شعور نیوز( انٹرنیشنل ڈیسک):برطانیہ میں فلسطین کے حوالے سے غیر معمولی پیش رفت ہوئی ہے ۔برطانیہ کے دارالحکومت لندن میں فلسطینی ریاست کا پہلا سرکاری سفارتخانہ باقاعدہ کھول دیا گیاہے۔ 2018 سے برطانیہ میں فلسطین مشن کی سربراہی کرنے والے حُسام زملط کو پہلا سفیر تعین کیا گیا ہے۔برطانیہ میں فلسطینی سفیر نے کہا ہے کہ لندن میں ریاست کے سفارت خانے کا افتتاح اس بات کا ثبوت ہے کہ ہماری شناخت سے انکار نہیں کیا جا سکتا۔

یہ فلسطینیوں کے لیے ایک تاریخی اور جذباتی لمحہ اور طویل قربانیوں بھری جدوجہد کا ایک اہم سنگ میل ہے ۔ گزشتہ سال ستمبر میں برطانیہ کی جانب سے اقوام متحدہ میں فلسطینی ریاست کو باضابطہ تسلیم کرنے کے نتیجے میں یہ اقدام اٹھایاگیا ہے ۔واضح رہے کہ برطانیہ ہی وہ ملک تھا جس نے اسرائیل کا جبری قبضے سے قیام کرایا تھا۔ ا

سفارتخانے کی افتتاحی تقریب میں فلسطینی سفیر حسام زملط نے نئی تختی کی نقاب کشائی کی اور کہا کہ یہ صرف نام کی تبدیلی نہیں بلکہ فلسطینی ریاست کی طرف ایک نئی سمت کا آغاز ہے۔ انہوں نے اسے "فلسطینی عوام کی ایک صدی کی جدوجہد کا نتیجہ" قرار دیا ۔

مقبوضہ فلسطین کی حکومت پر قابض محمود عباس کی فلسطینی اتھارٹی کو اس میں بطور حکمران جگہ دی گئی ہے یعنی حماس کی سیاسی قوت کو فی الحال مائنس کیا گیا ہے۔

کچھ لوگ برطانیہ کے اس سفارتخانے والے عمل کو 2 ریاستی حل کی طرف پیش قدمی کہہ رہے ہیں۔یعنی بچا ہوا چھوٹا سا فلسطین ایک اور قبضہ شدہ بڑا سا اسرائیل دونوں ریاست مان لیے جائیں ۔

رائٹرز کے مطابق برطانوی حکام کی موجودگی میں اس افتتاح کی تقریب کو "امید کا لمحہ" قرار دیا گیا، جو برطانیہ اور فلسطین کے تعلقات میں ایک نئی باب کا آغاز ہوگی، ہزاروں فلسطینی طلبہ و طالبات یہاں پڑھ بھی رہے ہیں ۔اسرائیل نے اس اقدام کو شدید تنقید کا نشانہ بنایا ہے کیونکہ وہ بھی ایک انچ زمین بھی فلسطین کو نہیں دینا چاہتا۔ عملی طور پر یہ سفارتخانہ فلسطینیوں کے لیے اہم ہے، کیونکہ یہ ان کی خود مختاری اور بین الاقوامی تسلیم کی طرف ایک ٹھوس پیشرفت ہے۔

تاہم، اسرائیل کے ردعمل سے مشرق وسطیٰ میں تناؤ بڑھ سکتا ہے، مذاکرات مزید پیچیدہ ہو سکتے ہیں اور اسرائیل۔برطانیہ تعلقات پر اثر پڑ سکتا ہے۔ ماہرین کا کہنا ہے کہ یہ اقدام دو ریاستی حل کو زندہ رکھنے کی کوشش ہے، لیکن غزہ میں جاری کشیدگی اور سیز فائر کی نازک صورتحال میں امن کے امکانات اب بھی دور نظر آتے ہیں۔ اصل بات یہی ہے کہ دنیا پر طاقت کی حکمرانی ہے۔ مسلمان اپنا تصور طاقت جہاد کی صورت پس پشت ڈال چکے ہیں تو فرمان نبویﷺ کی روشنی میں مجموعی ذلت مقدر بنی ہوئی ہے ۔