ڈیجیٹل عہد اور انسانی حسیات کا بحران

ادریس آزاد

اِنٹرنیٹ سے پہلےکی دنیا میں انسانی نفسیات کی تشکیل میں پانچوں حواس یعنی حسِّ لامسہ، شامہ، ذائقہ، سامعہ اورباصرہ ، برابر شریک ہوا کرتےتھے۔ پانچوں حواس کی برابر شراکت سے نفسِ انسانی میں جس قسم کی حسّیات(Sensations) جنم لیتی تھیں اُن سے فردکی نفسیاتی زندگی تشکیل پاتی تھی۔ لیکن انٹرنیٹ کےبعد حواسِ خمسہ کا، علم بالحواس کی تدوین میں برابر کا حصہ باقی نہ رہا۔ دوحسّیں ، یعنی سامعہ اورباصرہ کا حصہ بڑھتا چلا گیا اور تین حسّیں یعنی لامسہ، شامہ اورذائقہ کا حصہ کم ہوتاچلاگیا۔ انسانی ارتقأ کے حوالے سے اس تبدیلی کو ایک نہایت اہم مشاہدہ(observation) شمارکیاجاناچاہیے اورمتعلقہ ماہرین کو اس پر پیپرز لکھنے چاہییں ، اور شاید لکھے بھی جارہے ہوں۔

یہ تین حواس، یعنی حسِّ لامسہ، شامہ اورذائقہ فرد کی نفسیات میں جوکردار چند عشرے قبل تک اداکیا کرتی تھیں ، ان کا وہ کردارتیزی کےساتھ معدوم ہوتاجارہاہے۔ صرف حسِّ لامسہ کا ہی نفسِ انسانی میں اتنا زیادہ عمل دخل تھا کہ گویا باقی چاروں حصوں پر یہ حِس ، اپنے اثرات کے حوالے سے غالب ہواکرتی تھی۔ لوگوں کا جسمانی میل ملاپ، میلے ٹھیلے، مشترکہ سماجی سرگرمیاں تو تھیں ہی، لیکن فرد سے فرد کا جو تعلق تھا، اسی تعلق کی بنا پر زبان، احساسات، ثقافت اورطرزِ زندگی کا تعین ہوتاتھا۔ دوست دوستوں کےساتھ جسمانی اعتبار سے قریب ہوا کرتے تھے۔ بات بات پہ ہاتھ پر ہاتھ مارنا، ہاتھ پکڑکردبائےرکھنا، مونڈھے مارنا، مُکے مارنا، یہ سب فردفرد کی سطح پر ایک عام سی بات تھی۔ لڑکے ایک دوسرے کوہاتھ، پیر،لات، مکہ، ٹکر، کچھ نہ کچھ مارتے ہی رہتے تھے۔ لڑکیاں ایک دوسرے کو چٹکیاں کاٹتی تھی، چپتیں لگاتی تھیں۔ شیرخوارکے لیے ممتا کی آغوش زیادہ وقت کے لیے دستیاب رہتی تھی اور اس لیے ممتا کا لمس، بچے کا پہلا مشاہدہ ہی دوتین سال تک طویل ہوتاتھا۔ ساتھ بڑے ہوتے ہوئے دو بھائی گھر میں آرام سے تو بیٹھ ہی نہ سکتےتھے۔ جس وقت دیکھو، وہ کشیاں لڑرہے ہوتے تھے۔ بھائیوں والے گھروں میں یہ مناظر عام ہوا کرتے تھے کہ ایک بھائی نیچے چاروں خانے چت ہے اور دوسرا اس کے سینے پر سوارہے۔

پھر ذائقے اورخوشبوئیں بھی صرف کھانوں اور پھولوں کی تو نہیں تھیں۔ذائقے اور خوشبوئیں بھی تو جانداروں کی ہی ہوتی تھیں۔ اپنے پالتو جانوروں کی، اپنے محلے اورماحول کی، اپنے دوستوں اور دشمنوں کی۔

