شعور نیوز( انٹرنیشنل ڈیسک): غزہ کی پٹی پر 7 اکتوبر 2023 سے شروع ہونے والے اسرائیلی حملوں میں شہدا کی تعداد 70117 ریکارڈ ہوگئی۔غزہ کی وزارت صحت نے کہا ہے کہ زخمیوں کی کل تعداد بھی بڑھ کر 170,999 ہوگئی ہے۔ہسپتالوں کو گزشتہ 48 گھنٹوں کے دوران پانچ شہریوں کے ساتھ ساتھ 13 زخمیوں کی لاشیں موصول ہوئیں۔10 اکتوبر 2025 کو جنگ بندی معاہدے کے نفاذ کے بعد سے اب تک کم از کم 360 فلسطینی شہید، 922 زخمی اور 617 شہداء کی لاشیں نکالی جا چکی ہیں۔غزہ میں جنگ بندی کے باوجود اسرائیلی فورسز کی کارروائیاں جاری ہیں، اسرائیل کے متعدد فضائی حملوں میں ایک صحافی سمیت 3 فلسطینی شہید ہوگئے۔

اسرائیلی قابض فوج نے تباہ شدہ غزہ کے مشرقی علاقوں میں مزید فضائی حملے، توپ خانے سے گولہ باری اور مسماری کا سلسلہ جاری رکھا ہوا ہے۔

فلسطینی محکمہ صحت کا بتانا ہے کہ خان یونس کے مرکزی علاقے میں فضائی حملے میں صحافی محمود وادی شہید اور انکا ساتھی زخمی ہوگیا۔ صحافی محمود وادی کو دوران رپورٹنگ نشانہ بنایا گیا۔اسرائیلی فوج نے دعویٰ کیا ہے کہ جنوبی غزہ میں ’یلو لائن‘ عبور کر کے فوجیوں کے قریب پہنچنے پر 2 افراد کو گولی مار کر ہلاک کیا گیا۔

سیکڑوں ممتاز ثقافتی شخصیات نے ایک کھلے خط پر دستخط کیے ہیں جس میں اسرائیل پر زور دیا گیا ہے کہ وہ اسرائیلی حراست میں سب سے نمایاں فلسطینی قیدی مروان برغوتی کو رہا کرے۔برغوتی سنہ 2000 کی دہائی کے اوائل سے اسرائیلی جیل میں ہیں۔ وہ فلسطین کے سیاسی دھڑے الفتح کے ایک اہم رکن ہیں جو فلسطینی اتھارٹی پر غلبہ رکھتا ہے، جو مقبوضہ مغربی کنارے کے محدود حصوں پر حکومت کرتا ہے۔وہ قتل اور اقدام قتل کے الزامات میں پانچ عمر قید کے علاوہ 40 سال کی سزا کاٹ رہا ہے، جس سے وہ مسلسل انکار کرتا رہا ہے۔فلسطینیوں نے اسرائیل اور حماس کے درمیان غزہ جنگ بندی معاہدے کے تحت برغوتی کی رہائی کا مطالبہ کیا تھا لیکن اسرائیل نے اسے رہا کرنے سے انکار کر دیا تھا۔