شعور نیوز( انٹرنیشنل ڈیسک): ہم بھی ابراہمی معاہدے کا حصہ بننا چاہتے ہیں لیکن ہم یہ بھی یقینی بنانا چاہتے ہیں کہ ہم دو ریاستی حل کے لیے ایک واضح راستہ محفوظ کر لیں۔ یہ قیمتی الفاظ سعودی عرب کے ولی عہد شہزادہ محمد بن سلمان نے امریکی صدر ٹرمپ کے ساتھ بیٹھ کر پریس سے گفتگو میں ادا کردیئے۔

یہ جملے دراصل مسلمانوں کے کسی خادم حرمین شریفین کے منہ سے نہیں بلکہ مادی ترقی کو ایمانی عقیدہ سے بالا تر جان لینے والاسرمایہ بول رہا ہے۔

18 نومبر2025 کو سعودی ولی عہد محمد بن سلمان نے امریکی صدر ڈانلڈ ٹرمپ سے ملاقات میں ’ابراہم اکارڈ‘ کا حصہ بننے کو اس بنیاد پر ’ٹال ‘دیا کہ پہلے فلسطینی زمین پر اسرائیل کو بننے کا رستہ بنایا جائے اسکے بعد ہم ابراہم معاہدہ میں شامل ہوسکیں گے ۔یہ عالمی سیاست میں انتہائی تاریخی اہمیت کا بیانیہ ہے مطلب چت اورپٹ دونوں صورتوں میں قبلہ اول کی سرزمین کاہی نقصان ہونا ہے۔

اپنے 8سالہ دور میں سعودی ولی عہد کا یہ پہلا دورہ امریکہ انتہائی اہمیت کا حامل ہے ۔ ٹرمپ نے ولی عہد کا فوجی فلائی اوور ، امریکی میرین بینڈ کی گرج چمک کے ساتھ مکمل سرکاری اعزاز کے ساتھ استقبال کیا۔

یہ تعلق ایک طرفہ نہیں بلکہ صدر ٹرمپ نے شہزادہ محمد کا خیرمقدم کرتے ہوئے انہیں اپنا ’دوست اور غیر معمولی وژن رکھنے والا شخص‘ قرار دیا۔ امریکی صدر نے سعودی عرب کو نیٹو سے باہر امریکہ کا اہم اتحادی قرار دیا اور سعودیوں کی تعریف کرتے ہوئے کہا کہ وہ بہترین مذاکرات کار ہیں۔

ٹرمپ نے سعودی عرب کے کہنے پرسوڈان میں بھی جنگ بندی کرانے کا اشارہ دے دیا۔صدر ڈونلڈ ٹرمپ نے کہا کہ وہ سوڈان میں جنگ رکوانے پر "کام" شروع کریں گے۔

ڈانلڈ ٹرمپ مئی 2025 میں سعودی عرب، قطر اور متحدہ عرب امارات کے پہلے غیر ملکی دورے میں سعودی عرب کی جانب سے 600 بلین ڈالر کی سرمایہ کاری کا وعدہ کرواکر آئے تھے۔اب سعودی عرب کے ولی عہد امریکہ پہنچ گئے جبکہ ستمبر 2025 میں سعودی عرب نے پاکستان کے ساتھ سیکیورٹی اور دفاع کا معاہدہ کیاتھا۔

ٹرمپ ملاقات ایجنڈے میں امریکہ-سعودی

سیکورٹی تعلقات،
ہتھیاروں کے سودے،
تجارت ،
سرمایہ کاری اور
ٹرمپ کی طرف سے سعودی عرب کو ’ابراہم اکارڈ‘ میں شمولیت کی دعوت شامل تھی۔
شہزادہ محمد بن سلمان نے یہ بھی کہا کہ امریکہ کے ساتھ سرمایہ کاری کو 600 ارب سے بڑھا کر دس کھرب ڈالر تک کرنے کا اعلان کیا جائے گا۔

صدر ٹرمپ کے ایجنڈے میں عرب و دیگر ممالک کے اسرائیل کے ساتھ تعلقات کو معمول پر لانے کی خواہش بہت نمایاں مقام رکھتی ہے۔مگر اس دورے کے تبصرہ نگاروں کا کہنا ہے کہ

سعودیوں نے واضح کردیاکہ وہ اس وقت تک اسرائیل سے تعلقات کو معمول پر نہیں لائیں گے جب تک اسرائیل فلسطینیوں کے ساتھ حقیقی امن عمل کی پیروی نہیں کرتا۔

ایسی صورتحال شام کے ساتھ بھی ہوئی جب ٹرمپ نے شام کے عبوری صدر احمد الشرع کو اسرائیل کے ساتھ امن معاہدے پر دستخط کرنے کے لیے تیار کیا۔مگر شام نے صاف منع کر دیا کہ جب تک اسرائیل دسمبر 2024 میں بشار الاسد کی حکومت کے خاتمے کے بعد نئی قبضہ کیے گئے شامی علاقے نہیں چھوڑے گا کوئی معاہدہ نہیں ہوگا۔

اربوں ڈالر کا یہ معاہدہ مبینہ طور پر 48 جیٹ طیاروں کا ہے اور سعودی عرب کو جدید ہتھیاروں کا مالک بننے والا پہلا عرب ملک بنا دے گا۔لیڈ مینوفیکچرر لاک ہیڈ مارٹن کے مطابق، ایک F-35A جیٹ کی اوسط قیمت $82.5m ہے۔سعودی عرب کی امریکہ میں سیکڑوں بلین ڈالر کی سرمایہ کاری ہے اور توقع ہے کہ اس دورے میں مصنوعی ذہانت اور سویلین نیوکلیئر توانائی میں مزید اعلانات کیے جائیں گے۔