شعور نیوز( ویب ڈیسک): حکومت پاکستان 2025 میں 9 کھرب کے سودی قرضہ لینے کے بعد بھی مہنگائی کم نہیں کر پا رہی ۔وزیر خزانہ محمد اورنگزیب نے قومی اسمبلی کو بتایا ہے کہ 2025کے دوارن سرکاری قرضے میں9.3 کھرب روپے کا اضافہ ہوا۔ سب جانتے ہیں کہ اتنا قرض لینے کے باوجود عوام کو کوئی ریلیف نہیں مل سکا اس لیے کہ سرمایہ دارانہ نظام مستقل عوام کا خون نچوڑ تا رہتا ہے ۔

صورتحال یہ ہو چکی ہے کہ پاکستان جیسے زرعی ملک میں غذا سمجھ کر استعمال کی جانے والی چینی کی زیادہ سےزیادہ فی کلو قیمت229 روپے تک پہنچ گئی ہے۔16 دن میں حکومت نے پیٹرولیم مصنوعات پر 11 روپے کا اضافہ کرڈالا۔یکم جون سے اب تک پیٹرول اور ڈیزل کی مجموعی قیمتوں میں بالترتیب تقریباً 12 روپے 50 پیسے اور 23 روپے فی لیٹر اضافہ ہو چکا ہے۔
ٹیکس شرح کی بنیاد پر ہائی اسپیڈ ڈیزل (ایچ ایس ڈی) کی ایکس ڈپو قیمت میں 16 نومبر 2025 سے تقریباً 9 روپے 50 پیسے فی لیٹر (یعنی تقریباً 3.4 فیصد) اضافے کا امکان ہے، جبکہ پیٹرول کی قیمت میں تقریباً 2 روپے فی لیٹر یا 0.7 فیصد کمی کا امکان ہے، یہ وہی اضافہ ہے جو یکم نومبر کو بڑھایا گیا تھا۔

اسی طرح پشاور میں کاربن سے بھری چینی 200 روپے کلو تک پہنچ چکا ہے۔کراچی ،اسلام آباد میں 195، راولپنڈی میں 190روپے کلو ۔ کوئٹہ کے شہری سب سے مہنگی چینی خریدنے پرمجبور ہیں۔پاکستان کے موقر اخبار میں شائع رپورٹ کے مطابق گذشتہ ایک ہفتےمیں کوئٹہ میں چینی کی فی کلو قیمت میں19 روپےتک کا اضافہ ہوا،کوئٹہ میں چینی کی فی کلو قیمت210 روپےسے بڑھ کر229 روپے تک ہوگئی ۔

پاکستان میں سودی نظام کے اہم مرکز اسٹیٹ بینک آف پاکستان ( ایس بی پی) نے اکتوبر 2025میں مانیٹری پالیسی کا اعلان کرتے ہوئے ، بنیادی شرح سود 11 فیصد پر برقرار رکھنے کا فیصلہ کیا ہوا ہے۔اس اعلان کے ساتھ گورنر اسٹیٹ بینک جمیل احمد نے آئندہ مہینوں میں مہنگائی میں کمی کا امکان بھی ظاہر کیا ۔اُن کے مطابق پاکستان میں مجموعی معاشی استحکام آ چکا ہے اور سرمایہ کاری و اقتصادی ترقی کیلئے سازگار ماحول بھی تیار ہے۔

پاکستان بیورو آف شماریات کے مطابق ملک میں ہفتہ وار مہنگائی کی شرح 4.15 فیصد ہوگئی،15اشیائے ضروریہ کی قیمتوں میں اضافہ ہوا ہے ،گزشتہ ہفتے کے مقابلےمیں مہنگائی کی شرح میں 0.53فیصد اضافہ ہواہے ۔

ستمبر میں برساتی سیلاب کی آڑ لیکرمہنگائی کا سیلاب مسلط کیا گیا لیکن نومبر میں بھی یہی صورتحال ہے ، کوئی موسمی سبزی 200 روپے کلو سے کم دستیاب نہیں، پیاز 150 روپے کلو پر پہنچی ہوئی ہے۔گندم کا آٹا 150 روپے کلو تک پہنچ چکا ہے۔گھی تیل کی قیمتیں 575 روپے کلو تک جا چکی ہیں۔

اندھا دھند مہنگائی کا سلسلہ جاری ہے ، غریب ایسی صورحال میں غریب تر اور امیر امیر سے امیر تر ہوتا چلا جاتا ہے۔ سرمایہ دارانہ نظام کی یہ کلیدی پوزیشن ہوتی ہے کہ نظام سود میں جکڑ کر مہنگائی کو بنیاد بنایا جائے تاکہ لوگ مستقل اپنی ضروریات کی تکمیل میں تگ و دو کریں جس سے استحصالی معاشی پہیہ مستقل اچھی طرح گھومتا رہے۔