شعور نیوز( ویب ڈیسک):سال 2025 کے 11 ماہ میں کراچی کے گٹر اور نالوں میں 5بچوں سمیت 24 افراد کے مرنے کا ریکارڈ سامنے آیا ہے ۔اس کے علاوہ 11افراد زخمی ہوئے ۔زندہ کے حادثاتی طور پر گرنے علاوہ کئی قتل شدہ انسانوں کی لاشیں اور اعضا بھی گٹر و نالوں سے ملتے رہے ہیں۔

انسانی غفلت کوحادثات کا عنوان دے کرسیکولر ریاست میں اس طرح سے انسانی جانوں کا ضیاع معمول کی بات ہوتی ہے ۔امریکہ و برطانیہ میں بھی کھلے مین ہول میں لوگوں کے مرنے کے واقعات ہوتے رہے ہیں البتہ تعداد کراچی سے کم رہی ہے، لیکن وہاں حکومتیں اور کورٹ اپنے قانون کے مطابق لاکھوں کے سخت جرمانے لگاتی ہیں اور معافی بھی منگواتی ہیں۔

پاکستان میں اتفاق سے پیپلز پارٹی کی سندھ حکومت اپنے 16 سالہ ریکارڈ میں کرپشن کا عنوان بن چکی ہے کیونکہ اس دوران 16 بجٹ میں اربوں روپے وہ استعمال کر چکی ہے اور شہر کی صورتحال سب کے سامنے ہے۔

یکم دسمبر 2025کوبھی کراچی کے علاقے گلشن اقبال میں ایک شاپنگ سینٹر کے باہر کھلے نالے میں کم سن بچہ گر کر جاں بحق ہوگیا ، جس کےبعد یہ معاملہ دوبارہ ذرائع ابلاغ میں اُٹھ گیا۔ کراچی میں سڑک پر ٹینکر کے ذریعہ بھی اموات اور سڑک پر قائم گٹر و نالوں کے ذریعہ اموات کا سلسلہ ہر کچھ دن بعد اٹھتا رہتاہے۔

اہم بات یہ ہے کہ اس سب معاملے میں موت کے ذمہ دار کا تعین مشکل ہوجاتا ہے ۔ ایک سیاسی جماعت شہر کے میئر کو قاتل قرار دے کر میدان میں اتر آئی ہے۔ حکمران جماعت کہہ رہی ہے کہ نالے کو نہ ڈھکنے والے ذمہ دار ملازمین کو سزا دیں گے ،تحقیقات کر رہے ہیں۔ایک سیاسی جماعت نے سندھ اسمبلی میں واک آؤٹ کردیا۔ احتجاجی مظاہرہ بھی منعقدہوگیا ، لیکن ظاہر ہے کہ یہ سب سیاست ہے۔اس لیے قاتل گٹر و نالے کا impersonal عنوان ہی معلق رہے گا۔

کراچی کی ایک تنظیم چھیپا کے مطابق رواں برس شہر کے مختلف علاقوں میں گٹر میں گر کر 13 افراد جاں بحق ہوئے۔پیدل کے علاوہ موٹر سائیکل سوار کے بھی گٹر میں گرکر جاں بحق ہونے کے واقعات اس میں شامل ہیں۔ گرومندر چورنگی کے قریب چلتے ہوئے گٹر میں گرکر 45 سالہ عباس ولد نقوی جاں بحق ہوا ۔ سلطان آباد حبیب پبلک اسکول کے قریب تین دن پرانی گٹر سے ڈوبی ہوئی ایک نوجوان 15 سالہ ابوبکر ولد دلدار کی لاش ملی۔ لانڈھی مرتضیٰ چورنگی کے قریب کام کے دوران گٹر میں گرکر 50 سالہ اقبال مسیح ،گھاس منڈی محمدی گراؤنڈ ڈھاکہ ہوٹل کے قریب گٹر میں گر کر تین افراد 19 ساحر ولد خورشید ،43 سالہ جورج اور 22 سالہ وشال ولد جورج ،جمشید روڈ ایک نمبر پی ایس او پمپ کے قریب گٹر میں گرکر 5 سالہ بچہ علی ولد عظیم ،بلدیہ مواچھ گوٹھ نور شاہ محلہ کے قریب گٹر میں گرکر 3 سالہ بچہ عبدالرحمن ولد محمد کابل ، سرجانی حسن بروہی گوٹھ کے قریب گٹر میں گرکر 3 سالہ بچہ اسد اللہ ولد فیصل ، شاہ فیصل دو نمبر شادی ہال کے قریب گٹر میں گرکر 4 سالہ بچہ جبکہ سپرہائی وے کوئٹہ بس اڈا کے قریب گٹر میں گرکر دو افراد جاں بحق ہوئے۔چھیپا حکام کے مطابق رواں برس نالے میں گر کر 11 افراد جاں بحق ہوئے۔ ماڑی پور دعاہوٹل کے قریب نالے سے تین دن پرانی ایک 55 سالہ شخص کی لاش ملی۔گھاس منڈی جمیلہ واٹر بورڈ کے قریب نالے میں گرکر 35 سالہ شخص جاں بحق ہوا۔ ماڑی پور نالہ اسٹاپ کے قریب نالے سے ڈوبی ہوئی ایک شخص لاش برآمد ہوئی جس کی شناخت 38 سالہ الطاف ولد نور محمد کے نام سے ہوئی۔ بنارس عباسی ہوٹل کے قریب نالے سے 40 سالہ شخص کی لاش ملی۔ نارتھ ناظم آباد لنڈی کوتل چورنگی کے قریب نالے میں گرکر دو افراد جاں بحق ہوئے جن کی شناخت 25 طفیل ولد ردی گل اور 27 سالہ غفار کے نام سے ہوئی۔کورنگی سیکٹر 51C قبرستان کے قریب نالے میں ڈوب کر 28 سالہ رضوان ولد سیفی جاں بحق ہوا۔ملیر کالا بورڈ کے قریب 59 سالہ موٹر سائیکل سوار نالے میں گر کر جاں بحق ہوا۔ نیپا چورنگی کے قریب نالے میں گر کر 55 سالہ شخص جاں بحق ہوا۔ نیپا چورنگی چیز اپ کے قریب نالے میں گر کر 3 سالہ ابراہیم ولد نبیل اور کورنگی ڈھائی نمبر کے قریب نالے میں گر کر 30 سالہ شخص جاں بحق ہوا۔