شعور نیوز(انٹرنیشنل ڈیسک): ایران پر حملوں میں امریکہ ، اسرائیل کے علاوہ جس ملک کی کمی نظر آرہی تھی وہ برطانیہ بھی علانیہ فخر سے ان حملوں میں شامل ہو گیا ہے۔ برطانیہ کے وزیر اعظم کیئر اسٹارمر نے فخر سے اس جنگ میں شمولیت کا عجیب اعلان کردیاہے۔فرانس نے صاف منع کر دیا ہے کہ وہ ایسی کسی جنگ میں شامل نہیں ہوگا۔ڈاؤننگ سٹریٹ میں خطاب کرتے ہوئے، برطانوی وزیر اعظم نے دنیا کو بتایا کہ برطانوی طیارے "آج آسمان پر" مشرق وسطیٰ میں "ہمارے لوگوں، اپنے مفادات اور اپنے اتحادیوں کے تحفظ کے لیے مربوط علاقائی دفاعی کارروائیوں کے حصے کے طور پرموجود" ہیں۔

المیہ یہ ہے کہ ایک جانب برطانیہ اس طرح سے جنگ میں اپنے حصے کا اعلان کر رہا ہے دوسری جانب مسلم ممالک کی طرف سے ایران کے جوابی حملوں پر مذمت کی جا رہی ہے۔ یہود و نصاریٰ کے ساتھی اُن کے ساتھ خوشی سے شامل ہو رہے ہیں جبکہ وہ مسلم ممالک جنہوں نے امریکہ کو اپنی زمینیں دی ہوئی ہیں وہی پریشان ہو رہے ہیں۔

ایران کی جانب سے تین ماہ قبل ہی سب ممالک اور اقوام متحدہ کو بھی مطلع کر دیا گیا تھا کہ وہ اپنی زمین ایران کےخلاف استعمال نہ ہونے دیں اور امریکہ کے تمام اڈوں کو نشانہ بنانے کا اعلان کیا تھا۔سعودی عرب نے خلیجی اور علاقائی خودمختاری کی ایرانی خلاف ورزیوں کی مذمت کی ہے۔
رابطۃ العالمی الاسلامی کے جنرل سیکرٹریٹ کی طرف سے جاری کردہ اعلامیے میں ایرانی جارحیت کی مذمت کی ہے، جو تمام مذہبی اقدار کے ساتھ ساتھ بین الاقوامی اور انسانی قوانین اور سعودی عرب کے واضح اصولوں کی بھی خلاف ورزی ہے۔ اس پورے اعلامیے میں ڈھونڈنے سے بھی ایک بار ایران پر ہونے والے امریکہ ،برطانیہ اور اسرائیل کے حملوں کے خلاف کوئی مذمت موجود نہیں ۔

ایران پر حملے کے بعد تہران نے بھی جواب میں مشرق وسطیٰ میں موجود امریکی اڈوں اور قابض اسرائیل پر خوب میزائل داغ دیے ہیں۔ ایران نے اسرائیل کے خلاف میزائل آپریشن کو ’فتح خیبر‘ کا نام دیا ہے۔