شعور نیوز( ویب ڈیسک):مریدکے سے لاشوں کی دستیابی کا سلسلہ مکمل ہونے سے قبل ہی لاہور میں وزیر اعلیٰ پنجاب مریم نواز کی سرپرستی میں باقی عوام کو سفاکی سے قتل کرانے کا سلسلہ شروع ہوگیا۔بسنت کے سرکاری ایام سے قبل ہی پتنگ کی ڈورنے 2 انسانوں کو کاٹ ڈالا۔2سالہ زینب فاطمہ کو گردن پر شدید زخم آئے ، انہیں جناح اسپتال منتقل کیا گیا جہاں طویل سرجری کے بعد معصوم بچی کی زندگی بچا لی گئی ۔گرین ٹاؤن میں اویس نامی نوجوان کے گلے پر شدید کٹ لگا، جس پر ٹانکے لگائے گئے اور فی الحال جان بچالی گئی ۔

پنجاب میں بسنت موسم بہار کی آمد پر خوشی کے اظہار کا تہوار ہے ۔ تاریخی طور پر پنجاب کے ایک ظالم و متعصب حکمران رنجیت سنگھ نے اس میں پتنگ بازی کو شامل کرایا۔ اس کا اول آخر سادہ مقصد پھولوں کے موسم کے مصداق آسمان کو رنگوں سے بکھیرنا کہا جا سکتا ہے ۔استعمار کے بعد یہ عمل سرمایہ دارانہ نظم میں شامل ہوا تو مقابلے کی صورت اختیار کرگیا کیونکہ سرمایہ دارانہ نظم میں حرص و ہوس ، حسد، آگے نکلنے کی دوڑ کلیدی ہوتی ہے۔اس لیے اس بے ضرر سے کام نے انسانی جانوں سے کھیلنا شروع کر دیا ۔ دھاگوں کو شیشے یا دھات کی کوٹنگ کے ساتھ استعمال کیا جانے لگاتاکہ مقابلے میں پتنگ کی ڈور کاٹنے سے ’ غلیظ اقدار ‘کو تسکین ملے ۔ ’بو کاٹا ‘ کے عنوان سے گانے بننے لگے اور پتنگ کاٹناایک خطرناک نفسیاتی غلبہ کے اثر سے جڑتا چلا گیا۔کسی کی جان جاتی ہے تو جائے میری پتنگ اڑنی چاہیے۔

لاہور میں بسنت کا اتار چڑھاؤ:

2001 سے پنجاب میں بسنت پر پابندی کا سلسلہ شروع ہوا۔2005–2007 کے دوران یہ پابندی قانونی شکل میں تبدیل ہو گئی۔پنجاب حکومت نے 2007 میں رسمی نوٹیفکیشن جاری کیا جس سے بسنت اور اس کی مرکزی سرگرمی پتنگ بازی پر مکمل پابندی نافذ ہوگئی۔سینکڑوں افراد ہلاک و زخمی ہورہے تھے۔
پابندی کے باوجود 2009 کی بسنت کے دوران 139 زخمیوں کی نشاندہی ہوئی ، جن میں گردن کے زخم، فریکچر اور دیگر شدید چوٹیں شامل تھیں۔
2024 میں بھی لاہوری اور دیگر شہروں میں کئی افراد موت یا گہری چوٹوں کی شکار ہوئے۔
2025 میں پنجاب اسمبلی نے بسنت کو سخت قواعد کے ساتھ منظم کرنے کا قانون پاس کیا ہے جس میں صرف مخصوص دنوں اور مخصوص مقامات پر محفوظ پتنگ بازی کی اجازت دی جائے گی، اور خطرناک ڈور یا دھاگوں پر سخت پابندی رکھی جائے گی۔

سیاسی اور سرمایہ دارانہ ’ ترقی‘ کے تناظر میں بسنت کا بحران

بسنت جیسے تہذیبی جشن کو ایک منافع بخش سرگرمی اور ’ترقی‘ کا حصہ بنانے کی پالیسی نے حقیقتاً اس روایت کے انسانی اور سماجی نقصان کو نظرانداز کر دیا ہے۔

بسنت کی مقبولیت اور جشن کو سیاحتی، تجارتی اور تفریحی صنعت کے طور پر فروغ دیا گیا ، محض آسمان کو رنگین کاغذوں سے مزین کرنا کافی نہیں تھا۔

اس نے خطرناک پیمانوں اور سخت ڈوروں کی خرید و فروخت کو فروغ دیا، کیونکہ مسابقت میں ’ زیادہ ڈور کاٹنے‘ کو کامیابی سمجھا جانے لگا۔

موجودہ حکومتی اور تجارتی پالیسیوں نے معاشی ترقی اور تفریحی مواقع کو انسانی زندگی سے بالاتر رکھا ہے، آپ نوٹ کرلیں کہ ہر قسم کے پابندی کے باوجود آپ کو لاہور میں خونی واقعات کی ترتیب نظر آئیگی۔ یہاں سفاک حکومت کی رٹ از خود غائب ہوجاتی ہے۔
یہی سرمایہ دارانہ سوچ ہے جو تعطیلات، تہواروں اور رسومات کو تفریحی مارکیٹنگ اور تجارت میں بدل دیتی ہے، اور انسانی وجود کے تحفظ کو ثانوی بنا دیتی ہے ، جبکہ اس تہذیب میں انسان بطور ہیومن کلیدی کہا جاتا ہے۔