شعور نیوز( انٹرنیشنل ڈیسک): امریکہ کے مرکزی شہر نیو یارک کے نو منتخب میئر زہران ممدانی نے عہدہ سنبھالتے وقت اپنے عہدے کا حلف پڑھتے وقت زبردستی کے اسلامی ٹچ دیتے ہوئے قرآنِ مجید پر ہاتھ رَکھ کر حلف اٹھایا۔امریکہ میں مقیم مسلمانوں کے لیے یہ عمل Mimic Sense کی بدترین مثال بن چکا ہے۔امریکی میڈیا نے اِس عمل کو ’مذہبی تنوع‘ اور ’شمولیت‘ کی علامت قرار دیا۔سادہ لوح افراد اس عمل کو اسلامک ٹچ سمجھ کر بظاہر خوش ہو رہے ہیں۔حقیقت یہ ہے کہ اس عمل نے اتنے بڑے بحران کو دوبارہ کھولا ہے کہ جو ناقابل بیان تضادات رکھتا ہے۔

اس کے حلف کے الفاظ اور اس کے پس منظر نے سنجیدہ مذہبی و فکری حلقوں میں ایک بنیادی تضاد اور حاکمیت خدا کی کلیدی بحث کو جنم دیا ہے۔

میئر کے حلف کے مطابق انہوں نے امریکی آئین، نیویارک اسٹیٹ کے آئین اور نیویارک سٹی کے قوانین کی حمایت اور وفاداری کا اعلان کیا۔

یہ وفاداری وہ ایسے ہی کر دیتا تو بھی مسئلہ ہی تھا لیکن اُس نے عجیب تضاد یہ کھڑا کیا کہ قرآن مجید کو سامنے لے آیا، جوکہ خود اصل میں خدائے وحدہ لا شریک کی حاکمیت کا جامع مسودہ ہے۔یہی وہ نکتہ ہے جہاں قرآن کی تعلیمات اور امریکی ریاستی تصور آمنے سامنے آ کھڑے ہوتے ہیں۔

قرآن پر ہاتھ، مگر وفاداری آئین سے؟

قرآن مجید جس بنیادی اصول پر زور دیتا ہے وہ حاکمیتِ اعلیٰ (Sovereignty) ہے، جس کے مطابق:

’حکم اور اقتدار صرف اللہ کا ہے‘ (یوسف: 40)

اس کے برعکس امریکی آئین میں حاکمیتِ اعلیٰ عوام اور ریاست کو حاصل ہے، جہاں انسان خود قانون بناتا ہے، حلال و حرام طے کرتا ہے اور ریاست کو Sovereign Authority مانا جاتا ہے۔

یہاں بنیادی سوال یہ نہیں کہ زہران نے حلف کیوں اٹھایا، بلکہ سوال یہ ہے کہ:

قرآن پر ہاتھ رکھ کر ایک ایسے آئین کی وفاداری کا اعلان، جو اللہ تعالیٰ کے مقابلے پر خود کو حاکمِ اعلیٰ بتاتا ہے، آخر کس درجے کی فکری مطابقت رکھتا ہے؟

امریکی حلف میں یہ Sovereign کیا ہوتا ہے؟

اس اتھارٹی کو sovereign کہا جاتا ہے:

جو آخری اور بالاتر طاقت ہو۔
جس کے فیصلے پر کوئی بالاتر قانون یا اخلاقی اتھارٹی نہ ہو۔
جو خود قانون بنائے اور خود ہی اس کی تشریح کرے یا کرائے۔

امریکی آئین کے تحت:

ریاست اور عوام Sovereign ہوتے ہیں۔
خدا یا وحی کسی قانونی بالادستی کا ماخذ نہیں۔

یہ تصور براہِ راست قرآنی تعلیم کے خلاف ہے، جہاں:

اللہ ہی Sovereign ہے۔
انسان خلیفہ ہے، قانون ساز نہیں۔

زہران کا عمل: اسلامی شناخت یا زبردستی کا اسلامی ٹچ؟

زہران ممدانی کا قرآن پر حلف لینا بظاہر اسلامی شناخت کا اظہار دکھائی دیتا ہے، مگر یہ عمل:

اسلامی تعلیمات کی کسی طور نمائندگی نہیں ہے۔
بلکہ ایک سیاسی تقریب کو مذہبی علامت سے سجانے کی مکمل غیر اسلامی کوشش ہے۔
اس کا اصل مقصد امریکی لبرل نظام میں قبولیت اور غیر اللہ کی خوشنودی ہے۔

قرآن پر ہاتھ رکھ کر:

