شعور نیوز( انٹرنیشنل ڈیسک):ایران میں مہنگائی، کرنسی کی شدید گراوٹ اور روزمرہ اخراجات میں اضافے کے خلاف عوام کا احتجاج چھٹے دن میں داخل ہو گیا۔جون 2025 میں اسرائیل–ایران کے درمیان تقریباً 12 روزہ شدید جنگ کے اثرات کو ختم کرنے کے لیے یہ استعماری طریقہ پرانا ہے۔روس میں بھی افغان جنگ کے بعد ایسے ہی احتجاج ہوئے تھے ۔ استعماری پلان میں آپ کو مہنگائی ، بے روزگاری، غربت، ترقی مانگنا لازمی ملے گا کیونکہ یہ تمام مسائل سرمایہ دارنہ نظام کے پیدا کردہ ہوتے ہیں۔

خبروں تصاویر وڈیوز سے صاف ظاہر ہو رہا ہے کہ مظاہرین پر امن رہنے کے بجائے منصوبہ بندی سے پُرتشدد جھڑپوں کی شکل بنا رہے ہیں ۔ایسے میں مظاہرین اور سکیورٹی فورسز کے درمیان جھڑپوں میں کچھ اموات بھی رپورٹ ہوئی ہیں۔ مختلف ذرائع اموات کی تعداد مختلف بتارہے ہیں۔مرنے والومیں سیکیورٹی فورس کے لوگ بھی شامل ہیں۔ایرانی سرکاری بیانیے میں ان واقعات کو ’فسادی عناصر‘ اور ’بیرونی اشتعال‘ سے جوڑا جا رہا ہے۔

’امریکی سازش اور حکومت تبدیلی ‘ کے بیانیے کی 7بنیاد یں ؟

احتجاج اقتصادی مسئلے سے شروع ہو کر بعض جگہ سیاسی نعروں تک پہنچ گیا(سپریم لیڈر کے خلاف نعرے/نظام کی تبدیلی کے مطالبات کی رپورٹنگ)۔یہ بات مغربی میڈیا رپورٹ کر رہا ہے جو پہلے ہی امریکی ایجنڈے کے ساتھ ہے ۔
امریکی صدر ڈونلڈ ٹرمپ نے کھلے الفاظ میں کہا کہ اگر ایرانی حکومت نے ’پرامن مظاہرین‘پر مزید تشدد کیا تو امریکہ ’locked and loaded‘ ہے اور ’intervene‘ یعنی مداخلت کر سکتا ہے۔ اس بیان کو تہران ’براہِ راست مداخلت کی دھمکی‘ کے طور پر پیش کر رہا ہے۔ظاہر ہے کہ اگر آپ اپنے آپ کو دنیا کا خود ساختہ چوہدری سمجھ بھی رہے ہو تو کسی ملک میں مہنگائی کا مسئلہ ہے تو آپ کو مہنگائی دور کرنے کے لیے اُس ملک کی مدد کرنی چاہیے ، امداد بھیجنی چاہیے ناکہ اُس سے زیادہ مہنگا کام کرکے حکومت کی تبدیلی کی بات کرنی چاہیے۔ یہ بات واضح کر رہی ہے کہ یہ سب مظاہرے امریکی منصوبہ بندی کا حصہ ہیں۔
احتجاجی مظاہرے پاکستان خصوصاً مریدکے میں ہوئے ، وہاں حکومت نے جو کچھ کیا اُس پر مجال ہے جو امریکہ نے کسی مداخلت کا لفظ بھی کہا ہو؟ بنگلہ دیش میں آگ لگی رہی گذشتہ سال مگر مجال ہے جو امریکہ نے ایک لفظ کہا ہو۔اب صرف ایران میں مظاہرین کے نام پر مداخلت کا مطلب صاف ہے۔
ایرانی حکام نے اسی تناظر میں امریکہ/اسرائیل پر ’اشتعال‘ اور ’عدم استحکام‘ پھیلانے کا الزام لگایا اور اسے ’ریڈ لائن‘ قرار دیا ہے ۔
اس پورے خطے میں امریکی، اسرائیلی مفادات کے لیے اب صرف ایران ہی سب سے بڑا خطرہ ہے ، جس کو ختم کرنے کے لیے ایران کی حکومت میں امریکی لابی کے یا ٹرمپ کو سیلوٹ کرنے جیسے حکمرانوں کی ضرورت ہے جو سابق بادشاہ کے بیٹے کی صورت امریکہ نے تیار کر رکھی ہے۔
ایران میں مالی بحران کی ایک بڑی وجہ اُس پر امریکہ و دیگر پابندیوں اور مالی دباؤ کا ذکر بین الاقوامی رپورٹنگ میں مستقل آتا رہا ہے ۔ گویا اس مہنگائی یا بے چینی کی اصل وجہ امریکہ ہی ہے ۔ دوسری طرف امریکہ اور ٹرمپ نے اس بات کا اقرار کیا ہے کہ وہ ایرانی عوام کو پسند کرتا ہے ، ایرانی عوام کے ساتھ ہے تو اگر وہ ایرانی عوام کا مخلص ہے تو پابندیاں ختم کرکے امداد ہی بھیج دے ، مگر حقیقت یہی ہے کہ وہ ایرانی عوام کو بھی دھوکہ دے رہا ہے۔
مغربی میڈیا پر آپ اس معاملے کو دیکھیں گے تو ’مہنگائی، کرنسی کریش، بدانتظامی‘ اور پھر ’اینٹی رجیم‘ نعروں کو مرکزی طور پر دکھاتا ہے ۔ وہ ذہن سازی کر رہا ہے کہ ایران کے عوام کے لیے حکومت کی تبدیلی ہی بہتر ہے۔