شعور نیوز( انٹرنیشنل ڈیسک): امریکن سوسائٹی فار سول انجینئرز کی سال 2025 کی رپورٹ کے مطابق امریکہ میں 39 فیصد بڑی سڑکیں خراب حالت میں جن کی مرمت کے لیے 684 ارب ڈالر کی فنڈنگ درکار ہے۔خستہ حال سڑکوں پر گاڑی چلانے سے اب بھی گاڑی ڈرائیور پر سالانہ $1400 زیادہ خرچ پڑ رہے ہیں۔ امریکہ کی سڑکوں پر مرنے والوں کی تعداد 2023 میں کل 40,990 تھی ۔

امریکی سوسائٹی آف سِول انجینیئرز (ASCE) نے 2025 میں اپنے چار سالہ رپورٹ کارڈ میں امریکہ کی مجموعی انفراسٹرکچر کی کارکردگی کو “C” گریڈ دیا ہے۔ رپورٹ میں 6.8فیصد پلوں کو خستہ حال اور غیر محفوظ قرار دیا گیا ہے۔ ASCE کے مطابق اگلے 10 سال میں تقریباً $3.7 ٹریلین کی سرمایہ کاری کی ضرورت ہے تاکہ تمام نظام ’اچھی حالت ‘میں آئے۔

ہوا بازی یعنی Aviation کو انجینئرز نے D+گریڈ دے کر بتایا ہے کہ

امریکی ہوائی اڈے:
- حد سے زیادہ مصروف ہیں ۔
- اُن کی رن ویز پرانی ہو چکی ہیں ۔
- ناکافی کنٹرول ٹیکنالوجی کی صورتحال درپیش ہے جس کے نتیجے میں تاخیر اور حادثات کے خدشات بڑھ رہے ہیں۔یہ عالمی تجارت اور سیاحت دونوں کے لیے خطرہ ہے۔

ڈانلڈ ٹرمپ نے صدر بننے کے بعد وسیع انفراسٹرکچر پلان کا اعلان ضرور کیا جس میں $1.5 ٹریلین سرمایہ کاری کا وعدہ شامل تھا۔اس منصوبے کے لیے کانگریس نے بجٹ ہی مختص نہیں کیا جس کی وجہ سے اسی سطح پر عملی عمل ممکن نہیں ہوا۔اس دوران اوباما۔ٹرمپ۔ بائیڈن اورپھر ٹرمپ بطور بااختیار امریکی صدر کام کر چکے مگر یہ مسائل مستقل بڑھ رہے ہیں۔ سرمایہ دارانہ نظام پہلے انسانوں کو ترقی کے نام پر ایک ’آئیڈیل ازم ‘کا شکار کرتا ہے پھر جب اسکے تضادات سے مسائل نکل نکل کر آتے ہیں تو جھوٹے وعدے و نعرے لگا کر ٹائم پاس کرتا ہے ۔

یہ ہے امریکہ کے انفرا سٹرکچر اور ترقی کی تازہ صورتحال ،جو عام خبروں میں نمایاں نہیں کی جاتی اور ایسا ’غیر حقیقی‘ نقشہ پیش کیا جاتا ہے جو لوگوں کے اذہان کو مرعوب کرتا ہے۔یہ رپورٹ کسی متعصب انسان نے نہیں بلکہ خود امریکہ کے اپنے اعلیٰ تعلیم یافتہ سول انجینئرز نے بنا کر تحقیق کرکے جاری کی ہے ، ہم نے صرف نقل کی ہے اور ایک ایسی حقیقت بتائی ہے جو آپ کے ذہن میں قائم مرعوبیت کو توڑ سکے۔