شعور نیوز( انٹرنیشنل ڈیسک): تہران کے جوہری پروگرام پر امریکا اور ایران کے درمیان ہونے والی بات چیت جمعے کے روز تک جاری تھی جسے اگلے ہفتے مزید ہونا تھا ۔اگلے ہی دن امریکہ اسرائیل دونوں نے مل کر پیٹھ میں خنجر کے مصداق ایران پر حملے کر دیئے۔

ایران کے اسلامی انقلابی گارڈ کور (IRGC) کا کہنا ہے کہ اس نے ایران پر امریکہ اسرائیل کے بڑے حملے کے جواب میں خلیج میں امریکی فوجی اڈوں پر میزائل داغے ہیں۔ بحرین، کویت، متحدہ عرب امارات اور قطر میں دھماکے ہوئے۔ حکام نے بتایا کہ متحدہ عرب امارات میں ایرانی میزائل سے ایک شخص مارا گیا ہے۔دھماکوں نے ایرانی دارالحکومت تہران کو ہلا کر رکھ دیا، جہاں لوگوں نے صدارتی محل سمیت ضلع سے دھواں اٹھتے ہوئے دیکھا۔

ایران نے اسرائیل پر میزائلوں کی متعدد لہریں بھی چلائی ہیں، جن میں یروشلم کے آسمان پر دھماکوں کی اطلاع ہے۔ اسرائیل ڈیفنس فورسز (IDF) نے کہا کہ فضائی دفاعی نظام ایران سے داغے گئے "میزائلوں کے بیراج" کو مار گرانے کے لیے کام کر رہا ہے۔

اسرائیلی حکام نے میڈیا کو بتایا کہ ان حملوں میں ایران کے سپریم لیڈر آیت اللہ علی خامنہ ای اور صدر مسعود پیزشکیان سمیت اعلیٰ ایرانی حکومت اور عسکری رہنماؤں کو نشانہ بنایا گیا۔

خیال کیا جا رہا ہے کہ خامنہ ای تہران میں نہیں ہیں اور انہیں محفوظ مقام پر لے جایا گیا ہے جبکہ ایرانی میڈیا رپورٹ کر رہا ہے کہ پیزشکیان محفوظ ہیں۔

امریکی صدر ڈونلڈ ٹرمپ نے اس عزم کا اظہار کیا ہے کہ ایران کے خلاف "بڑے پیمانے پر اور جاری" مہم اس کی فوج کو کچل دے گی، اس کے جوہری پروگرام کو ختم کرے گی اور حکومت میں تبدیلی لائے گی۔ انہوں نے کہا کہ "ہمارا مقصد ایرانی رجیم سے آنے والے خطرات کو ختم کر کے امریکی عوام کا دفاع کرنا ہے، جو کہ بہت سخت اور خوفناک لوگوں کا ایک شیطانی گروہ ہے۔"

اسرائیلی وزیر اعظم بنجمن نیتن یاہو نے کہا کہ ایرانی حکومت کے خلاف "مشترکہ آپریشن" "بہادر ایرانی عوام کے لیے اپنی تقدیر اپنے ہاتھ میں لینے کے حالات پیدا کر سکتا ہے"۔

امریکہ و اسرائیل کا مشترکہ منصوبہ عالم اسلام سے تصور اسلام و مزاحمت کے خاتمے سے تعلق رکھتا ہے۔ ایران ہو افغانستان ہو یا پاکستان جہاں جہاں بھی امریکہ کو مزاحمتی عناصر کسی نام ، کسی عنوان سے نظر آرہےہیں ، اُن سب کو ختم کیا جا رہا ہے۔