شعور نیوز( ویب ڈیسک): پنجاب کے شہر گوجرہ میں اذان سے قبل درود و سلام پڑھنے پر امام مسجد کے خلاف مقدمہ درج کرلیا گیا۔ اس مقدمے کی اطلاع پھیلتے ہیں ملک بھر میں ریاست کا زبردست خوف و سناٹا طاری ہوگیا۔سوشل میڈیا پر کچھ نے ہمت کرکے دَبے دَبے لفظوں میں رد عمل دینے کی ہمت کی۔ ایسے میں کروڑوں درود پڑھنے والوں میں سے ایک غیرت مند وکیل نے اس مقدمے کو ختم نہ کرنے کے خلاف بڑی ہمت دکھائی۔

سابق صدر بار ایسوسی ایشن گوجرہ توقیر اشرف خان ایڈووکیٹ نے ڈی ایس پی کے دفتر کے سامنے مسجد میں جا کر دورود و سلام پڑھا ، وڈیو بنوائی اورباقیوں کو بھی ہمت کرنے کا پیغام دےدیا۔اشرف خان نے مقامی ڈی ایس پی کو مخاطب کرتے ہوئے کہا کہ درود و سلام پر مقدمہ کرنا ہے تو کیجیے میں پڑھ رہا ہوں وہ بھی بغیر وقت اذان کے ۔

اہم بات یہ ہے کہ تین دن قبل فیصل آباد میں ضمنی الیکشن کےدوران مساجد میں ووٹروں کو باہر نکالنے کےلیے اعلانات ہوتے رہے جو کہ مکمل غیر قانونی تھے، مگر
مساجد میں درود و سلام پڑھنے پر مقدمات درج ہو رہے ہیں۔وکلاء نے مطابق قانون اذان سے قبل یا بعد میں درود شریف اسپیکر میں پڑھنے کی اجازت دیتا ہے۔

پنجاب حکومت تیزی سے سیکولرائزیشن کی پالیسی پر گامزن ہے۔ مذہب بیزاری، دین بیزاری سے آگے بڑھ کر دین کو محض انفرادی مذہبی عمل تک محدود کرنے کو ہی سیکولرائزیشن کہتے ہیں۔

امریکہ ہی نہیں عالمی ورلڈ آرڈر کی صاف ہدایات ہیں کہ ترقی کے لیے ہر قسم کی مذہبیات کو ترک کرنا ہوگا۔ عورت کی حکمرانی میں یہ کام پوری قوت سے کرنا یوں بھی آسان ہوجاتا ہے کہ اُس حکمرانی کی کوئی شرعی حیثیت نہیں ہوتی۔ ملک کی سب سے بڑی دینی جماعت کے خلاف خونی کریک ڈاؤن کے بعد حکومت کی ہمت مزید بڑھ گئی اس لیے صوبے بھر کی مساجد کے آئمہ کرام کو 25 ہزار روپے میں اپنے تابع کرنے کے بعد اب قانون میں موجود درود و سلام کی کم ترین اجازت پر بھی ہاتھ صاف کرنے کی تیاری نظر آچکی ہے۔ استعمار کی ریاستی انکروچمنٹ کا بالکل یہی تاریخی طریقہ کار رہا ہے۔
پاکستان کے ایک با عمل دین دار جرأتمند عالم دین فرماتے تھے کہ ’’بات مسجدوں کے سپیکروں تک نہیں رہنی ۔جو جو خاموش ہیں وہ بھی ظالموں کے ساتھی ہیں اس جرم میں شامل ہیں۔‘‘

مسجد میں اذان سے پہلے درود و سلام پڑھنا صدیوں پرانی سنتِ صالحین ہے۔

سلطان صلاح الدین ایوبی کے دور میں باقاعدہ طور پر مساجد میں درود شریف کی آوازیں بلند ہونا شروع ہوئیں۔
تاریخی حوالہ:
مشہور شافعی مؤرخ امام ابن خلکان (وفات 681ھ) اپنی کتاب وفیات الاعیان میں لکھتے ہیں کہ:
سلطان صلاح الدین ایوبی کے زمانے میں مساجد کے مؤذن اذان سے کچھ پہلے رسول اللہ ﷺ پر درود و سلام پڑھنے لگے تاکہ لوگوں کو نماز کی طرف رغبت ہو اور دلوں میں عشقِ رسول ﷺ کی حرارت تازہ ہو۔
اسی طرح علامہ سخاوی اپنی کتاب القول البدیع فی الصلاۃ علی الحبیب الشفیع میں متعدد علاقوں کا ذکر کرتے ہوئے لکھتے ہیں:
بلادِ شام، مصر اور حجاز میں صدیوں سے مؤذنین اذان سے پہلے صلوٰۃ و سلام پڑھتے آئے ہیں اور علماء نے اسے حسنِ نیت اور محبتِ رسول ﷺ کے باعث پسندیدہ قرار دیا ہے۔
فقہی تائید:
امام نووی (شرح المہذب)
امام جلال الدین سیوطی (الحاوی للفتاوی)
علامہ ابن حجر مکی (الفتاوی الکبریٰ)
علامہ احمد صاوی (حاشیۃ الصاوی علی الجلالین)
اعلی حضرت امام احمد رضا خان (فتاوی رضویہ)