شعور نیوز( انٹرنیشنل ڈیسک): 7 اکتوبر 2023 کے بعد غزہ سے شروع ہونے والی جنگی لہر نے امریکی خزانے پر بھی اربوں ڈالر کا بوجھ ڈالا ہے ۔ ہارورڈ یونیورسٹی کی ماہرِ معاشیات Linda J. Bilmes کے تحقیقی کام کے مطابق، اکتوبر 2023 سے ستمبر 2025 تک امریکہ نے خطے میں فوجی کارروائیوں پر 9.65 سے 12.07 ارب ڈالر خرچ کیے۔اس کے علاوہ قابض اسرائیل کو 21.7 ارب ڈالر کی جنگی امداد بھیجی جو مجموعی طور پر 33.7 ارب ڈالر ی رقم بن جاتی ہے۔

یہ اخراجات محض فضائی حملوں تک محدود نہیں رہے۔ امریکی بحریہ نے بحیرۂ احمر اور خلیجِ عدن میں دو کیریئر اسٹرائیک گروپس تعینات رکھے، ایک ہزار سے زائد فضائی حملے کیے، اور یمن میں حوثی گروپ کے کم لاگت ڈرون حملوں کا مقابلہ کرنے کے لیے مہنگے میزائل سسٹمز استعمال کیے۔

اس دوران ایران کے خلاف کارروائی میں “Operation Midnight Hammer” کے دوران پہلی مرتبہ 30 ہزار پاؤنڈ وزنی “بنکر بسٹر” بم استعمال کیے گئے، جو B-2 اسٹیلتھ بمبار طیاروں سے گرائے گئے — یہ کارروائی عسکری ٹیکنالوجی کی طاقت کا مظاہرہ تو تھی، مگر اس کے سیاسی و اخلاقی سوالات اپنی جگہ قائم ہیں۔

یہ اعداد و شمار ظاہر کرتے ہیں کہ مشرقِ وسطیٰ میں جاری کشیدگی محض جغرافیائی یا سیاسی معاملہ نہیں، بلکہ ایک وسیع مالیاتی و عسکری منصوبہ بھی ہے۔ان اربوں ڈالر کے مقابلے میں انسانی نقصان کہیں زیادہ ہولناک ہے۔غزہ کی دس فیصد سے زائد آبادی یا تو جاں بحق ہو چکی ہے یا زخمی ہو چکی ہے۔غزہ میں کم از کم 52 لاکھ 70 ہزار افراد غزہ اور وسیع تر خطے میں بے گھر ہو چکے ہیں۔یہ اعداد محض شماریات نہیں بلکہ ٹوٹے ہوئے گھر، بکھرے ہوئے خاندان اور کھوئی ہوئی نسلوں کی کہانی ہیں۔

ان اخراجات اور تباہیوں کے تناظر میں ہونے والے بھاری اخراجات پر جو بنیادی سوال جنم لیتا ہے وہ یہی ہے کہ یہ پیسہ کہاں سے واپس ہوگا؟
عالمی سرمایہ دارانہ نظام میں جنگ محض دفاعی ضرورت کے لیے نہیں ہوتی، یہ امریکہ کی سب سے بڑی معاشی صنعت ہے، اسکو مستقل گاہگ چاہیے ۔اسلحہ ساز کمپنیاں منافع کماتی ہیں، بحری بیڑے حرکت میں آتے ہیں، جدید ٹیکنالوجی کا عملی تجربہ ہوتا ہے، اور عالمی منڈیوں میں ہتھیاروں کی مانگ بڑھتی ہے ۔ یہ سارے اسلحے کا ستعمال نئے گاہگ پیدا کرتا ہے۔ یہ قتل عام کرکے وہ بتاتے ہیں کہ دیکھو ہمارے بم کی کار کردگی۔یہ دیکھو ہماری بندوق کی کارکردگی۔ سرمایہ دارانہ ڈھانچے میں ریاستی پالیسی اور عسکری مفادات اکثر منڈی کی حرکیات سے جدا نہیں رہتے۔

جب جنگ معیشت کو متحرک رکھنے کا ذریعہ بن جائے تو امن کی قیمت بڑھ جاتی ہے اور یوں انسان سستا ہو جاتا ہے۔یہ ہے سرمایہ دارانہ نظام کی ایک اور ناقابل تردید ہولناکی ۔