شعور نیوز( انٹرنیشنل ڈیسک): دنیا کے سب سے زیادہ ترقی یافتہ ملک سوئٹزرلینڈ کے شراب خانے میں نئے سال کی تقریب کے دوران شدید دھماکہ سے آگ لگ گئی ۔اس آگ سے شراب خانے میں موجود تقریباً 40 سے زائد گاہگ شرابی اور شراب خانے کے خدمتگار ہلاک ہوگئے ۔میڈیا ذرائع کے مطابق تقریباً 100 سے زائد ابھی زخمی ہیں۔ آگ اتنی خوفناک تھی کہ لاشیں مسخ ہو چکی ہیں اور شناخت مشکل ہو رہی ہے۔واقعہ رات کے ڈیڑھ بجے کے قریب ہوا جس کے بارے میں کوئی تفصیلات نہیں مل رہیں۔یہ سوئٹزرلینڈ کا مہنگا اور معروف سیاحتی ریزورٹ تھا، اس لیے یہاں ایلیٹ کلاس کے افراد ہی شراب پینے آتے تھے۔جدید ترقی و ٹیکنالوجی سے مزین پولیس اور تحقیقاتی ادارے کئی گھنٹے گزرنے کے بعد بھی دھماکے کی وجہ نہیں سمجھ سکے اس لیے ڈیڑھ سو شرابیوں کو متاثر کرنے والے دھماکے کو ’دہشتگردی‘ کے دائرے سے نکال دیا ہے۔

پاکستان کے وزیر اعظم نے بھی ایسے شرابیوں کے مرنے پر دکھ کا اظہار ٹوئیٹ میں کیا ہے۔ ٹوئٹر پر آگ لگنے سے قبل کی آنے والی کچھ وڈیوز میں یہ دیکھا جا سکتاہے کہ لوگ حالت نشہ میں موسیقی و آتش بازی کے کاموں میں مگن تھے۔

اس شراب خانے میں کئی ممالک کے لوگ موجود تھے۔زخمیوں کی تعداد اتنی زیادہ تھی کہ مقامی ہسپتال میں انتہائی نگہداشت کا یونٹ اور آپریٹنگ تھیٹر میں جگہ ہی ختم ہوگئیں۔ہیلی کاپٹر اور ایمبولینس متاثرین کی مدد کے لیے جائے وقوعہ پر پہنچ گئی تھیں۔سوئٹزرلینڈ کی مقامی شہری میونسپلٹی نے اپنی ویب سائٹ پر خشک سالی کی وجہ سے نئے سال کی شام آتش بازی پر پابندی لگا ئی تھی۔ خشک سالی کے حالات میں معمولی چنگاری سے بھی بڑی آگ بھڑک جاتی ہے ۔

2022 کے مقامی ڈیٹا کے مطابق سوئٹزرلینڈ اتنا ترقی کر چکا ہے کہ وہاں 83 فیصد شرابی شمار کیے جاتے ہیں۔سال نو یا دیگر مواقع پر یہ شرح مزید بڑھ جاتی ہے۔

سوئٹزرلینڈ کی ترقی کی ایک اور رفتار نوٹ کرلیں۔ 1970 میں وہاں 1 فیصد ملحد تھے ،2024 کے ڈیٹا کے مطابق وہاں 34 فیصد ملحدین موجو دہیں۔ان میں 42 فیصد نوجوان نسل ہے یعنی 25-34 سال کی عمر کے افراد ۔

یہ واقعہ اس تلخ حقیقت کی یاد دہانی ہے کہ سرمایہ دارانہ نظام میں ترقی کا معیار انسان کی اخلاقی، روحانی اور اجتماعی سلامتی نہیں بلکہ محض لذت، منافع اور انفرادی آزادی کو بنا دیا گیا ہے۔ جدید ٹیکنالوجی، مضبوط ریاستی ادارے اور بلند معیارِ زندگی کے باوجود انسان نہ تو محفوظ ہو سکا اور نہ ہی مطمئن۔
سرمایہ دارانہ معاشرہ انسان کو ایک کنزیومر میں بدل دیتا ہے، جہاں خوشی شراب، پارٹی، جسمانی لذت اور وقتی ہیجان سے وابستہ کر دی جاتی ہے۔ نتیجتاً اجتماعی نظم، اخلاقی حدود اور انسانی جان کی حرمت ثانوی حیثیت اختیار کر لیتی ہے۔