شعور نیوز( انٹرنیشنل ڈیسک): دنیا میں کوئی 2 ارب مسلمانوں کے دلوں کو تکلیف پہنچانے والی تصویر سے متعلق پہلی غیر سرکاری وضاحت آگئی۔سعودی عرب سے چلنے والے ’انسائڈ حرمین‘ نامی آن لائن ڈجیٹل نیوز میڈیا نے یہ اہم وضاحت جاری کی ہے۔

دو فروری 2026سے سوشل میڈیا پر ایک تصویر اور کچھ ای میل کی دستاویز وائرل ہو رہی تھیں جس میں یہ بتایا گیا کہ کسی امارتی خاتون نے غلاف کعبہ بطور تحفہ ملعون ایپسٹین کو بھجوایا۔جیفری ایپسٹین کا جو تعارف دنیا بھر میں عام ہوا ہے وہ ایک شیطان صفت درندے کا ہے جو ایک صیہونی خفیہ ادارے کا آلہ کار تھا ۔

سعودی نیوز ویب سائٹ کے اندرونی ماہرین کے جائزے کی بنیاد پر، انہوں نے ملعون ایپسٹین کی وائرل تصویر کو حقیقی کعبہ کسوہ کی تصدیق شدہ تصویر کے طور پر قبول نہیں کیا۔یہ کام انہوں نے اصل غلاف کے پیمانے و پیمائش ، ڈیزائن ، خاکہ، سرحدیں، اور کسوہ کے مستند حوالہ جات سے چیک کرکے کیا ۔اُن کے مطابق جب تک کوئی واضح دلیل اور ثبوت نہ ہو، اس تصویر کو ثبوت کے طور پر نہ سمجھا جائے۔

ماہرین کے مطابق، تصویر میں دکھائے گئے کپڑے کی لمبائی اور چوڑائی اصلی کسوہ کے ساتھ مطابقت نہیں رکھتی۔ اصل کسوہ کے بڑے پینلز میں عام طور پر سات سے آٹھ افراد کے ساتھ اسے پکڑنا یا حرکت دینا ممکن ہوتا ہے، جبکہ وائرل تصویر میں کپڑا اتنا چھوٹا لگتا ہے کہ صرف تین یا چار افراد اسے سنبھال سکتے ہیں۔

مزیدبرآں، کپڑے کا وزن اور ساخت بھی اصلی غلافِ کعبہ یا کسوہ سے مختلف نظر آتی ہے۔ اصل کسوہ بھاری اور مضبوط ہوتا ہے، جس کی وجہ سے یہ زمین پر ایسے ہلکے اور نرم اندا زمیں مڑ نہیں سکتا، جیسے وائرل تصویر میں دکھائی دے رہا ہے۔ ماہرین نے کہا کہ اصلی کسوہ کی موٹائی اور کڑھائی اسے خاص ساخت اور شکل دیتی ہے جو اس تصویر میں موجودنہیں ہے۔

اُن کے مطابق تصویر میں کسوہ کی کنٹراسٹ اور آؤٹ لائننگ بھی اصلی کسوہ سے مطابقت نہیں رکھتی۔ اصلی کسوہ میں سیاہ رنگ کے فریم اور نقش واضح ہوتے ہیں، جبکہ وائرل تصویر میں یہ فرق بہت کم یا غیر واضح ہے۔ کناروں اور بارڈر کی ساخت بھی اصلی کسوہ کے مطابق نہیں ہے۔

ماہرین نے کسوہ کے مختلف نمونوں، کناروں اور گول مدالین کی تفصیل کا جائزہ لیا اور پایا کہ وائرل تصویر میں یہ نمونے اصلی کسوہ کے مطابق نہیں ہیں۔ اگرچہ نقلی کسوہ دیکھنے میں اصل کی طرح لگ سکتی ہے، لیکن نمونوں، بارڈرز اور مدالین کی جگہ پر فرق سب سے واضح نشانی ہے کہ یہ اصلی نہیں ہے۔

انسائیڈ دی حرمین کا کہنا ہے کہ یہ ان کی ذمہ داری ہے کہ مقدس چیزوں کے بارے میں ثبوت اورتصدیق کے بغیر کوئی دعویٰ نہ کیا جائے۔ وائرل تصویر کو اصل کعبہ کی کسوہ قرار دینا
درست نہیں۔ تصویر کی سچائی کے بارے میں کوئی حتمی دعویٰ صرف واضح ثبوت کے بعد کیاجا سکتا ہے۔

اُن کے ماہرین نے آخر میں دعا کی کہ اللہ تعالیٰ ہمیں سچائی، صبر اور احتیاط عطا فرمائے اور ہمیں ایسی باتیں پھیلانے سے بچائے جو ہمیں معلوم نہ ہوں۔

انسائڈ حرمین ایک نجی ادارہ ہے جو 2013 میں قائم کیا گیاتھا۔ 8دن ہو چکے ہیں ، نہ ہی امارات کی طر ف سے اور نہ ہی سعودی حکومت کی طرف سے ایسی کوئی سرکاری تصدیق یا تردید جاری ہوئی ہے۔ ابھی تک اُن خواتین جن کا ذکر ملعون ایپسٹین کی فائل میں ہے اُن پر بھی خاموشی ہے ۔ یہ مزید انتہائی معانی خیز اور تشویش ناک صورتحال ہے ۔