شعور نیوز( ویب ڈیسک):نیشنل سائبر کرائم انویسٹی گیشن ایجنسی نے قائمہ کمیٹی کو بتایا کہ حالیہ دنوں ایک چھاپے میں 6 لاکھ سے زائد فنگر پرنٹس اور بائیو میٹرک ڈیٹا برآمد کیا گیا ہے۔ٹیکنالوجی کے پھیلاؤ کے سبب پاکستان میں بائیو میٹرک ڈیٹا کے غیر قانونی استعمال، بڑھتے ہوئے آن لائن سائبر فراڈز، بینک اکاؤنٹس اور واٹس ایپ ہیکنگ کے حوالے سے لرزہ خیز انکشافات مستقل سامنے آرہے ہیں۔پارلیمنٹ کی قائمہ کمیٹی برائے داخلہ کے حالیہ اجلاس میں حکام نے اعتراف کیا ہے کہ ڈیٹا چوری اور فراڈ میں ٹیلی کام کمپنیوں کے اپنے اہلکار بھی ملوث پائے گئے ہیں۔

اجلاس کے دوران نیشنل سائبر کرائم انویسٹی گیشن ایجنسی (NCCIA) کے حکام نے بریفنگ دیتے ہوئے بتایا کہ ایک حالیہ کارروائی کے دوران ایک خفیہ ٹھکانے پر چھاپہ مار کر 6 لاکھ سے زائد فنگر پرنٹس اور بائیو میٹرک ڈیٹا برآمد کیا گیا ہے، جسے شہریوں کے ساتھ مختلف اقسام کے مالیاتی فراڈز کے لیے استعمال کیا جا رہا تھا۔ کمیٹی کے ارکان حیران تھے کہ ہیکرز اور فراڈیوں کے پاس اس قدر بڑے پیمانے پر شہریوں کے انگوٹھوں کے نشانات اور حساس ڈیٹا کہاں سے پہنچ رہا ہے۔

حکام نے کمیٹی کومزید بتایا کہ نیشنل کرائمز ایجنسی نے فیصل آباد میں ایک بڑی کارروائی کرتے ہوئے ایک ایسے خطرناک ملزم کو گرفتار کیا ہے جس نے ایک خاتون کے بینک اکاؤنٹ سے 33 لاکھ روپے اڑائے تھے۔ ملزم کے قبضے سے 195 فعال موبائل سمز، 16 جدید اسمارٹ فونز،اور 81 مختلف بینکوں کے اے ٹی ایم کارڈز برآمد ہوئے ہیں۔اس موقع پر کمیٹی ممبران نے پی ٹی اے اور موبائل کمپنیوں کی کارکردگی پر سخت سوالات اٹھائے کہ ایک ہی شخص کے نام پر اتنی بڑی تعداد میں سمز کیسے جاری کی جا رہی ہیں۔سوالات کا جواب دیتے ہوئے چیئرمین پاکستان ٹیلی کمیونیکیشن اتھارٹی (PTA) نے انکشاف کیا کہ اتھارٹی اب تک 1 کروڑ 80 لاکھ جعلی سمز بلاک کر چکی ہے جو دوسروں کے ناموں پر دھوکہ دہی سے جاری کی گئی تھیں۔ انہوں نے مزید بتایاکہ ہم نے قوانین کی خلاف ورزی پر ٹیلی کام کمپنیوں پر 4 ارب روپے کا جرمانہ عائد کیا ہے، جس کی وجہ سے وہ ناراض ہیں۔ حقیقت یہ ہے کہ ان ٹیلی کام کمپنیوں اور دیگر اداروں کے اپنے کچھ کالی بھیڑیں اور اہلکار اس ڈیٹا لیک میں ملوث ہیں، جو فراڈیوں کو شہریوں کا ڈیٹا فراہم کرتے ہیں۔اجلاس میں سب سے بڑا انکشاف وزیر مملکت برائے داخلہ طلال چوہدری نے کرتے ہوئے بتایا کہ پاکستان میں اب رینٹ اے بینک اکاؤنٹ (کرائے پر بینک اکاؤنٹ) کا منظم دھندہ چل رہا ہے۔ انہوں نے کہاکہ جس غریب یا سیدھے سادھے بندے کے نام پر اکاؤنٹ کھولا جاتا ہے، اسے پہلے سے علم ہوتا ہے کہ اگر وہ پکڑا گیا تو اسے زیادہ سے زیادہ دو ماہ جیل کاٹنی پڑے گی۔ وہ فراڈیوں سے باقاعدہ ڈیل کرتا ہے اور اپنا طے شدہ حصہ وصول کر کے اپنا اکاؤنٹ جرم کے لیے دے دیتا ہے۔

این سی سی آئی اے (NCCIA) کے حکام نے کمیٹی کو یقین دہانی کرائی کہ وہ ملک میں واٹس ایپ ہیکنگ کے نیٹ ورک کو مکمل طور پر ختم کرنے جا رہے ہیں اور اس سلسلے میں فول پروف سیکیورٹی اقدامات کیے جا رہے ہیں۔ کمیٹی نے پی ٹی اے اور قانون نافذ کرنے والے اداروں کو سائبر کرائمز کے خلاف مزید سخت اور فوری کارروائی کی ہدایت جاری کر دی ۔