شعور نیوز( انٹرنیشنل ڈیسک):ارب پتی ایلون مسک کی ملکیت والی سوشل میڈیا ایپ ’ایکس (X)‘ نے ایک نئی فیچر متعارف کروائی ہے جس کے تحت صارفین اب کسی بھی اکاؤنٹ کا رجسٹرڈ ملک (Country of Origin) دیکھ سکتے ہیں۔ یہ تبدیلی عالمی سطح پر "ڈیجیٹل شفافیت" کی بڑی پیش رفت قرار دی جارہی ہے، جبکہ اس کے اثرات پاکستان ،بھارت جیسے ممالک میں بھی ظاہر ہونگے۔ خاص طور پر گستاخانہ مواد پھیلانے والے نیٹ ورکس، سیاسی پروپیگنڈہ چلانے والے گروپس اور جعلی شناخت کے ذریعے پاکستان مخالف مہمات میں ملوث اکاؤنٹس پرگرفت ممکن ہو سکےگی۔

سوشل میڈیا کے محققین نے اس حوالے سے کہا ہے کہ مقام کی معلومات کو ورچوئل پرائیویٹ نیٹ ورک (VPNs) کا استعمال کرتے ہوئے تبدیل کیا جا سکتا ہے۔

پاکستان میں حکومت اپنے خلاف نشر ہونے والے مواد کے حوالے سے خاصی پریشان رہتی ہے۔

یہی نہیں بلکہ سوشل میڈیا پر اسلام مخالف کام کرنے والے کئی لوگ بھی اس سے ایک حد تک بے نقاب ہو سکیں گے۔

اس اقدام سے تصور انسانی آزادی اور اُس کی سیکورٹی کے درمیان مزید کشمکش میں بھی اضافہ ہوگا۔لبرل اقدار کے لیے انسانی آزادی اور نجی معلومات کا مقام انتہائی ہے ، جبکہ سیکیورٹی کے نام پر معلومات کا اظہار اُس کی آزادی پر حملہ ہوتا ہے۔

سوشل میڈیا اس وقت سب سے زیادہ جھوٹ، دھوکہ دہی، دجل، فریب ہی نہیں تمام تر اخلاقی گناہوں و جرائم کا مرکز بنا ہوا ہے۔

اس وقت سوشل میڈیا صرف رابطے کا ذریعہ نہیں رہا، یہ ہماری زندگی کا خفیہ ریکارڈ بن چکا ہے۔ ہم جو لکھتے ہیں، دیکھتے ہیں، سنتے ہیں، یہاں تک کہ کس پر زیادہ دیر رکتے ہیں—سب محفوظ ہو رہا ہے۔
سوشل میڈیا کمپنیاں ہماری پسند، نفرت، عقائد، عادتیں اور کمزوریاں تک جانتی ہیں۔یہ پلیٹ فارمز ہماری ہر کلک کو ڈیٹا میں بدل کر بیچ دیتے ہیں، اور ہمیں پتہ بھی نہیں چلتا۔
ہم خود اپنی نگرانی کے لیے وہ تمام معلومات دے دیتے ہیں جو کبھی کسی جاسوس کے پاس نہیں ہوتیں۔آن لائن دنیا میں پرائیویسی کا تصور اب ایک خوبصورت مگر ختم شدہ خواب ہے۔
جس دور میں ہم جیتے ہیں، وہاں انسان آزاد کم اور ڈیٹا پوائنٹ زیادہ ہے۔ہماری گفتگو، تصاویر، مقام، تعلقات—ہر چیز مشینوں کے سامنے ننگی کھڑی ہے۔

ماضی میں ٹویٹر نے کسی کے خلاف ٹرولنگ سے لڑنے کے لیے بھی اقدامات کیے، بشمول غلط معلومات سے لڑنے کے لیے ماہرین کی خدمات حاصل کی تھیں۔ ٹیک کمپنیوں اور مخالفین کے درمیان بلی اور چوہے کا ایک مستقل کھیل ہے جو پتہ لگانے سے بچنے کی کوشش کر رہے ہیں۔

پاکستان میں بڑی تعداد میں ایسے اکاؤنٹس فعال تھے جو:

پاکستانی نام
پاکستانی تصاویر
پاکستانی زبان

استعمال کرتے تھے، مگر ان کی اصل لوکیشن مغربی ممالک، اسرائیل، بھارت، یا خلیجی ریاستوں میں تھی۔

اب اس فیچر کے بعد کئی ایسے پروفائلز بے نقاب ہو رہے ہیں جنہوں نے:

گستاخانہ ٹرینڈز چلائے
مقدسات کے خلاف مہم چلائی
پاکستانی معاشرے میں اشتعال اور انتشار پیدا کیا

ماہرین کہہ رہے ہیں کہ:

"یہ فیچر پاکستان کی مذہبی اور سوشل حساسیت کے تناظر میں بہت اہم ثابت ہوگا، کیونکہ گستاخانہ مواد کے بڑے نیٹ ورکس باہر بیٹھ کر چلائے جاتے تھے۔"