شعور نیوز(انٹرنیشنل ڈیسک):غزہ ،فلسطینی مغربی کنارہ، لبنان کے ساتھ شام پر اسرائیلی حملوں کا خونی دراندازی کا سلسلہ جاری ہے۔ آدھا مشرق وسطیٰ ایک ناجائز بدمعاش ریاست کے حملوں کی زد میں اور 50+ اسلامی ممالک خاموش تماشائی بنے ہوئے ہیں۔ صدر ٹرمپ کے امن کے اعلان کی جھوٹی حقیقت دستخط ہونے کے اگلے دن سے ہی اسرائیلی حملوں سے تار تار ہو چکی تھی۔

گذشتہ روز شام کے دار الحکومت دمشق کے دیہی قصبے پر ناجائز اسرائیلی فوج نے بمباری کرڈالی۔اس حملے میں 2بچوں سمیت 13 مسلمان شہید ہوگئے ۔اسرائیلی قابض افواج نے دمشق کے دیہی قصبے پر حملہ کیا۔شہر کے مضافات میں واپسی سے قبل مقامی شامی باشندوں اور اسرائیلی قابض افواج کے درمیان دو گھنٹے تک جھڑپیں ہوئیں۔جھڑپوں کے دوران چھ اسرائیلی فوجی زخمی ہونے کی بھی اطلاعات ہیں۔حماس نے شام پر کیے گئے مجرمانہ حملے کی شدید مذمت کی ہے ۔

دوسری طرف غزہ میں خان یونس شہر کے قریب بنی سہیلہ میونسپلٹی پر اسرائیلی حملے میں کم از کم ایک فلسطینی مسلمان شہید ہو ا ہے۔غزہ پر اسرائیل کی نسل کشی کی جنگ میں اکتوبر 2023 سے اب تک کم از کم 69,785 فلسطینی شہید ہوچکے اور 170,965 زخمی ہیں۔

خیموں میں مقیم اہل غزہ کے لیے اسرائیلی حملوں کے دوران تیسرا موسم سرما مزید آزمائش لایاہے۔ تین سال سے بارش اور سرد موسم نعمت کے بجائے ، بلکہ قابض اسرائیل کی مسلط کردہ جنگ کی تباہ کاریوں کے بیچ ایک نئے عذاب کا روپ دھار ے ہوئے ہے۔

ویڈیو فوٹیج اور جائے وقوعہ سے عینی شاہدین کے بیانات کے مطابق اسرائیلی فوجیوں نے مقبوضہ مغربی کنارے کے شہر جنین میں ایک چھاپے کے دوران دو نہتے فلسطینی مسلمانوں کو انتہائی قریب سے گولی مار کر شہید کر دیا جب کہ دونوں نے فوج کے سامنے ہتھیار ڈال دیئے تھے۔

قابض اسرائیلی فوج نے دونوں نوجوانوں کے قتل کا اعتراف کیا اور ردعمل کو کم کرنے کی ناکام کوشش میں یہ دعویٰ کیا کہ وہ اس واقعے میں ملوث فوجیوں کے خلاف ’’تحقیق‘‘ کر رہی ہے، حالانکہ مجرمانہ نیت پوری کارروائی میں واضح تھی۔

محاصرے کے ساتھ ساتھ قابض اسرائیلی فوج کے ایک فوجی بلڈوزر نے گھر کے اطراف مسماری کا کام شروع کر دیا جبکہ فائرنگ مسلسل جاری رہی اور بڑی تعداد میں قابض اسرائیلی فوجی علاقے میں داخل ہوگئے۔

قابض اسرائیلی جنگی طیاروں نے جنوب لبنان کے مختلف علاقوں پر کئی خوفناک فضائی حملے کیے۔ یہ نیا جارحانہ اشتعال اس وقت سامنے آیا ہے جب گذشتہ جنگ بندی کے معاہدے کو ایک سال مکمل ہو رہا ہے، مگر قابض اسرائیل مسلسل اس معاہدے کو روندتا چلا آ رہا ہے۔

لبنان کی سرکاری خبر رساں ایجنسی کے مطابق بمباری کا زیادہ تر نشانہ جزین کے علاقے میں واقع محمودیہ اور الجرمق تھے۔ مقامی ذرائع نے تصدیق کی کہ قابض فوج نے اقلیم التفاح کی چوٹیوں کو بھی نشانہ بنایا، جبکہ القاطرانی اور الجبور کی چوٹیوں پر بھی بم برسائے گئے۔

لبنانی سرکاری ایجنسی نے یہ بھی بتایا کہ قابض اسرائیلی فوج نے الوزانی کے مضافات میں کھیتوں میں کام کرتے کسانوں پر براہ راست فائرنگ کی تاہم کوئی جانی نقصان نہیں ہوا۔ دوسری جانب اسرائیلی جنگی طیارے الہرمَل شہر کے اوپر درمیانی بلندی پر مسلسل پرواز کرتے رہے جس سے جنوبی فضاؤں میں شدید عسکری کشیدگی برقرار رہی۔