شعور نیوز( انٹرنیشنل ڈیسک): بر اعظم جنوبی امریکہ کے آزاد ملک ونیزویلا میں من پسند حکومت لانے کے لیے امریکہ نے حملہ کر دیا۔2026 کے تیسرے ہی دن وینزویلا کے دارالحکومت کراکس میں متعدد دھماکوں اور امریکی کارروائی کی خبروں نے ’امن کے دعوے دار‘ کی حقیقت کھول ڈالی۔اس حملے سے پورے خطے میں کشیدگی بھی بڑھ گئی ہے اور عالمی سطح پر زبانی مذمتوں کے رد عمل آنا شروع ہوگئے۔ سب جانتے ہیں کہ ونیزویلا کے تیل کے لیے یہ جنگ مسلط کی گئی ہے ۔ واضح رہے کہ یہ کوئی مذہبی جنگ نہیں بلکہ خالص سیکولر، استعماری اور سرمایہ دارانہ جنگ ہے۔سامنے سامنے تو منشیات کا بہانہ ہے مگر اصل میں ونیزویلا کے تیل ذخائر ہی نشانہ ہیں۔

امریکی صدر ڈونلڈ ٹرمپ نے حملوں کی تصدیق کرتے ہوئے کہا ہے کہ امریکہ نے وینزویلا میں ’فوجی آپریشن‘ کیے ، ونیزویلا کے صدر اور اس کی بیوی کو ملک سے باہرنکال دیا ہے۔وینزویلا کی حکومت نے اسے خودمختاری پر حملہ قرار دے کر بین الاقوامی مذمت کا مطالبہ کیا۔ حملے سے ایک دن قبل ونیزویلا کے صدر نکولس ’مدورو ‘ نے ریاستی ٹی وی پر بیٹھ کر امریکہ سے بات چیت کرنے پر آمادگی کا اعلان کیا تھا۔ ظاہر ہے کہ با ت چیت کے بعد تو حکومت تبدیل نہیں ہو سکتی تھی لیکن امریکہ نے اگلے دن حملے کی کارروائی کر ڈالی۔

ڈرگ کارٹل بیانیہ:

دو ماہ سے امریکہ ’منشیات اسمگلنگ‘ کے خلاف کارروائی کے نام پر سمندر میں کشتیوں پر درجنوں حملے کر چکا تھا ، اور سب کو ونیزویلا کے کھاتے میں ڈال کر حملوں کے جواز کا ماحول بنا رہا تھا۔امریکی موقف یہ ہے کہ ملک کا صدر ’نکولس مدورو‘ ہی منشیات فروشی گرو ہ کا سرغنہ ہے۔ امریکہ اقوامِ متحدہ میں بھی یہ مؤقف دہرا چکا ہے کہ وہ پابندیوں اور دباؤ کے ذریعے ’مدورو حکومت کو ‘وسائل سے محروم کرے گا۔ سب جانتے ہیں کہ امریکہ جب بھی کسی ملک پر حملے کا پلان کرتا ہے تو مختلف بہانے بناتا ہے۔

منشیات۔ کیمیائی ہتھیار۔ اسامہ بن لادن۔ ایٹمی ہتھیار۔ انسانی حقوق۔ نسلی امتیاز۔ وغیرہ

دُنیا کے سامنے خود امریکہ میں ’منشیات‘ کے استعمال، فروخت ، اثرات کی جو تباہ کن صورتحال موجود ہے وہ اُس پر قابو نہیں کر پا رہا ۔صرف الکوحل یعنی شراب کے عادی افراد کا 2024 کا امریکی سرکاری اعداد و شمار 28 ملین ہے مگر شراب کو قانونی قرار دے کر چونکہ پیسہ کمایا جا تا ہے اس لیے یہاں ہر سال پونے دو لاکھ انسانوں کا شراب نوشی سے مرنا پیسوں کے مقابلے میں بے معنی ہوتا ہے۔

