فزکس، خدا اور سائنٹزم

ادریس آزاد

فزکس کے ایسے پروفیسر حضرات جو وجودِ خدا کے مُنکر ہیں، تعداد میں اگرچہ بہت کم ہیں لیکن بدقسمتی سے اُن کے اینٹاگنسٹ(antagonist) رویے کی بدولت اُن کے چہرے میڈیا پر جلد مشہور ہوجاتے ہیں۔ یوں بھی ان کے موضوعات چونکہ زیادہ تر پاپولر فزکس کے موضوعات ہوتے ہیں اس لیے عامۃ الناس کو ہرطرف وہی دکھائی دیتے ہیں تو وہ یہ سمجھنے لگ جاتے ہیں کہ فزکس کے لوگ مجموعی طورپر خدا کے منکر ہیں۔ حالانکہ اس بات کا حقیقت سے دور دور تک کوئی تعلق نہیں ہے۔

پھر یہ لوگ عموماً خالص فزکس کے مباحث میں کم ہی شریک ہوتے ہیں۔ جن مباحثوں میں اورمناظروں میں لوگ ان کو کثرت سے دیکھتے ہیں، وہ فزکس سے نہیں بلکہ مذہب سے متعلق موضوعات ہوتے ہیں۔ چنانچہ جب ایسے مباحث میں یہ گفتگو کرتے ہیں تو فزکس کے حوالے سے ان کا رویہ اتھاریٹیٹِو(authoritative) اور رعونت سے بھرا ہوا ہوتاہے۔ ایسے رویے کا مظاہرہ کرتے ہیں جیسے محفل میں باقی سب جہلا بیٹھے ہیں اوردنیا کی حقیقت صرف ان کو معلوم ہے ۔ کسی اور کو معلوم ہوہی نہیں سکتی۔ حالانکہ اگر آپ مابعدالطبیعیات کے موضوع پر بات کرنے کے لیے آئے ہیں تو لازم ہے کہ آپ کے پاس فزکس کے علاوہ دو مزید ڈسپلنز کا بھی علم ہو۔

۱۔ فلسفۂ سائنس (Philosophy of physics)

۲۔ تاریخِ سائنس(History of Science)

فلسفۂ سائنس اس لیے تاکہ آپ کو خود بھی تو معلوم ہوکہ تجرباتی سائنس (experimental science)کی حُدود کہاں پر ختم ہوتی ہیں اور نظری سائنس (theoretical science)کی حُدود کہاں سے شروع ہوتی ہیں۔یہ معلوم نہیں ہوگا تو آپ ہوا میں کراس فائر کرتے رہیں گے اوربحث کا کوئی نتیجہ برآمد نہیں ہوگا۔مزید یہ کہ آپ کو خود بھی تو پتہ ہو کہ سائنسی نظریات کو پیش کرنے کے بعد انہیں ثابت کرنے پر زورصرف نہیں کرنا ہوتا بلکہ انہیں غلط ثابت کرنے پر زورصرف کرنا ہوتاہے، تب ہی سائنس، سائنس کہلاتی ہے۔ اس اصول کو پرنسپل آف فالسفکیشن(falsification) کہاجاتاہے۔اوریہ پوری دنیا کے اکیڈمیا اورمین سٹریم نالج کی طرف سے قبول کیاگیااُصول ہے۔ اِسی اصول کی بناپر آئن سٹائن کی جنرل ریلیٹوٹی درست نظریہ ثابت ہوئی تھی اور اسی اصول کی بناپر سگھمنڈ فرائیڈ کا نظریہ ٔ تحلیلِ نفسی سُوڈوسائنس کے کھاتے میں ڈال دیاگیاتھا۔

جبکہ تاریخِ سائنس کا علم آپ کے پاس اس لیے ہونا لازم ہے، تاکہ آپ کو خود بھی تو معلوم ہو کہ کب کسی سائنسدان نےخالص تجربات کے ذریعے کچھ دریافت کیا اور کب کسی سائنس دان نے محض ریاضیاتی طورپر کچھ نتائج اخذ کیے جنہیں فی الاصل بعد میں تجربات سے گزاراگیا۔

اصطلاح میں ایسے لوگوں کو سائنٹزم (scientism) کے پیروکاریعنی سائنٹِسٹکس(scientistics) کہاجاتاہے۔ سائنٹزم ایک کَلٹ(cult)، ایک عقیدہ اور ایک ضِد(stubbornness) ہے جس کے ماننے والے نہایت بدتمیز، بداخلاق، غیرمنصف،غیرمنطقی،اوربدمعاش ہوتے ہیں۔ گزشتہ صدی کے وسط تک یہ لوگ ابھی پنپ رہے تھے اور اس لیے یوں کھُل کر بدمعاشی نہیں کیا کرتے تھے جیسے اب کرتے ہیں۔امریکہ اور یورپ میں یہ لوگ سردجنگ کے زمانے میں نمودار ہونا شروع ہوئے۔ لیکن امریکہ اور یورپ کے عامۃ الناس کے لیے ان کا اخلاقی طرزِ عمل اتنا مخدوش اورفرعونیت سے بھرا نہیں ہے جتنا مابعد نوآبادیاتی (post-colonial) قوام کے ساتھ ہے۔

دراصل کالونیوں کے عملی خاتمے اوردوسری جنگِ عظیم کے بعد اپنے اپنے مرکزوں سے ٹوٹے ہوئے کچھ لوگ ردعمل کی نفسیات کا شکار ہوئے تو سردجنگ کے ماحول میں ان کا استعمال منفی قوتوں کے لیے آسان ہوگیا۔ پوسٹ کالونیل سامراجیت کے تحفظ کے لیے ملٹی نیشنل کمپنیوں نے اِن لوگوں کو سماجی کاموں کے نام پر کچھ فنڈز فراہم کرنا شروع کیے، تاکہ کالونیوں کو اُن کے اپنے پیسے خودبراہِ راست استعمال کرنے کا موقع نہ مل سکے۔

