شعور نیوز( انٹرنیشنل ڈیسک):غزہ کے ساتھ مغربی کنارہ بھی مستقل صیہونیوں کے حملوں کا شکار ہے۔اسرائیلی فوجیوں نے مغربی کنارے میں دو 15 سالہ بچوں کو ہلاک کر دیا ، جبکہ اسرائیل نے انہیں حملہ کرنے کی کوشش کرنے والے "دہشت گرد" قرار دیا ہے۔مختلف علاقوں میں چھاپوں کے دوران 25 مسلمان مشتبہ قرار دے کر گرفتار کرلیے ۔مغربی کنارے میں حالیہ ہفتوں میں صیہونی آبادکاروں کے تشدد میں اضافہ ہوا ہے، جس کی بین الاقوامی مذمت بھی ہوئی ہے ۔

رام اللہ میں مقیم فلسطینی وزارت خارجہ نے تصدیق کی ہے کہ اسرائیلی قبضہ گیروں نے اشتعال انگیزی کے لیے شمال میں دیر استیہ قصبے کے قریب مسجد حجہ حمیدہ کو آگ لگا دی۔یہ بھی مغربی کنارے کی قدیم مساجد میں سے ایک تھی ، جس کی بے حرمتی کرتے ہوئے نذر آتش کیا اور دیوار پر نفرت انگیز جملے لکھ دیئے۔مسجد میں ایک دیوار اور قرآن کے کم از کم تین نسخے اور قالین کے حصے متاثر ہوئے ۔مسجد کے باہر کی دیوار پر، حملہ آوروں نے عبرانی زبان میں "ہم ایوی بلوتھ سے نہیں ڈرتے"، "ہم پھر سے بدلہ لیں گے" اور "مذمت کرتے رہو" جیسے توہین آمیز پیغامات چھوڑے تھے۔

تضاد کی صورتحال یہ ہے اسرائیل کے صدر، فوجی سربراہ نے بھی اپنے قبضہ گیروں کے ایسے حملوں کے خلاف مذمت بھی جاری کی۔

مغربی کنارے پر دو 15 سالہ بچوں کی شہادتیں اس وقت ہوئیں جب اسرائیل کو حماس کے ساتھ جنگ بندی کے معاہدے کے تحت یرغمال بنائے گئے آخری چار میں سے ایک کی لاش ریڈ کراس سےملی ہے۔

حماس نے اپنے بیان میں کہا کہ مسجد کو نقصان پہنچانے ، دیواروں پر نسلی نعروں کی چاکنگ ، مساجد کی حرمت اور مسلمانوں کی شہادت پر صیہونی قبضہ گیروں کے منظم جرائم کی سخت مذمت کی ہے۔