شعور نیوز( انٹرنیشنل ڈیسک):بھارتی پنجاب کے لاء کالج میں ایک طالب علم نے کلاس میں اپنی ساتھی طالبہ کو گولی مارنے کے بعد خودکشی کرلی۔ کلاس میں لگے سی سی ٹی وی کی فوٹیج سوشل میڈیا پر وائرل ہورہی ہے۔ قتل کرنے کا عمل مزید شیطانی صورت اختیار کرکے ’نارملائز‘ ہوگا۔ یہ لڑکا ’محبت کا ہیرو‘ اور کالج میں ’غیرت‘ کی علامت اور ’2026 کا مجنوں ‘کہلائیگا، یہ آئیڈیلائزیشن عالمی سطح پر پھیلے گی اورمزید جانیں لے گی۔

تفصیلات کے مطابق بھارت کے صوبہ پنجاب کے ضلع ترن تارن میں واقع ایک لا کالج میں پیر کی صبح یہ قتل اور خودکشی کا واقعہ پیش آیا۔فرسٹ ایئر کے ایک طالب علم نے کلاس روم کے اندر اپنے بیگ سے پستول نکالی اوراپنی ساتھی طالبہ کو گولی مار کر قتل کردیا، اس کے اگلے ہی سیکنڈ اس نے خود پر بھی فائر کرکے اپنی جان لے لی۔قاتل لڑکے کا نام ’پرنس راج‘ تھا جبکہ لڑکی کا نام سندیپ کور بتایا جا رہا ہے ۔ دونوں پہلے سال کے طالب علم تھے جن کی عمریں 19-20 سال کے اندر تھیں۔کیمپس میں نصب سی سی ٹی وی کیمروں میں قتل اور خودکشی کا یہ پورا منظر محفوظ ہوگیا اور سوشل میڈیا پر وائرل ہے۔طالب علم کے اسلحہ لے کر کالج آنے پر بھی سوال ہو رہے ہیں۔ قاتل لڑکا بھارتی پنجاب کے ضلع ترن تارن میں ملیان گاؤں کا رہنے والا تھا جبکہ لڑکی دوسرے گاؤں کی تھی۔
بھارتی میڈیا کی رپورٹ کے مطابق ، جب لڑکی نے قاتل کو یہ بتایا کہ اُس کی منگنی طے ہو چکی ہے تو یہ سننے کے بعد ہی سارا واقعہ ہوا۔ دونوں کے والدین کی طرف سے ابھی تک کوئی بات سامنے نہیں آئی ہے تاہم مخلوط ماحول میں اس طرح کے واقعات کا ہونا ایک لازمی نتیجہ ہے ۔

انڈیا کے نیشنل کرائم ریکارڈز بیورو (NCRB) کے 2022 کے اعداد و شمار کے مطابق تقریباً 13,000 طلبہ نے خودکشی کی تھی، جو ملک بھر کی کل خودکشیوں کا ایک بڑا حصہ بنتا ہے۔

بھارت کی صورتحال یہ ہے کہ

جس فلمی ماحول میں بچوں کی پرورش ہوگی،
جو تعلیمی نظام بالکل ویسے ہی فلمی عشق کے مواقع فراہم کرے گا،
جینے مرنے کی عشقیہ داستانوں کو جس طرح انڈیلا جائیگا
سارے ہیروز اور آئیڈیلز کسی لڑکی سے ہونے والی محبت سے پیدا ہوں گے
تصور غیرت کسی انسان میں باقی ہو گا
تو نتائج اس خود کشی یا قتل سے الگ کیوں نکلیں گے؟

سرمایہ دارانہ نظام تعلیم میں کوئی اخلاقی قدر نہیں ہوتی ،یہ لبرل یعنی نفس پرستی پر کھڑا ہوتا ہے ۔ اس لیے آپ وہاں ڈاکٹری ، انجینئرنگ، قانون کی ڈگری لینے آئیں یا اسکول کا ماحول ہو وہ آپ کو کبھی بھی ایسی کوئی اخلاقیات نہیں سکھائے گا یا پروان چڑھائے گا جو آپ کے اپنے مذہب ، خاندان، خدا، قبیلے سے جوڑتی ہو۔