استعمارنے تمام سابقہ کالونیوں(خصوصاً افریقہ اور پاک و ہند) میں نان گورنمنٹ آرگنائزیشنین (NGOs) قائم کیں جوملٹی نیشنل کمپنیوں کے سی ایس آر(Corporate Social Responsibility) پر چلتی تھیں اورچلتی ہیں۔ سی ایس آر کے نام پر ملٹی نیشنل کمپنیوں نے ان آبادیوں کو کہ جن کے وسائل اور ذرائع سے وہ اپنے بزنس چلاتے ہیں، براہِ راست سماجی کاموں کے لیے پیسے دینا بند کردیے اور اس کی جگہ یہ نظریہ اختیار کیا کہ چونکہ جن علاقوں کے ذخائر ہم استعمال کرتے ہیں، ان کا ہم پر حق تو ہے، لیکن اگرپیسہ ہم انہیں براہِ راست دیں گے تو ان کے سردار وہ پیسہ کھاجائیں گے۔ چنانچہ ایسی فاؤنڈیشنیں قائم کی جائیں جو اُن مخصوص علاقوں میں فلاح و بہبود کے کام انجام دیں۔ یہ خیال بظاہر جتنا خوبصورت تھا، بباطن اتنا ہی منفی، بُرا اور بھیانک تھا۔ چند ہی دہائیوں میں تمام سابقہ کالونیوں میں ایسی این جی اوز پھیل گئیں۔ یہ لوگ کسی بھی وطن کے محب وطن نہیں ہوتے۔ نہ ہی کسی آئیڈیالوجی یا مرکزیت سے ان کو کوئی لگاؤ ہوتاہے۔ بلکہ آئیڈیالوجی کوئی بھی ہو، ان کے لیے نہایت ناپسندیدہ چیز ہے۔ یہ چیز یوں تو بالخصوص مابعد جدیدیت(post-modernism) کی پسندیدہ ترین چیز ہے اوراس نعرے میں لامرکزیت کے قیام سے جس قسم کی انسانیت کو سامنے لانا مقصود دکھائی دیتاہے، وہ بادی النظری میں فلاحِ انسانیت ہی محسوس ہوتی ہے۔لیکن اپنے ماحول، وطن، اقدار ، سماج، ثقافت اورروحانی مراکز سے جس لاتعلقی کا اس نظریے کے ماننے والوں میں اظہارپایاجاتاہے، وہ نہایت خشک، روبوٹک،ظالمانہ، بے روح، بے رحم اورسفاکانہ ہے۔

وطنِ عزیزپاکستان میں این جی اوز کی بھی کمی نہیں اوراس قسم کی بابعد نوآبادیت جدیدیت(post-colonial modernism) کے چاہنے والے بھی کچھ کم نہیں ہیں۔ لیکن خوش قسمتی سے جمہورکے اجتماعی اذہان کو یہ لوگ ابھی تک اتنا متاثر نہیں کرسکے جتنا انہوں نے سوچاتھا کہ یہ کرلینگے۔ہمارے ہاں فزکس ، اینتھروپولوجی، سوشیالوجی اور انگریزی ادب کے شعبہ جات میں ان نظریات کے حامل پروفیسرحضرات کوئی لگ بھگ تین چار فیصد کی حدتک پیداہوچکے ہیں۔ نتیجتاً ایسے طلبہ بھی جو آئندہ پھر استاد بن جاتے ہیں پیدا ہورہے ہیں۔ یونیورسٹیوں کے علاوہ یہ لوگ عدالتوں میں ججوں اور وکیلوں کی صورت بھی پائے جاتے ہیں۔ لیکن ان دوچار جگہوں کے علاوہ یہ لوگ باقی شعبوں میں اتنے زیادہ موجود نہیں ہیں۔ البتہ عامۃ الناس میں جہاں خال خال یہ لوگ آپ کو مل جائیں گے، وہ قوم پرستوں کے گروہ ہیں۔ مثلاً پنجابی، سرائیکی، سندھی ، کشمیری، بلتی یا پشتون قوم پرستوں کے گروہوں میں یہ لوگ نستباً زیادہ موجود ہیں۔

میرا تعلق چونکہ درس و تدریس میں فلسفہ اور فلسفۂ سائنس ، خصوصاً فلسفۂ فزکس کے ساتھ ہے اس لیے میری مُڈبھڑ اکثر ایسے صاحبان کے ساتھ رہتی ہے۔ ایسی ہی ایک مڈبھڑ کے بعد مجھے خیال آیا کہ ان احباب کو وجود خدا جیسے غیرسائنسی موضو ع پر بات کرنے کے لیے صرف فزکس کے مطالعہ پرہی بھروسہ نہ کرنا چاہیے، بلکہ ضروری ہے کہ یہ لوگ فلسفۂ سائنس اورتاریخِ سائنس کا بھی علم رکھتے ہوں۔ وگرنہ یہ ہوتا رہے گا کہ فزکس اور تصوف جیسے علمی موضوعات پر بھی مذہبی مناظروں کی طرح بیکار کی چخ چخ جاری رہے گی اور کبھی کوئی علمی نتیجہ برآمد نہ ہوسکے گا۔

پڑھیں / خدا

فزکس، خدا اور سائنٹزم

فہرست

تعارف

فہرست