شعور نیوز( انٹرنیشنل ڈیسک): اٹلی کے شہر میلان میں جاری سرمائی اولمپکس 2026کے خلاف ایک بڑا عوامی احتجاجی مارچ نکالا گیا۔ مظاہرین شروع میں پُرامن نعرے لگاتے، گاتے اور ہاتھوں میں ہاتھ ڈال کر مارچ کرتے رہے۔ شام ڈھلتے ہی صورتحال کشیدہ ہوگئی اور ایک مقام پر احتجاج پولیس کے ساتھ جھڑپوں میں بدل گیاپولیس نے اپنے ملک کے عوام پر آنسو گیس اور واٹر کینن کا خوب استعمال کیا۔

اٹلی کی وزیر اعظم جارجیا میلونی نے سوشل میڈیا پوسٹ میں مظاہرین کو "اٹلی اور اطالویوں کا دشمن" قرار دیا کیونکہ اتنے بڑے عالمی ایونٹ کے موقع پر دنیا کی ایک طاقتور یورپی قوت کے ملک میں ایسا احتجاج ہونا سخت بدنامی ہے۔

احتجاج میں شامل فلسطین نواز گروہوں کی موجودگی نے اس واقعے کو وسیع تر عالمی سیاسی تناظر سے بھی جوڑ دیا۔ یورپ میں فلسطین کے حق میں آواز بلند کرنے والی تحریکیں پچھلے برسوں میں زیادہ نمایاں ہوئی ہیں، اور قابض اسرائیل کی پالیسیوں کے خلاف عوامی غصہ مختلف سماجی تحریکوں میں جگہ بنا رہا ہے۔ اس احتجاج میں بھی فلسطین کے حق میں اظہارِ یکجہتی نے یہ اشارہ دیا کہ عالمی سطح پر سیاسی و اخلاقی سوالات اب کھیلوں کے میدان تک بھی پہنچ چکے ہیں۔

اہم بات یہ ہے کہ احتجاج ’اَن سسٹین ایبل اولمپکس کمیٹی‘ کی جانب سے منظم کیا گیا تھا جس میں ماحولیاتی کارکن، طلبہ، مزدور تنظیمیں، رہائشی حقوق کے گروہ، کھیلوں کی مقامی انجمنوں کے ساتھ فلسطین کے حامی نیٹ ورکس بھی اپنے اپنے مدعے لے کر شامل تھے۔

ماحولیاتی کمیٹی کا مؤقف ہے کہ اولمپکس کے لیے تعمیراتی منصوبے ماحول کو نقصان پہنچا رہے ہیں، جبکہ اس کے معاشی اور سماجی اثرات عام شہریوں پر بوجھ بن رہے ہیں۔ انہوں نے حکومت کی سخت سکیورٹی پالیسیوں اور نسلی اقلیتوں کے ساتھ رویے پر بھی تنقید کی۔

یہ وہ سرمایہ دارانہ تنقید ہے جو کھیلوں کے نام پر اس ’اولمپکس‘ سے پیدا ہوتی ہے ، عام آدمی ان اہم چیزوں کو نظر انداز کرتا ہے اور کھیلوں کو نیوٹرل سمجھتا ہے ، جبکہ ایسا کچھ نہیں ہوتا۔عالمی کھیلوں کے بڑے مقابلے اب صرف کھیل نہیں رہے بلکہ ایک وسیع سرمایہ دارانہ ماڈل کا حصہ بن چکے ہیں، جہاں انفراسٹرکچر، اسپانسرشپ اور تشہیر کے نام پر اربوں ڈالر خرچ ہوتے ہیں، مگر مقامی آبادی کو ماحولیاتی دباؤ، مہنگائی اور سماجی بے دخلی جیسے مسائل کا سامنا کرنا پڑتا ہے۔ اسی تناظر میں احتجاج کو بعض حلقے ایسے نظام کے خلاف علامتی ضرب کے طور پر دیکھ رہے ہیں جو کھیل کو بھی منافع کے دائرے میں لے آیا ہے۔

اولمپکس 22 فروری تک جاری رہیں گے ، امکان یہ ہے کہ اٹلی کی حکومت اب کوئی سخت ایکشن لےگی ۔ اسی دوران شمالی اٹلی کے شہر بولونیا میں ریلوے لائنوں کو نقصان پہنچنے کے واقعات سامنے آئے، جن میں بجلی کی تاریں کاٹی گئیں اور ایک ابتدائی نوعیت کا دھماکہ خیز آلہ بھی ملا۔ حکام نے اسے ممکنہ تخریب کاری قرار دیا اور تحقیقات شروع کر دیں۔