی الگ تھلگ واقعہ نہیں۔ گوگل کی سادہ تلاش بھی ظاہر کرتی ہے کہ بھارت بھر میں پچھلے چند برسوں کے اندر درجنوں بڑے ریکٹ پکڑے جا چکے ہیں—اور ان کا پھیلاؤ اتنا وسیع ہے کہ اب یہ پورے تعلیمی ڈھانچے پر عدم اعتماد کی علامت بن چکا ہے۔

دنیا بھر میں اس وقت تعلیمی ادارے ایک ہی بنیادی بحران کا شکار ہیں:

1. ڈگری ازم کی عالمی دوڑ

زندگی کے ہر میدان میں اصل قابلیت کے مقابلے میں ’کاغذی ثبوت‘ زیادہ اہم ہو گیا ۔ اس بحران کے حل کے لیے مزید امتحان لینے کے نئے ادارے بنائے گئے ،مگر وہاں بھی پیپر لیک اور اس جیسی خرابیاں آ گئیں۔ یوں پاکستان، بھارت، خلیج، یورپ اور امریکہ تک جعلی ڈگریوں کا کاروبار اربوں ڈالر کی عالمی انڈسٹری بن چکا ہے۔

2. اخلاقیات کا انہدام

جب علم کا مقصد کردار سازی نہ ہو تو نتائج ظاہر ہیں:
صرف اسناد رہ جاتی ہیں، علم غائب ہو جاتا ہے۔

3. مہارت کے بجائے سرٹیفکیٹ کلچر

کمپیوٹر پروگرامنگ ہو، میڈیکل ہو یا نرسنگ — ہر جگہ ’شارٹ کورس سرٹیفکیٹ‘ نے حقیقی تربیت کو ختم کر دیا ہے۔اسی خلا کو جعلی اسناد کا کاروبار آسانی سے بھر دیتا ہے۔