سودی نظام
ہم جنس شادی
شراب، جوا
اخلاقی حدود سے آزاد قانون سازی

جیسے نظام کی وفاداری کا اعلان شرمناک عمل ہے۔

مسلمانوں کی خاموشی: غیرت یا نا سمجھی؟

اس پورے معاملے میں سب سے تشویشناک پہلو مسلمانوں کا رویہ ہے۔
ایک بڑی تعداد نے:

اسے اسلامی شناخت سے جوڑا ہے۔
بغیر سوچے سمجھے خوشی کا اظہار کیا۔
بنیادی عقیدے کے تضاد پر سوال کو یکسر رد کردیا۔

یہ رویہ اس بات کی علامت ہے کہ:

مسلمانوں کی ایک بڑی تعداد اب ایمان کو اصول و عقیدہ نہیں، بلکہ محض ایک ایسا شناختی بیج سمجھنے لگی ہے جس کا عملی زندگی سے کوئی تعلق نہیں ہو۔

اسلامی غیرت کا مطلب یہ نہیں کہ ہر اس منظر پر خوشی منائی جائے جہاں قرآن نظر آ جائے، بلکہ غیرت یہ ہے کہ:

قرآن کی تعلیم کو سمجھا جائے۔
نہ کہ اسے سیاسی تقریب میں ڈیکوریشن بنایا جائے۔

اس موقع پر پاکستانی سپریم کورٹ میں 2013 میں طاہر القادری کا مقدمہ قابل توجہ ہے ۔طاہر القادری نے الیکشن کمشن کی تشکیل کے خلاف درخواست دی تھی ،جس کی سماعت کے دوران سپریم کورٹ نے ڈاکٹر طاہر القادری کو کینیڈین شہریت کی دستاویزات پیش کرنے کا حکم دیا ۔ پھر سب کے سامنے کینیڈین شہریت کا حلف پڑھوایا۔

طاہر نے کینیڈین حلف یوں پڑھا کہ ”آج کے روز میں کینیڈا اور اس کی دوسری ملکہ الزبتھ وفاداری اور وابستگی کا حلف اٹھاتا ہوں۔ میں وعدہ کرتا ہوں اپنے ملک کے حقوق اور اس کی آزادی اس کے جمہوری اقدار کی پاسداری کروں گا اور بطور کینیڈین شہری اپنی ذمہ داریاں پوری کروں گا“۔
شہریت کے لیے اس علانیہ وعدے کے بعد طاہر القادری یا کوئی بھی اپنی گردن میں مزید جس کی وفاداری کا طوق ڈالتا رہے ، وہ اضافی طوق وفاداری تو ہوسکتا ہے مگر واحد طوق وفاداری نہیں رہتا۔اسلام کا بنیادی مطالبہ یہی ہے کہ آپ کی تمام تر وفاداری صرف اور صرف اللہ کے لیے ہو۔سپریم کورٹ کے چیف نے صرف دو قسم کی وفاداری دیکھ کر کہاکہ ’’جب انہوں نے کینیڈا کی شہریت حاصل کی ہے جس میں کہا گیا ہے کہ وہ ملک اور ان کے جانشینوں کا وفادار رہوں گا اور اگر کوئی دوسرا ملک ان کے ملک پر حملہ کرے تو اس کے لئے وہ ہتھیار بھی اٹھا سکتے ہیں تو پھر ایسے شخص کو پاکستان کے الیکشن کمیشن پر کیا اعتراض ہو سکتا ہے؟‘‘

ڈاکٹر طاہر القادری کا مؤقف اس پر یہ رہا کہ:

یہ حلف قانونی مجبوری تھا۔
اس کا تعلق عقیدے سے نہیں۔
اور دل کی وفاداری صرف اللہ سے ہے۔

لیکن یہی وہ نکتہ ہے جہاں:

عمل اور دعوے میں تضاد پیدا ہوتا ہے۔

اسلامی تصور میں:

حاکمیت (Sovereignty) صرف اللہ کے لیے ہے، اس کے لیے کوئی 2 روپ نہیں لیے جا سکتے ۔
وفاداری کسی سے بھی ہو وہ سب سے پہلے ’اقرار وفاداری ‘سے ہی مشروط ہوتی ہے۔اقرار سے ہی شروع ہوتی ہے ۔ اقرار کی تکرار پر کھڑی ہوتی ہے۔

اس لیے کسی بھی بہانے کینیڈین سٹیزن شپ کے حلف کے بعد پچھلی از خود ختم ہوجاتی ہے۔

امریکہ کا حلف وفاداری برائے شہریت ، دنیا کے تمام ممالک میں سب سے خطرناک ہے۔