شعور نیوز( ویب ڈیسک):کراچی کے 25 میں سے ایک اہم شاہ فیصل ٹاؤن کے کارڈیک ایمرجنسی سینٹر کے نام پر ایکو کارڈیوگرام مشینری کی خریداری دِکھائی گئی ۔ اس کے بدلے سینٹر میں پیٹ یا میٹرنٹی سینٹرمیں استعمال کی الٹراساؤنڈ مشین سپلائی کردی گئی ۔ تحقیقات کے مطابق کراچی میٹرو پولیٹن کارپوریشن کے سینئر ڈائریکٹر میڈیکل اینڈ ہیلتھ سروسز نے اپنے کھاتے میں کرپشن کی پرانی مثال تازہ کی ہیں۔

فنڈز میں گزشتہ مالی سال 65 لاکھ کی خریداری ظاہر کی گئی، جبکہ سپلائی صرف 3 لاکھ روپے کی میٹرنٹی سینٹر میں استعمال الٹراساؤنڈ مشین کردی گئی۔ ایمرجنسی کارڈیک سینٹر کے سپرٹنڈنٹ نے اس ’’مشین‘‘ کی وصولی کی باقاعدہ تصدیق بھی کردی۔
کراچی میٹرو پولیٹن کارپوریشن کے میونسپل کمشنر افضل زیدی اور سینئر ڈائریکٹر ڈاکٹر مہوش مٹھانی کے دستخط کے ساتھ 2024-25 کے اینول ڈیولپمنٹ پروگرام (اے ڈی پی) کے فنڈزکو ٹھکانے لگانے کے لیے یہ عظیم الشان منصوبہ ترتیب دیا گیا۔

اپریل 2025 میں شاہ فیصل ٹاؤن کے ایمرجنسی کارڈیک سینٹر کیلئے ECHO CARDIOGRAM WITH TROLLEY MODEL P9 – SONOSAP CHINA کے نام سے ٹینڈر جاری ہوا۔ حسبِ روایت تین معروف نام سامنے آئے ان میں بائیومیڈیکل اسٹار انٹرپرائزز، ارتضی عامر ایسوسی ایٹ، اور آئی ای ایچ انٹرپرائزز۔ٹینڈر جیتا بائیو اسٹار انٹرپرائزز نے اور آخری تاریخ سے پہلے 65 لاکھ روپے سرکاری خزانے سے باعزت طور پر نکل چکے تھے۔

گزشتہ مالی سال کے بجٹ سے خریدی گئی مشین رواں سال میں سپلائی ہوئی تو اس پر سوال اٹھانے کے بجائے ڈاکٹر صاحب نے تحقیقات کے نمائندے کو مشین کا معائنہ بھی نہیں کرایا اور سنہری جملہ دہرایا کہ مجھے اس بارے میں کچھ معلوم نہیں ہے۔