شعور نیوز( انٹرنیشنل ڈیسک): عالمی استعمار امریکہ پوری قوت سے وہاں حکومت بدلنے کے منصوبے کو لیکر اترا ہوا ہے اور دنیا بھر کی نظریں ایران پر لگی ہوئی ہیں۔

ایرانی صدر مسعود پیزشکیان نے علانیہ طور پر امریکا اور اسرائیل کو ایران میں فسادات کا ذمہ دار قرار دے دیا۔ایران کے سپریم لیڈر آیت اللّٰہ خامنہ ای کا کہنا ہے کہ فرعون، نمرود اور رضا شاہ کے ساتھ جو ہوا وہی ٹرمپ کے ساتھ ہو گا۔

ایران پر امریکا کے ممکنہ حملے کی رپورٹس پر چین نے کہا ہے کہ بین الاقوامی تعلقات میں طاقت کے استعمال کی مخالفت کرتے ہیں، عالمی قوانین کے تحت ملکی خودمختاری اور سب کی سلامتی کا تحفظ کیا جانا چاہیے۔

ایران نے قومی غیرت کا مظاہرہ کرتے ہوئے برطانیہ کے سفیر کو بلا کر احتجاج کیا ہےکہ کیسے برطانیہ میں اُن کے سفارت خانے پرمظاہرین حملہ کرنے میں کامیاب ہوئے ۔ جس ملک میں سفارت خانہ ہوتا ہے اُس کی ذمہ د اری ہوتی ہے اُس عمارت کو مکمل تحفظ دینے کی ۔یہ سارے اعمال اس جانب اشارہ دیتے ہیں کہ یورپی و امریکی حکومتیں مشترکہ طور پر کس ایجنڈے پر ہیں۔

امریکی صدر ڈونلڈ ٹرمپ نے ایران کے اندر مداخلت کرتے ہوئے انٹرنیٹ بحالی کا بیان دیا ہے جس کا صاف مقصد اپنے ایجنٹوں سے رابطہ بحالی ہے۔اس دوران ٹرمپ نے چوتھی مرتبہ دھمکیاں دہرائی ہیں کہ اگر ایران نے اپنے ملکی قانون پر عمل کیا تو وہ ایران پر فوجی حملہ کرےگا۔اس کے جواب میں ایرانی پارلیمنٹ کے اسپیکر محمد باقر قالیباف کا کہنا ہے کہ اگر ایران پر حملہ ہوا تو وہ خطے میں اسرائیل اور امریکی فوجی تنصیبات پر جوابی حملہ کرے گا۔

ایرانی صدر نے عوام سے باہمی اتحاد ،قیادت پر یقین اور دہشت گردوں سے دور رہنے کا پیغام دیا ہے۔ایرانی حکومت نے عوام سے متعدد بار معیشت کی بحالی کا عہد دہرایا ہے لیکن شرپسند عناصر مستقل صورتحال کو خراب کرنے پر تلے نظر آرہے ہیں۔ایران میں انٹرنیٹ اور ٹیلی کمیونیکیشن بڑے پیمانے پر منقطع کر دی گئی ہے تاکہ بیرون ملک سے ہدایات کےسلسلے کو روکا جا سکے۔

ایرانی میڈیا کو انٹرویو میں مسعود پزشکیان نے کہا کہ امریکا، اسرائیل لوگوں کو ہدایات دے رہے ہیں کہ ہم تمہارے ساتھ ہیں جاؤ تخریب کاری کرو، یہ وہی لوگ ہیں جنہوں نے ایران پر حملہ کیا۔ایران میں مزار و مساجد کی بے حرمتی کی خبروں نے واضح کردیا ہے کہ مظاہرین اکثریتی مسلک کے پیروکار نہیں بلکہ بیرونی لبرل ایجنٹس ہیں۔گزشتہ جون میں 12 روزہ جنگ میں دشمن کی شکست کے بعد صدر نے کہا کہ اب وہ اقتصادی شکایات کی آڑ میں ایران کو غیر مستحکم کرنے کی کوشش کر رہے ہیں۔

پیزشکیان نے کہا، "لوگوں کو احتجاج کرنے کا حق ہے، اور ہمارا فرض ہے کہ ہم ان کے مطالبات کا جواب دیں۔" لیکن فسادات، سرکاری املاک پر حملے، مساجد اور قرآن پاک کو نذر آتش کرنا امریکہ اور اسرائیل کے منصوبوں کی عکاسی کرتا ہے۔