شعور نیوز( انٹرنیشنل ڈیسک):مقبوضہ فلسطین (اسرائیل )سے آنے والی رپورٹس کے مطابق گذشتہ 2سال میں ڈیڑھ لاکھ سے زائد اسرائیلی شہریوں نے ملک چھوڑ دیا۔ یہ محض ایک نقل مکانی کی خبر نہیں بلکہ یہ اس حقیقت کا عملی اعلان ہے کہ طاقت، اسلحہ اور جعلی ریاستی بیانیہ کسی ظلم کو مستقل تحفظ نہیں دے سکتے۔یہ انخلا دراصل اس بیانیے کی شکست ہے جو دہائیوں سے دنیا کو یہ باور کراتا رہا کہ اسرائیل یہودیوں کے لیے ایک محفوظ، مستحکم اور دائمی پناہ گاہ ہے۔

اکتوبر 7 کے بعد شروع ہونے والی جنگ میں اگرچہ بمباری کا مرکز غزہ بنا، مگر خوف، عدم تحفظ اور نفسیاتی شکست کا پھیلاؤ خود صہیونی معاشرے کے اندر ہوا۔ یہی وہ نکتہ ہے جہاں اہلِ غزہ کی فتح محض عسکری نہیں بلکہ اخلاقی، نفسیاتی اور تہذیبی فتح بن کر سامنے آتی ہے۔

قابض اسرائیل کو اپنی تاریخ کے سب سے بڑے انخلاء/بیرونی ہجرت (yerida) کا سامنا ہے، جہاں پچھلے دو برسوں میں تقریباً 150,000 سے زائد شہری ملک چھوڑ چکے ہیں ۔

سال 2023 میں تقریباً 82,800 اسرائیلی طویل مدت کے لیے ملک سے باہر چلے گئے، جو پچھلے سال کے مقابلے میں 44 فیصد زیادہ ہے۔
سال 2025 میں مزید قریباً 70,000 نے ملک چھوڑا، جبکہ صرف 19,000 لوگ واپس آئے۔

دو سال میں مجموعی طور پر 150,000 سے زائد شہری مقبوضۃ فلسطین کی سرزمین چھوڑ چکے ہیں اور کچھ تخمینوں کے مطابق یہ تعداد 200,000 تک پہنچ سکتی ہے ۔
اکتوبر 7، 2023 کو حماس کے حملے اور اُس کے بعد شروع ہونے والی جنگ نے بہت سے شہریوں کے اندر عدم تحفظ کو جنم دیا، خاص طور پر ان علاقوں میں جہاں شہریوں کو براہِ راست خطرہ محسوس ہوا۔حکومت کی پالیسیوں، عدلیہ میں تبدیلیوں اور سیاسی تناؤ نے نوجوان، سیکولر اور تعلیم یافتہ طبقوں کے اندر ملک چھوڑنے کی خواہش کو بڑھایا ہے کیونکہ سیکولر ازم اُن کو دنیا سے محبت سکھا دیتا ہے اور وہ اس کے نتیجے میں عقل پرست بن کر اس طرح کی جعلی صیہونی مذہبی جنگ سے باہر آجاتے ہیں ۔

.اہلِ غزہ کی فتح کیوں فیصلہ کن ہے؟

اہلِ غزہ نے دنیا کو یہ دکھایا کہ:

ظلم کے سامنے ثابت قدمی، طاقت سے زیادہ مؤثر ہوتی ہے
جان کا نذرانہ، نظریے کو مٹا نہیں سکتا بلکہ زندہ کر دیتا ہے
مظلوم کی مزاحمت، ظالم کے شہری کو بھی عدم تحفظ کا شکار بنا دیتی ہے

یہی وجہ ہے کہ آج صہیونی ریاست میں ہجرت کا خوف، بموں سے زیادہ تیزی سے پھیل رہا ہے۔

یہ صرف غزہ کی نہیں، تاریخ کی خبر ہے

یہ خبر محض یہ نہیں کہ کتنے لوگ ملک چھوڑ گئے؛
یہ خبر یہ ہے کہ:

جب ظلم اپنی انتہا کو پہنچتا ہے تو وہ خود اپنے وجود کے خلاف گواہی بن جاتا ہے۔