جب کائنات کی ابتدا اور اوّلین علت کی بات سامنے آتی ہے تو اس پر ایک معروف اعتراض فوراً پیش کر دیا جاتا ہے، جسے عام طور پر “God of the Gaps” کہا جاتا ہے۔ اس اعتراض کا خلاصہ یہ ہے کہ جہاں انسان کو کسی چیز کی سائنسی توجیہ معلوم نہیں ہوتی، وہاں وہ خدا کو لا کر اس خلا کو پُر کر دیتا ہے۔ چنانچہ یہ کہا جاتا ہے کہ کائنات کی علت کے طور پر خدا کو ماننا علمی کمزوری اور فکری کاہلی کا اظہار ہے۔

بظاہر یہ اعتراض معقول محسوس ہوتا ہے، مگر گہرائی میں دیکھا جائے تو یہ ایک بنیادی غلط فہمی پر قائم ہے۔ اس غلط فہمی کا تعلق اس بات سے ہے کہ کائنات کی علت کے بارے میں استدلال کن بنیادوں پر قائم ہے۔ اگر یہ استدلال واقعی محض لاعلمی پر مبنی ہوتا تو یہ اعتراض وزنی ہو سکتا تھا، مگر حقیقت اس کے برعکس ہے۔

کائنات کی علت کے بارے میں یہ نتیجہ اس بات سے نہیں نکلتا کہ ہم کسی چیز کو نہیں جانتے، بلکہ اس بات سے نکلتا ہے کہ ہم کچھ چیزوں کو یقینی طور پر جانتے ہیں۔ ہم جانتے ہیں کہ کائنات کی ابتدا ہوئی۔ ہم جانتے ہیں کہ جو چیز ابتدا رکھتی ہو، وہ اپنی علت خود نہیں ہو سکتی۔ ہم یہ بھی جانتے ہیں کہ وقت، مکان اور مادہ خود کائنات کے ساتھ وجود میں آئے، اس لیے ان میں سے کوئی چیز کائنات کی علت نہیں ہو سکتی۔ یہ سب مثبت علم (positive knowledge) ہے، محض خلا نہیں۔

یہاں خدا کو کسی نامعلوم جگہ پر لا کر نہیں بٹھایا جا رہا، بلکہ کائنات کی معلوم صفات کی بنیاد پر ایک ناگزیر نتیجہ اخذ کیا جا رہا ہے۔ یہ استدلال “ہم نہیں جانتے، اس لیے خدا” نہیں کہتا، بلکہ یہ کہتا ہے کہ “ہم جانتے ہیں، اس لیے یہ نتیجہ نکلتا ہے”۔

دلچسپ بات یہ ہے کہ اگر کوئی یہاں “گیپ” کی بات کرتا ہے تو دراصل گیپ دوسری طرف ہے۔ یہ کہنا کہ مستقبل میں سائنس کوئی نامعلوم قدرتی قانون دریافت کر لے گی جو کائنات کی ابتدا کی توجیہ کر دے گا، خود ایک ایسا دعویٰ ہے جو کسی شواہد پر نہیں بلکہ محض امید پر قائم ہے۔ اس رویے کو درست طور پر “Natural Law of the Gaps” کہا جا سکتا ہے۔یعنی ہر مشکل سوال کو کسی آئندہ دریافت شدہ قانون کے کھاتے میں ڈال دینا۔

یہاں ایک اصولی نکتہ سمجھنا ضروری ہے۔ سائنس فطرت کے اندر کام کرنے والے اسباب کو دریافت کرتی ہے۔ مگر جب خود فطرت کی ابتدا زیرِ بحث ہو تو سائنس اپنی حدود کو پہنچ جاتی ہے، کیونکہ فطرت اپنی علت خود نہیں ہو سکتی۔ فطرت سے ماورا علت کو تلاش کرنا سائنسی خلا نہیں، بلکہ منطقی ضرورت ہے۔

لہٰذا “God of the Gaps” کا اعتراض اس مقام پر بے محل ہو جاتا ہے، کیونکہ یہاں کسی نامعلوم شے کو خدا سے بدلنے کی کوشش نہیں بلکہ یہ معلوم حقائق کا معاملہ ہے۔ جو نتیجہ نکل رہا ہے، وہ لاعلمی سے نہیں بلکہ موجود Data کی روشنی میں نکل رہا ہے۔

اس طرح یہ اعتراض خود اپنی بنیاد کھو دیتا ہے، اور یہ بات واضح ہو جاتی ہے کہ کائنات کی علت کے طور پر خدا کو ماننا کسی خلا کو پُر کرنا نہیں، بلکہ عقل کے سامنے موجود شواہد کا منطقی اعتراف ہے۔

پڑھیں / تاریخ

خدا برائے خلا ( God of the Gaps) کے اعتراض کا ابطال

فہرست

خدا برائے خلا ( God of the Gaps) کے اعتراض کا ابطال

فہرست