شعور نیوز( ویب ڈیسک):کراچی کے علاقے خیابان اتحاد صبا سگنل پر ایک امیر زادے بنام اصغر بھنگوار نے اپنی گاڑی کو قابو میں نہ رکھتے ہوئے ، سڑک پار کھڑے فوڈ ڈلیوری بوائے کو کچل دیا۔اس خوفناک حادثے میں کچلا جانے والا فوڈ ڈیلیوری رائیڈر زندگی کی بازی ہار گیا۔اہلِ خانہ اسپتال پہنچے اور میت کو آبائی علاقے ٹھٹھہ لے گئے۔ ان کا ابتدائی بیان تھا کہ تدفین کے بعد قانونی کارروائی کی جائے گی۔پولیس کے مطابق جس گاڑی سے حادثہ پیش آیا وہ اصغر علی بھنگوار کے نام پر ہے، جو تاحال مفرور ہے اور اس کی تلاش جاری ہے۔حادثہ کے وقت بنائی گئی وڈیو میں دیکھا جا سکتا ہے کہ قاتل لڑکا اپنے کسی ساتھی دوست کے ساتھ ڈالے میں بیٹھ کر فرار ہوگیا۔

ڈیفنس میں تیز رفتاری کے باعث اس سے پہلے بھی کئی موٹر سائیکل فوڈ ڈلیوری افراد کچلے جا چکے ہیں۔

ڈیفنس حادثے میں فوڈ پانڈا رائیڈر کے جاں بحق ہونے کے واقعے پر اسسٹنٹ کمشنر ہاضم بھنگوار کا موقف بھی سامنے آیا،جس میں انہوں نے قاتل سے نام کی مماثلت کو اتفاق ظاہر کیا اور بتایا کہ اُن کا کوئی بھتیجا یا بھانجا نہیں ہے ۔مقامی نیوز چینل کے مطابق گاڑی پر سرکاری نمبر پلیٹ کے ساتھ عدالتی مونوگرام والی پلیٹ تھی۔پولیس کی طرف سے کوئی قانونی کارروائی عمل میں نہیں لائی گئی ۔ پولیس نے بتایا کہ اہل خانہ نے لکھ کر دیا ہے کہ وہ اللہ کی رضا کی خاطر قاتل کو معاف کرتے ہیں۔
سرمایہ دارانہ نظام میں طاقت و سرمایہ کا ہی راج ہوتا ہے ،طاقتور اسی طرح ہر جرم کرکے با آسانی بچ نکلتے ہیں۔ دیت کے قانون کے باوجود ریاستی قوانین توڑنے پر بھی سزا بنتی ہے ، لیکن مستقل ایسے امیر زادوں کو کھلی چھوٹ دینے کے نتیجے میں مسائل بڑھتے جائیں گے۔