شعور نیوز(انٹرنیشنل ڈیسک): مغربی نظریہ ’پروگریس ‘ تہران کے نلکے بند، ڈیم خالی اور ملک بھر میں خشک سالی کے ہولنا ک عنوان کے ساتھ سامنے آگیا ہے۔آپ تصور کریں کہ پاکستان کے پڑوسی ملک ایران کے دار الحکومت میں پانی ختم ہونے پر پہنچ گیا ہے۔ ایرانی صدر نے بھی شہر کے 1 کروڑ لوگوں کو شہر خالی کرنے کا اشارہ دے دیا۔حکام ایران بھر میں خاص طور پر دارالحکومت تہران میں پینے کا پانی فراہم کرنے کے لیے کوشاں ہیں۔

ایرانی صدر مسعود پیزشکیان نے 14 نومبر کو اپنی تقریر میں بتا دیا کہ،’’اگر اگلے ماہ تک بارش نہ ہوئی تو تہران میں پانی کا راشن دینا پڑے گا اور 1 کروڑ انسانوں کے شہر کو جزوی یا مکمل خالی کرنا پڑ سکتا ہے۔‘‘ مقامی ماہرین کا بھی کہنا ہے کہ اتنے بڑے مرکزی شہر کو خالی کرنا ایک آخری طریقہ ہو گا۔

ایران مسلسل چھٹے سال سے خشک سالی سے نبرد آزما ہے، جب کہ گرمی کی لہروں نے گرمیوں کے دوران درجہ حرارت کو 50 ڈگری سیلسیس (122 ڈگری فارن ہائیٹ) سے اوپر دھکیل دیا تھا۔مجموعی طور پر 19 اور تہران شہر کے پانچوں ڈیم خشکی کے دہانے پر ہیں ۔

موسمیاتی تنظیم نے بتایا ہے کہ ستمبر 2025 پر ختم ہونے والا آبی سال سب سے خشک سال میں سے ایک تھا۔

ایران کے دوسرے بڑے شہر مشہد (آبادی تقریباً 40 لاکھ) کے لیے پانی ذخیرہ کرنے والے ڈیمز میں پانی کی سطح 3٪ سے بھی کم رہ گئی ہے، اور چار میں سے تین ڈیم عملی طور پر نظام سے باہر ہو چکے ہیں۔

پس منظر :

ایرانی ماہر ماحولیات نے 2021 میں بھی ایران کو “واٹر بینکرپٹ” یعنی “پانی کے دیوالیہ پن” کی حالت میں قرار دیا تھا۔ اُن کے مطابق:

ایران سالانہ جتنا پانی استعمال کرتا ہے، اس سے کم پانی اس کے قابلِ تجدید (renewable) ذخائر میں بنتا ہے۔
1979 کے بعد ایران نے ’خوراک میں خودکفالت‘ کو ریاستی عقیدہ بنا یا ، نتیجہ یہ ہوا کہ تقریباً 90٪ میٹھا پانی زراعت پر لگتا رہا ، جبکہ زراعت ملک کے جی ڈی پی کا صرف تقریباً 12٪ اور روزگار کا 14–17٪ حصہ دیتی ہے۔
ایران نے پروگریس ماڈل اپناتے ہوئے خوب ڈیمز بنائے ۔ ان سب ڈیمز نے دریاؤں کا فطری بہاؤ توڑا، جھیلیں اور ویٹ لینڈز خشک کر ڈالے۔اس طرح قحط اور سیلاب دونوں کے لیے قدرتی بفر (buffer) ختم ہو گیا۔ ایران "پانی کے دیوالیہ" کی اُس لائن پر آ کھڑا ہوا جس کے بعد واپسی بہت مشکل ہوتی ہے۔
ماہرین کے مطابق ڈیمز، زراعت کے بعد بے شمار غیر قانونی کنویں اور گہرے ٹیوب ویل کے ذریعہ زیر زمین پانی کو ختم کرنا بھی خشک سالی کی اہم وجہ ہے۔اس کی وجہ سے لینڈ سبسائیڈنس (زمین کا بیٹھ جانا) خصوصاً اصفہان اور سیستان و بلوچستان میں، جہاں زمین اور اکوسسٹم Aqua system مستقل نقصان کا شکار ہو چکے ہیں۔

آج 2025 کا بحران دراصل اسی پرانے ماڈل کا منطقی نتیجہ ہے، کوئی اچانک حادثہ نہیں۔

جڑ کیا ہے؟

مغربی نظریہ ‘Progress’ کبھی بھی نیوٹرل نہیں تھا ۔ظاہری طور پر ایسا لگتا ہے کہ آپ کچھ کر رہے ہیں، کچھ حاصل کر رہے ہیں لیکن جو کچھ آپ کھو رہے ہوتے ہیں جو نقصان ہو رہا ہوتا ہے وہ جب سامنے آتا ہے تو بہت دیر ہو چکی ہوتی ہے۔دنیا نے جس ’ترقی‘ کو کامیابی، طاقت، اور جدیدیت کا معیار بنایا، وہ ساری دنیا کے قدرتی ، فطری ماحولیاتی نظام کو توڑ کر کی گئی ہے اور تباہی اسی کا لازمی نتیجہ ہے۔

ڈیمز، آبی ٹرانسفر اسکیمیں، بھاری صنعت، فل اسٹیل و سیمنٹ والی ترقی سب فوسل فیول پر مبنی وہی گلوبل ماڈل ہیں جس نے پوری دنیا میں

گلوبل وارمنگ کو تیز کیا،
ریجنل موسمیاتی پیٹرن بدل دیے،
اور مقامی سطح پر دریاؤں، جھیلوں اور زیرِ زمین پانی کو ختم کیا۔
خشک سالی کو بڑھاوا دیا ہے۔

ایران اکیلا نہیں

استعمار ی دور نے سوچنے سمجھنے کی ساری صلاحیتیں سلب کرکے سب کو Progressکے پیچھے دوڑا دیا ہے ۔ ان دوڑنے والوں میں پاکستان، سعودی عرب، مصر، لیبیا، عراق وغیرہ مستقل اپنے زیرِ زمین آبی ذخائر بغیر سوچے سمجھے ختم کر رہے ہیں۔

ایران میں آج جو بحران ہے، وہ دراصل گلوبل سسٹم کے اس رویّے کی شدید شکل ہے ، جو پوری دنیا میں پھیلا ہوا ہے۔جغرافیے کے مطابق یہ قدرت رد عمل دے رہی ہے ۔

ایران کی مثال ایک آئینہ ہے:

اگر ہم ترقی کو صرف GDP، بلند عمارات، موٹرویز اور میگا ڈیمز میں دیکھتے رہیں گے،
اگر ہم پانی، مٹی، ہوا اور آنے والی نسلوں کو صرف سستے خام مال (raw material) سمجھتے رہیں گے،

تو کل صرف تہران ہی نہیں، ہر شہر ایسے بحران کے دہانے پر کھڑا ہوگا ۔چاہے وہ کیپ ٹاؤن ہو، کراچی ہو، قاہرہ ہو یا کوئی اور شہر۔

یہ بحران ہمیں یاد دلاتا ہے کہ:

اصل مسئلہ صرف “بارش کم ہونے” کا نہیں،
بلکہ دنیا پر مسلط اس غلیظ سرمایہ دارانہ نظام کا ہے جو تباہی کو ترقی اور استحصال کو کامیابی سمجھتا ہے۔