دلیلِ وجوبِ امکان پر ایک اعتراض کا اعتراض

فیصل ریاض شاہد

کچھ ملحد معترضین نے دلیل امکان Contingency Argument for the existence of God پر یہ اعتراض کیا ہے کہ اس سے ثابت ہونے والا خدا واجب الوجودSelf-Existing / Necessary Being نہیں بلکہ عالمUniverse ہی کی طرح ممکن الوجود Dependent/Contingentہے، اس طرح کہ ممکن الوجود اسے کہتے ہیں جو قائم بالغیر (کسی دوسرے کا محتاج –Contingent) ہو۔ جب یہ کہا جاتا ہے کہ عالم خدا پر منحصرDependent ہونے کی وجہ سے ممکن الوجود ہے تو عین اسی طرح یہ بھی کہا جا سکتا ہے کہ "خدا کا تصور چونکہ عالم پر منحصر ہے اور اگر ہم کائنات کو معدوم Non-Existing (غیر موجود) فرض کر لیں تو خدا کا تصور بھی ختم ہو جاتا ہے، پس خدا بھی ممکن الوجود ہے جس کی معاذ اللہ کائنات کے بغیر کوئی وقعت نہیں۔"

میں پوری ایمانداری سے بات کروں تو اس اعتراض میں تھوڑی بہت جان صرف اور صرف اس صورت میں ہو سکتی ہے اگر دلیل امکان ویسی ہی ہو جیسے ملحدین کو سمجھ آتی ہے۔ ملحدین یہ سمجھتے ہیں کہ ہم کائنات/عالم کو معلول Effectاور خدا کو علت موجبہCause سمجھتے ہیں۔ پھر اسی غلط تصور کے تحت وہ یہ اعتراض قائم کرتے ہیں کہ اگر بالفرض معلول ہی کو دو منٹ کے لئے سائیڈ پر کر دیا جائے تو علت (خدا) کا تصور بھی مٹ جاتا ہے پس خدا بھی ممکن الوجود ہی ہے اور دلیل امکان ایک کمزور دلیل ہے۔

اوپر ملحدین کے اعتراض کی کما حقہ وضاحت کے بعد اب اس کا نہایت سادہ جواب پیش خدمت ہے۔

پہلی بات تو یہ ہے کہ ملحدین دلیل امکان کو جس حد تک سمجھتے ہیں، غلط سمجھتے ہیں۔ یہی وجہ ہے کہ وہ اپنے غلط مفروضے پر غلط اعتراض کی بنیاد رکھتے ہیں۔

دوسری بات یہ ہے کہ ملحدین عالم کو عدم موجود تصور کروا کر خدا کے تصور کو مٹانے کی کوشش کرتے ہیں۔ ان کی یہ کاروائی بھی قابل قبول نہیں۔ جب عالم موجود ہے اور بدیہی حقیقت Self-Evidentہے کہ تو پھر اسے غیر موجود مان کر منطق سازیReasoning کرنے کا جواز کیا ہے؟ ظاہری سی بات ہے کہ موجود کو موجود مان کر ہی عقلی استدلال Inference کرنا درست طرزِ فکر ہے۔

تیسرا یہ کہ اگر بالفرض ہم عالم کو معدوم فرض کر بھی لیں تب بھی یہ ثابت نہیں ہوتا کہ خدا موجود نہیں۔ کیونکہ عالم کو عدم موجود فرض کرنے کا مطلب یہ ہے کہ پھر ہم بھی موجود نہیں اور ہمارا ذہن Mindبھی موجود نہیں۔ جب نہ عالم موجود ہے ، نہ ہم، نہ فکر طرازی کرنے والا کوئی ذہن، نہ سوال پوچھنے والا اور نہ کوئی جواب دینے والا، تو پھر بحث کر کون رہا ہے، بحث ہو کس سے رہی ہے؟؟؟ جب کچھ بھی موجود ہی نہیں تو پھر خدا کے ہونے نہ ہونے کا سوال بھی غیر متعلقIrrelevant ہو جاتا ہے۔ یہ سوال متعلق تب ہی رہتا ہے جب عالم کو موجود مانا جائے۔

