شعورنیوز( ویب ڈیسک):سندھ حکومت کے محکمہ کالجز نے بالآخر تسلیم کرلیا کہ جدیدیت سے زخمی شدہ جسم کا مرہم مذہب اور اس کی اقدار ہی ہیں ۔ محکمہ تعلیم سندھ نے کراچی کے گورنمنٹ گرلز کالجز میں فوٹو گرافی پر مکمل پابندی عائد کرتے ہوئے خبردار کیا ہے کہ کسی بھی خلاف ورزی پر تادیبی یا قانونی کارروائی کی جاسکتی ہے۔

سرکاری نوٹیفکیشن کے مطابق کالج کے پرنسپلز کو باضابطہ طور پر اس فیصلے سے آگاہ کر دیا گیا ہے اور پابندی کو سختی سے نافذ کرنے کی ہدایت کی گئی ہے۔ یہ اقدام سندھ کے اسپیشل سیکریٹری برائے کالجز کی جانب سے جاری کردہ ایک ایڈوائزری کے بعد کیا گیا ہے جس کی بنیاد پر کالج ایجوکیشن کراچی کے علاقائی ڈائریکٹر نے شہر کے تمام سرکاری کالجوں کو باضابطہ خطوط بھیجے ہیں۔

نوٹیفکیشن میں کہا گیا کہ سوشل میڈیا پلیٹ فارمز پر طالبات کی تصاویر کا غلط استعمال کیا گیا جو کہ سماجی اور مذہبی اقدار کے ساتھ ساتھ موجودہ قوانین کی سنگین خلاف ورزی ہے۔

سب جانتے ہیں کہ خواتین کی تصاویر سوشل میڈیا پر جا کر اے آئی سے مل کر جو تباہی مچا رہی ہیں اس کا ازالہ خودکشی سے لیکر کئی اور بھیانک شکلوں میں ظاہر ہوتا ہے۔ سائبر کرائم کے عنوان سے جرائم کی ایک نئی شاخ جنم لے چکی ہے ۔ صرف نا محرم خواتین کی تصاویر سے اتنے ہولناک ،خطرناک، ذلت آمیز جرائم ہوتے ہیں جو ناقابل بیان ہیں۔

جدیدیت کے پیدا شدہ مظاہر میں ٹیکنالوجی بڑا نمایاں مظہر ہے ، جسے ابتدا میں انتہائی جبر سے نافذکیا گیا ،بعد ازاں آسانی ، سہولت ، تعلیم اور مشقت کے خاتمے کے نام پر درجہ قبولیت پر لے جایا گیا۔ یہ تمام اشیا ایک ’بے خدا نظریہ حیات ‘سے پیدا شدہ تھیں اس لیے ان میں کوئی ایسی اخلاقی قدر نہیں تھی جس سے کسی کا ایمان ،عقیدہ محفوظ رہ سکے ، یوں پہلے مغرب میں مذہب کا نام و نشان جڑوں سے مٹ گیا اور ایک بے خدا سرمایہ دارانہ اخلاقیات نے اس کی جگہ لے لی ، پھر مسلم معاشرت میں یہ تباہی پھیلنا شروع ہوئی اور ابھی تک جاری ہے ۔