خوب سمجھ لیں کہ ، سرمایہ دارانہ نظام میں منشیات ایک ’پروڈکٹ‘ ہوتی ہے، جس کی ڈیمانڈ مستقل بڑھ رہی ہوتی ہے ۔اس میں نفع بھی غیر معمولی ہوتا ہے۔اسکی پیداوار پر خرچ بھی انتہائی کم آتا ہے۔اس کے نتیجے میں پوری اسلحے کی منڈی چلتی ہے کیونکہ یہ سب لوگ پیسہ کما کر اپنے تحفظ کے لیے بڑے پیمانے پر اسلحہ خریدتے ہیں ۔اب یہاں تضاد یہ ہے:

دستیاب نظام ’منڈی‘ کو چلانے کے لیے commodity کے نام پر خوب بیچتا ہے ۔
پھر جب چاہتا ہے اسی commodity کے نتائج کو’سیکیورٹی تھریٹ‘ کہہ کر بیرونی حملوں کا جواز بنا لیتا ہے۔

تیل کا مقدمہ:

ونیزویلا کی سیاسی تاریخ دیکھ کر اصل مقدمہ جو سامنے آیا ہے وہ ’ تیل‘ کا ہے۔

وینزویلا کے پاس دنیا کے بڑے تیل ذخائر موجود ہیں۔OPEC جیسے ادارے کے ڈیٹا سے بھی واضح ہے ۔
اب تیل صرف ایندھن نہیں ہوتا۔ جدید سرمایہ دارانہ ریاستوں کی طاقت، ڈالر، کمپنیوں کا منافع، اور جنگی معیشت کا ستون ہے۔
جب کوئی ملک اپنے تیل پر سخت خودمختاری رکھے، یا بیرونی دباؤ کے سامنے نہ جھکے، تو اسے ’مسئلہ‘ بنا دیا جاتا ہےاور پھر دباؤ کے لیے پابندیاں، سفارتی تنہائی، اور کبھی عسکری کارروائی تک کی راہ ہموار ہوتی ہے۔
یہ کام ونیزویلا کے صدر ’ نکولس مدورو‘ کر رہا تھا، اُس نے اپنے ملک کے لیے تیل کے سودوں میں امریکی نفع کے بجائے اپنے عوام اپنے ملک کو ترجیح میں رکھا۔
امریکہ طویل عرصے تک وینزویلا کا بڑا خریدار رہا،مگر جب وینزویلا نے تیل کو قومی تحویل (nationalization) میں لیااور امریکی تیل کمپنیوں کا اثر ختم کیا تو دونوں کے تعلقات بگڑنا شروع ہوگئے۔امریکہ کو مسئلہ یہ نہیں کہ وینزویلا غریب ہے، مسئلہ یہ ہے کہ وہ تیل پر خودمختار ہے۔
لاطینی امریکہ میں امریکہ کی پرانی پالیسی رہی ہے ’یا تو ہمارے ساتھ رہو، یا مسائل کے لیے تیار ہوجاؤ۔‘
امریکہ نے وینزویلا میں:اقتصادی پابندیاں لگائیں۔مالیاتی نظام بند کیا۔صدر نکولس مدورو کو تسلیم نہیں کیا۔ایک متوازی صدر (Juan Guaidó) کو سپورٹ کیا۔
اس لیے یہ سب تختہ الٹنے کی کلاسک مثالیں ہیں۔
امریکہ اکثر کہتا ہے:ہم انسانی حقوق اور جمہوریت کے لیے پریشان ہیں لیکن:یہ بات سعودی عرب، مصر، قطر، کویت ، قابض اسرائیل پر یہ معیار لاگو نہیں کرتا۔ان سب ممالک میں بھی نہ جمہوریت ہے نہ انسانی حقوق لیکن وہاں کبھی کوئی پابندیاں نہیں لگتیں، کبھی کوئی حملہ نہیں ہوتا۔

اس لیے یہ حقیقت ذہن نشین رکھیں کہ ہیومن رائٹس بھی ایک مغربی استعماری بیانیہ ہے، اصل مسئلہ طاقت اور کنٹرول ہے۔