شعور نیوز( ویب ڈیسک):اس رمضان سوشل میڈیا پر مختلف یونیورسٹیز کے نام سے ایک نوٹس پھیلایا گیا ہے ۔ اس میں یہ تین نکات لکھے ہیں۔

یہ اطلاع دی جاتی ہے کہ ماہِ مقدس رمضان کے دوران جوڑا (لڑکا اور لڑکی) کی صورت میں اکٹھے کھڑے ہونا سختی سے ممنوع ہے۔
اگر کوئی ایسے جوڑی میں پایا گیا تو ان کا نکاح فوری طور پر کروا دیا جائے گا۔
براہِ کرم یونیورسٹی کے تقدس کا احترام کریں اور غیر ضروری قربت سے گریز کریں۔ آخر میں ایک نوٹ بھی ہے ۔
نوٹ: خلاف ورزی کی صورت میں متعلقہ جوڑا اپنے ولیمہ کے انتظام کا خود ذمہ دار ہوگا۔

سوشل میڈیا پر یہ نوٹس ہمدرد یونیورسٹی ،بحریہ یونیورسٹی اسلام آباد، بہأالدین یونیورسٹی ملتان، آزاد کشمیر یونیورسٹی، عبادت یونیورسٹی، پشاور یونیورسٹی کے ناموں سے بھی جاری کیا گیا۔کسی نے تصدیق کرنے کی زحمت نہیں کی اور بات یہاں تک گئی کہ سوشل میڈیا پر خبروں ، اخباروں میں کالم کی صورت بھی جاری کر دیا گیا ۔

لوگ دو مقاصد سے اس کو شیئر کرتے رہے کہ اس نوٹس پر مفت شادی و نکاح کی سہولت کا فائدہ اٹھانے کی ترغیب دی گئی ہے ۔دوسراقابل توجہ پہلو یہ تھا کہ یہ جعلی خط دراصل یونیورسٹیوں کے اندر لادین، لبرل مخلوط ماحول کے خلاف ایک رد عمل ہے۔یہ صاف طور پر بتا رہا ہے کہ یونیورسٹیوں میں تعلیم تو کیا ہوگی وہاں جو حرکتیں نا محرموں کے درمیان ہو رہی ہوتی ہیں انکا حل یہی ہے کہ ان کو کسی جائز رشتے میں باند ھ دیا جائے ۔

مسلم معاشرت میں رمضان کے مہینے کے تقدس کا معاملہ انتہائی اہمیت کا حامل ہے، اس میں صرف بھوک پیاس نہیں بلکہ پوری معاشرت اسلامی رنگ میں تبدیل ہو جاتی ہے۔ ایسے میں پاکستان کے تعلیمی اداروں خصوصاً نجی یونیورسٹیز میں پڑھنے والے غیرتمند طلبہ کے لیے ایمان کی حفاظت کا معاملہ انتہائی سنگین ہو جاتا ہے۔ لارڈمیکالے کے تیار کردہ مادہ پرستی پر کھڑے لبرل تعلیمی نظام کے تحت بننے والے تعلیمی اداروں میں وہی لا دینی اقدار جھلکتی ہیں جن پر ان کو تیار کیا گیا۔نا محرم مرد وخواتین کے آزادانہ اختلاط کے ساتھ جو ماحول نجی یونیورسٹیز میں ہوتا ہے وہ نہ ایمان محفوظ رکھتا ہے نہ کسی کی عزت و آبرو بچا تا ہے۔اس معاملے میں نہ اساتذہ محفوظ ہوتے ہیں نہ طلبہ و طالبات۔سرمایہ دارانہ نظام میں جھونکنے کے لیے جس قسم کے ادارے درکار ہوتے ہیں ان میں پاکستان کی نجی جامعات ایندھن کا کام انجام دے رہی ہیں۔ جس بھاری سرمایہ کاری سے یہ بنتی ہیں ، اس کو پورا کرنے کے لیے ایسا مخلوط لادینی ماحول دیئے بغیر ان کو کوئی رستہ نظر نہیں آتا۔ دوسری طرف مسلمانوں پر سائنس و اعلیٰ درجے کی مغربی تعلیم نہ حاصل کرنے کا لیبل لگایا جاتا ہے ، مگر یہ نہیں بتایا جاتا کہ ان تعلیمی اداروں میں جو دیا جاتا ہے وہ تعلیم ہوتی ہی نہیں۔ جو اقدار سکھائی جارہی ہیں وہ مسلمان کے براہ راست ایمان پر حملہ آور ہوتی ہیں ایسےمیں وہ جنسی سائنس کے علاوہ کچھ نہیں سیکھ پارہا۔