چوتھی اور نہایت اہم بات یہ ہے کہ اسلامی علمیات Muslim Epistemologyکے اندر سب سے پہلے آپ یہ دیکھئے کہ کائنات یعنی "عالم" سے مراد کیا لیا جاتا ہے؟ تو عرض ہے کہ اسلامی علم الکلامTheology میں عالم سے ہر شے مراد ہے خدا کے علاوہ، یعنی صرف خدا لفظ "عالم" کے اطلاق سے خارج ہے اور تمام تر مخلوقات ، چاہے وہ عالمِ مادی Material World(ہماری کائنات) میں ہوں یا عالم غیر مادی Non-Material World میں(جنت، جہنم، جنات، فرشتے، شیطان وغیرہ) ، ہر طرح کی مخلوقات پر لفظ "عالم" کا اطلاق ہوتا ہے۔ سادہ الفاظ میں یوں کہہ لیں کہ خدا کے علاوہ سب کچھ جو کچھ بھی جس بھی صورت میں موجود ہے سب کچھ "عالم" کے ماتحت آتا ہے۔ اس سے واضح ہوا کہ علم الکلام کا تصورِ عالم دیگر علوم کے تصورِ کائنات سے وسیع تر ہے۔

پھر یہ کہ ہمارے ہاں لفظ عالم کا مطلب کیا ہے؟ النبراس (علم الکلام کی عظیم کتاب) از علامہ عبدالعزیز پڑہاروی اور دیگر کلامی کتب میں مندرج ہے کہ لفظ عالم فاعَل (ع پر زبر) کے وزن پر ہے، جیسے فاعَل کا مطلب ہے "وہ شے جس کے ذریعے کوئی کام کیا جائے" ایسے ہی لفظ عالَم سے مراد ہے "وہ شے جس سے کسی دوسری شے کا علم و معرفت حاصل ہو"۔ تو یہ بات نہایت اہم ہے کہ ہمارے ہاں عالم سے مراد گویا "نشانی" ہے، اور پھر کتاب و سنت میں بھی پچاسوں مقامات پر کائنات اور اس کے مشمولات کو اللہ رب العزت کی نشانیاں قرار دیا گیا ہے۔ مختصر یہ کہ ہمارے ہاں کائنات کہہ لیں یا عالم کہہ لیں، فی نفسہ صانعِ عالم Creator کی نشانی اور اس کی معرفت کا ذریعہ A Way to Knowہے ناکہ فلسفیانہ معنوں میں کوئی معلولEffect (جیسا کہ معترضین غلط طور پر اسے معلول سمجھ لیتے ہیں)۔

اب اصل بات یہ ہے کہ عالم کو معدومNon-Existing فرض کرنے سے خدا کے وجود ، ذات، ہستی Being پر کوئی حرف نہیں آتا بلکہ زیادہ سے زیادہ بھی یہ کہا جا سکتا ہے کہ خدا تک پہنچنے کا ایک طریقہ اور اس کی علم و معرفت کا ایک ذریعہ معدوم ہو گیا۔ گویا عدمِ عالم سے عدم ِ صانع ثابت نہیں ہوتا بلکہ صانع سے متعلق علم کے حصول کا صرف ایک ذریعہ ختم ہو تا ہے۔ اب بات کو سمجھئے۔ اگر یہ مان بھی لیا جائے کہ کائنات موجود نہیں، تو اس سے زیادہ سے زیادہ یہ ثابت ہوتا ہے کہ اب خدا سے متعلق علم کا راستہ مسدود ہو گیا، خدا کا وجود تو بدستور من و عن قائم و دائم رہا۔ وجودِ خدا اور شے ہے، اور اس وجود کی معرفت کا ذریعہ شے دیگر است۔

الحاصل یہ کہ مذکورہ بالا گزارشات کو بحثیت مجموعی ذہن میں رکھئے اور دوبارہ سے اعتراض کا جائزہ لیجئے تو اس اعتراض کی خامی سورج كي طرح روشن ہو جاتی ہے۔

پڑھیں / تاریخ (دوسرا)

دلیلِ وجوبِ امکان پر ایک اعتراض کا اعتراض

فہرست

تعارف

فہرست