شعورنیوز( انٹرنیشنل ڈیسک):امریکہ کے دو سب سے بڑے پبلک اسکول نظاموں نے تقریباً 10 لاکھ بچوں کی AI تک تعلیمی رسائی محدود کرنے کا اعلان کر دیاہے۔نیویارک سٹی میں تقریباً 6 لاکھ اور لاس اینجیلیس میں تقریباً 3 لاکھ 78 ہزار طلبہ اس پالیسی سے متاثر ہوں گے ۔

نیویارک سٹی کے میئر زہران ممدانی اور اسکول چانسلر کمار سیموئلز نے 2 ستمبر کو یہ باضابطہ اعلان کیا ہے کہ 2026-27 کے تعلیمی سال کے دوران 2-K سے آٹھویں جماعت تک کے طلبہ کو AI سافٹ ویئر اور چیٹ بوٹس استعمال کرنے کی اجازت نہیں ہوگی۔ لاس اینجیلس کے ضلعی اسکول سسٹم نے بھی نیو یارک کے اعلان کے بعد اس پالیسی کا اعلان کردیا ۔

انتظامیہ نے صرف ChatGPT یا Gemini جیسے معروف چیٹ بوٹس ہی نہیں بلکہ ایسے 38 سے زائد تعلیمی پروگراموں کے AI اجزا بھی بند کرنے کا فیصلہ کیا ہے جو پہلے اسکولوں میں استعمال ہورہے تھے مگر نئی حفاظتی اور تعلیمی شرائط پر پورے نہیں اترتے۔

نیو یارک مئیر کا کہنا ہے کہ بچوں کو سوال کا جواب مشین سے حاصل کرنے کے بجائے خود سوچنے، غلطی کرنے، سوال کرنے اور مسئلہ حل کرنے کی ذہنی مشقت سے گزرنا چاہیے۔ بچے کا ذہن اس وقت تشکیل پاتا ہے جب وہ سوال کرتا ہے، کتاب پڑھتا ہے، استاد سے بحث کرتا ہے، ساتھیوں کے ساتھ اختلاف کرتا ہے، مسئلہ حل کرنے کی کوشش کرتا ہے اور ناکامی کے بعد دوبارہ کوشش کرتا ہے۔AI اگر ان تمام مراحل کو چند سیکنڈ میں مکمل کردے تو طالب علم کو جواب تو مل سکتا ہے، مگر جواب تک پہنچنے کی ذہنی صلاحیت کمزور پڑنے کا خطرہ پیدا ہوتا ہے۔اسی لیے نیویارک نے ایک سال کا وقفہ نافذ کرکے پورے نظام کا جائزہ لینے کا فیصلہ کیا ہے۔

دنیا بھر میں ٹیکنالوجی کمپنیوں اور AI صنعت کی طرف سے یہ تاثر دیا جارہا ہے کہ AI کے بغیر آنے والی نسل پیچھے رہ جائے گی،لیکن امریکہ کے دو سب سے بڑے اسکول نظام کا عملی فیصلہ اس دعوے پر سوال اٹھا رہا ہے۔

نیویارک سٹی نے ہائی اسکول طلبہ کے لیے یہ پابندی ابھی عائد نہیں کی گئی ۔ ہائی اسکول طلبہ کو سال میں دو مرتبہ AI literacy بھی پڑھائی جائے گی، جس میں AI کے خطرات، تعصب، غلط معلومات، اخلاقی مسائل اور ضرورت سے زیادہ انحصار جیسے موضوعات شامل ہوں گے۔

اساتذہ کو تدریسی و تکنیکی منصوبہ بندی یا انتظامی کاموں ،نتائج بنانے وغیرہ کے لیے AI استعمال کرنے کی اجازت برقرار رکھی گئی ہے۔

یہ پہلی مرتبہ نہیں کہ نیویارک سٹی نے تعلیمی AI کے سامنے بریک لگائی ہے۔ChatGPT کے آغاز کے فوراً بعد 2022 میں نیویارک سٹی کے اسکولوں نے اسے عارضی طور پر بلاک کردیا تھا۔ بعد میں پابندی ختم کی گئی اور Microsoft کے تعاون سے ایک مخصوص AI teaching assistant بھی متعارف کرایا گیا۔ اب تقریباً چار سال بعد شہر ایک بار پھر پیچھے ہٹ کر یہ جائزہ لے رہا ہے کہ آخر کلاس روم میں AI کا حقیقی فائدہ کتنا ہے اور اس کی قیمت کیا ہے۔

وہ ٹیکنالوجی جو انسان سے سوچنے، لکھنے، تحقیق کرنے، یاد رکھنے، سوال کرنے اور مسئلہ حل کرنے کی تخلیقی ذمہ داری لے لے، وہ سہولت سے آگے بڑھ کر انسانی وجود کو ہی خطرے میں ڈال دے گی۔