شعور نیوز( ویب ڈیسک): پاکستانی میڈیا نے رمضان میں شیطانی پیسوں کی مدد سے شیطانی کھیل جاری ہیں۔ غزہ میں مسلمانوں کے قتل عام میں مددگار اداروں سے پیسے لیکر ٹی وی شوز میں فتنہ پھیلانے کا سلسلہ جاری ہے ۔ ایک جانب انٹرٹینمنٹ کے نام پر عریانی و فحاشی کا سیلاب ہے تو دوسری جانب نیوز چینل کے نام پر مکروہ و غلیظ دھندا جاری ہے جسے عرف عام میں’مرغوں کی لڑائی‘ کہا جاتا ہے۔

نیو ٹی وی نے بھی رمضان نشریات میں متنازعہ موضوعات کو زیر بحث لا کر وہی کام انجام دیا ہے۔ مخالف نظریات کے مہمانوں کو بٹھا کر ریٹنگ اور ویوز لینے کے لیے دین اسلام کو ہی نقصان پہنچانے کا سلسلہ جاری ہے۔

22 فروری کو ہونے والی نشریات میں نا محرم مرد خواتین کو ساتھ بٹھا کرجو نشریات کی جا رہی ہے اسکو اسلام سے جوڑا گیا۔یہی نہیں بلکہ پوری نشریات میں استعماری اور غزہ کے قتل عام میں مددگار ملٹی نیشنل اداروں کے اشتہارات چلتے رہے۔ بات یہاں تک گئی کہ بدنام زمانہ زہریلی امریکی کولڈ ڈرنک کوکا کولا کو اسٹیج پر میزبان نے اپنے ساتھ رکھاہوا تھا۔

اہم بات یہ ہے کہ سب جانتے ہیں کہ دو میں سے ایک مہمان ’ساحل عدیم ‘نہ ہی عالم دین ہے اور نہ ہی اس کی کوئی مستند دینی معلومات ہے بلکہ اس کا تعار ف ہی ماہر نفسیات کے طور پر کرایا گیا ۔ اس کا مطلب یہی ہے کہ ایک ’عالم ‘اور ایک ’غیر عالم ‘ کو کسی دینی موضوع پر بات کرنے کے لیے ساتھ بٹھایا گیا۔

اسکرین، لائیو، کیمرا ڈسکورس کا نقصان یہ ہوا کہ مہمانوں کی کیفیت بھی ’’اسکرین اورینٹڈ‘‘ ہو گئی اور اُنہوں نے ’دین‘ کو چھوڑ کر، اسلام کی نمائندگی کو چھوڑ کر اپنی بات اوپر رکھنے کے لیے ایک دوسرے کی ذاتیات سے ’دین‘ کی ڈیفینیشن مرتب کرنی شروع کردی۔

اس دوران مہمانوں کے درمیان کسی لایعنی موضوع پر ذاتیات پر حملے ہوئے اور تکرار بڑھی جسے الگ سے نکال کر وائرل کیا گیا۔ 58 منٹ کے سیشن میں سے 2 منٹ کی گفتگو کو کاٹ کر اس لیے نکالاگیا کہ لوگ جھگڑے کے مزے لے سکیں ۔ دین کے تعارف سے جڑی دو شخصیات کو بٹھا کر لڑانے کا اصل استعماری مقصد پورا ہوا ، جس کلپ کو سینسر ہونا چاہے تھا اُس کو الگ سے نکال کر پھیلایاگیا۔

سرمایہ دارانہ نظام کی کوئی اقدار نہیں سوائے سرمایہ کے ، اس لیے ٹی وی چینل کے لیے پیسہ ہی سب کچھ ہے، خواہ اس پیسے سے مسلمانوں کا قتل ہو یا قبلہ اول پر امریکی قبضہ مضبوط ہوجائے۔ ایمانیات کو ان امور میں جگہ نہیں دی جاتی۔ یہ اصول پیشہ وارانہ کاموں سے دین کے اصول و احکامات کو باہر نکالنا کہلاتا ہے اس کو سیکولر ازم کہتے ہیں۔