شعور نیوز( انٹرنیشنل ڈیسک):بین الاقوامی جرائم کے ٹریبونل نے بنگلہ دیش میں گذشتہ سال 2024 میں ہونے والے انسانیت کے خلاف قتل عام کے مقدمے کا فیصلہ سنا دیا۔جسٹس غلام مرتضیٰ موجمدار کی سربراہی میں تین رکنی ٹریبونل 1 نے فیصلہ سناتے ہوئے معزول وزیراعظم شیخ حسینہ اور سابق وزیر داخلہ اسد الزماں خان کمال کو سزائے موت سنائی۔ سابق انسپکٹر جنرل آف پولیس (آئی جی پی) چودھری عبداللہ المامون، جو ریاستی گواہ بنے،اُن کو اس قتل عام کے مقدمے میں پانچ سال قید کی سزا سنائی گئی۔

اس اہم سزا کے بعد بھی سفاک مجرموں کے پاس سپریم کورٹ کے اپیلٹ ڈویژن کے سامنے فیصلے کے خلاف اپیل کرنے کا موقع ہے لیکن اس سے پہلے انہیں عدالت کے سامنے سرنڈر یا گرفتاری دینی ہوگی۔

بنگلہ دیش کی معزول وزیر اعظم شیخ حسینہ واجد کے ساتھ اُن کے وزیر داخلہ کو حکومت مخالف مظاہروں کے خلاف مہلک کریک ڈاؤن پر سزائے موت دی گئی ہے ۔ وہ دونوں اس وقت انڈیا کی غیر قانونی پنا ہ میں زندگی گزار رہے ہیں ۔ اس تاریخی فیصلے پر بنگلہ دیش کے عوام میں بھرپور خوشی کا اظہار کیا جا رہا ہے۔کورٹ کے کمرے میں ظالموں کو سزا ملنے پر خوب تالیاں بجائی گئیں۔

ریاستی گولی کا نشانہ بننے والوں کے اہل خانہ نے کہا کہ آئی جی کو دی گئی پانچ سال کی سزا درست نہیں۔وہ اس کم سزا کے خلاف ملک کی سپریم کورٹ میں اپیل کریں گے ۔

انٹرنیشنل کرائمز ٹریبونل (آئی سی ٹی) نے متعلقہ حکام کو حکم دیا کہ وہ 2 اخبارات ایک بنگالی اور ایک انگریزی اخبار میں پبلک نوٹس برائے وارنٹ بھی جاری کریں ۔

چھ ماہ کی تحقیقات کے بعد، ٹربیونل کی ایجنسی نے 12 مئی کو اپنی حتمی رپورٹ پیش کی اور اتوار کو اسے باضابطہ طور پر عدالت میں پیش کیا۔

سابق وزیر اعظم حسینہ واجد اور اُن کے ساتھ مفرور وزیر داخلہ اسد الزماں کو سزائے موت جبکہ آئی جی مامون کو 5 سال قیدکی سزا ہوئی ۔فیصلے میں ٹریبونل نے کہا کہ شیخ حسینہ اور دیگر دو ملزمان کے خلاف الزامات ثابت ہو چکے ہیں۔شیخ حسینہ کو دو الزامات میں سزائے موت سنائی گئی ہے۔سابق وزیر داخلہ اسد الزماں خان کو ایک الزام میں سزائے موت سنائی گئی ہے۔استغاثہ کے گواہ سابق انسپکٹر جنرل آف پولیس چودھری عبداللہ المامون کو پانچ سال قید کی سزا سنائی گئی ہے۔مقدمے کی سماعت کرنے والوں میں صرف سابق پولیس چیف عبداللہ المامون سزا سنانے کے لیے موجود تھے۔

عوامی لیگ کی (سابق )سربراہ 78 سالہ حسینہ واجد نے بھارت میں بیٹھ کر اپنے فیصلے کو ’سیاسی محرک اور متعصبانہ ‘ قرار دےدیا۔

اقوام متحدہ کے اندازوں کے مطابق ان مظاہروں کے دوران 1400 افراد کی ہلاکت ہوئی تھی۔ گذشتہ ہفتے بی بی سی کو دیے ایک انٹرویو میں شیخ حسینہ نے اپنے خلاف عائد کردہ الزام کی تردید کی تھی اور کہا تھا کہ ان کے خلاف پہلے سے طے شدہ فیصلہ سنایا جائے گا۔

بی این پی کی قائمہ کمیٹی کے رکن صلاح الدین احمد نے معزول آمر شیخ حسینہ کے خلاف پیر کے فیصلے کو سنگ میل قرار دیا، حالانکہ انہوں نے کہا کہ سزا "جرائم کی سنگینی کو دیکھتے ہوئے کافی نہیں ہے۔لیکن یہ ایک مثال کے طور پر کام کرے گی تاکہ آئندہ کوئی حکومت یا فرد فاشسٹ نہ بن سکے۔

بنگلہ دیش کی وزارت قانون کے مشیر آصف نذر نے کہا ہے کہ ہندوستان کو ایک اور خط بھیجا جائے گا جس میں نئی دہلی سے شیخ حسینہ کی حوالگی کے لیے کہا جائے گا۔

اٹارنی جنرل محمد اسد الزماں نے کہا کہ بنگلہ دیش کی تاریخ کا سب سے اہم فیصلہ پیر کو سنایا گیا۔

"اس فیصلے کے ذریعے شہداء کو انصاف ملا ہے، ریاست کو انصاف ملا ہے، اور استغاثہ کو انصاف ملا ہے۔ اتھارٹی کی شہداء، ملک، اس قوم کے عوام، آئین، قانون کی حکمرانی اور آنے والی نسلوں کے تئیں ذمہ داری کے پیش نظر یہ فیصلہ سنگِ بنیاد ہے"۔

پاکستان میں لال مسجد، سانحہ 12 مئی، پارا چنار ،سانحہ ماڈل ٹاؤن سے لیکر سانحہ مریدکے آج بھی کسی بھی قسم کے دنیاوی انصاف کے منتظر ہیں۔