نفسیات ِ فرد کی تشکیل میں ان سب کے بعد جاکر کہیں سماعت اور بصارت کا نمبر آتاتھا۔ زیادہ پرانے وقتوں میں جب برقی آلات ابھی نہیں آئےتھے، تب تو گانے بجانے کا اہتمام کہیں سالوں میں ہوا کرتاتھا، ورنہ تو موسیقی بس اتنی سی ہوتی تھی جتنا کوئی مذہبی قصہ خواں گادیا کرتاتھایا کسی کسی شہری کو لوک فنکاروں کے جستہ جستہ ٹکڑے یاد ہوا کرتے ۔ سازوں میں ڈھول ، دف ، گڑوی، گھڑا مضارب تھے جبکہ بانسری اورہارمونیم وغیرہ پھونک سے بجنے والے آلات تھے۔ کبھی کسی شہر میں کوئی نوٹکی گزرتی تھی تو وہاں چند دن میلے کا سا سماں بندھ جاتا تھا۔ نوٹکی میں اداکار بھی ہوتے تھے اور گانا بجانے والے بھی۔ بیساکھی کا میلہ ختم تو میوزک بھی سال بھر کے لیے ختم۔ اس کے بعدتو سماعت کو صرف پانی گرنے کی آوازیں، پرندوں کی بولیاں، مرغے کی بانگ، رَہٹ کاآرکسٹرا، ٹانگے کی ٹاپوٹپ ٹاپوٹپ ، یامشینوں میں دھاتوں کی ٹن ٹناٹن کی موسیقی سے ہی شغف رہ جاتا۔ یہی کیفیت باصرہ کی تھی۔ آنکھوں نے نوٹکی والے کی سٹیج پرگرتے اُٹھتے پردے کے سوا، کبھی کسی اور قسم کا کوئی پردہ نہیں دیکھاتھا۔ سب کو معلوم تھا کہ پردہ تماشے کے لیے ہوتاہے، گویا اِس برقی پردۂ سکرین سے انسانی آنکھ واقف ہی نہیں تھی، جس سے نظر اب کبھی ہٹ ہی نہیں پاتی۔

تو یہ کوئی معمولی تبدیلی نہیں ہے جو گزشتہ تیس سالوں میں انسانی نفسیات میں وارد ہوئی ہے۔ یہ ارتقائے حیات کی سطح کی بات ہے۔ لمس کا دخل کم ہوجانا اورسمع و بصر کا دخل بڑھ جانا کوئی چھوٹا موٹا ارتقا برپا نہیں کرےگا۔ یہ ارتقأ اب تک کے تمام ارتقائی مراحل سے بڑا جمپ ہوگا۔ شاید جسم کی شکل بھی بدل جائے۔ کیونکہ نسبت کا فرق بھی بہت زیادہ ہے، یعنی اگر حسِ لامسہ ، ذائقہ اور شامہ کو اس وقت حسیات کی تشکیل میں سترفیصددخل تھا اورسمع وبصر کو تیس فیصد تو اب یہ تناسب الٹ چکاہے۔

یہ بہت لمبا اوربہت گہرا تھیسز ہے جسے ایک چھوٹی سی معلوماتی تحریر میں نہیں سمویاجاسکتا۔ تاہم ایک بات جو تغیرکی اس پیش آمدہ صورتحال سے سمجھ میں آسکتی ہے وہ یہ ہے کہ اب سائنس کی طرح آرٹس کو بھی بڑے بڑے کارنامے دکھانے ہوں گے۔ جتنی اچھی سائنس اب تک آتی رہی ہے اگر اتنی اچھی آرٹس اور خصوصاً آرٹ نہ آسکی تو شاید انسان مشینوں سے جیت نہیں پائےگا۔ آنے والے ادوار میں کس طرح کی مخلوق زمین پر راج کرےگی اس کا اندازہ لگانے کے لیےزیادہ دیر آنکھیں بند نہیں رکھنا پڑتیں۔ اس مخلوق کو آسانی کے ساتھ انسان کہاجاسکے گا یا نہیں، ماضی کے اِس لمحے میں بیٹھ کر یہ بتانا آسان ہے، تب بہت مشکل ہوگا۔

اب انسانی معاشرے کے ہرفرد کو بقائےانسانی کی جنگ لڑنا ہوگی، اوربقاکی یہ جنگ آرٹس سے ہی لڑی گئی تو بچت کے راستے نکلیں گے، سائنس سے نہیں۔آرٹس میں بھی آرٹ۔یہ جنگ جزو کی کُل کے ساتھ جنگ ہے تو سوائے ےآرٹ کے جیتنا ممکن نہیں۔ یہ جنگ مقام کی بے مقامیت سے ہوگی،’’ لوکیلٹی‘‘ کی ‘‘ وَن بگ ہول‘‘ سے۔اِمپرفیکشن کی پرفیکشن سے۔ دوبارہ ہاتھ سے آرٹ بناکر، ایک ناقص، نامکمل، ادھوری آرٹ۔ ایک ایسی آرٹ جسے دیکھتے ہی پتہ چلے گا کہ یہ انسان نے بنائی ہے۔ یہ اِمپرفیکشن ہی انسان کی جیت بن جائےگی۔وہ کُل کی کُلیت سے جلدگھبراکرچیخے گا۔ بالکل ویسے جیسے ’’موزارٹ(Mozart)‘‘ کی کُلیت میں ’’بیتھووین(Beethoven)‘‘ کی چیخ اُبھری تھی، بالکل ویسے جیسے’’ دُھرپد ‘‘کی کاملیت میں’’ خیال‘‘ کا باغیانہ نعرہ اُبھراتھا۔بالکل ویسے، جیسے افلاطونی سماوات میں وین گاؤ(van Gogh) کی ’’سٹاری نائٹ‘‘ کی بہتی ، تڑپتی،مچلتی اور کناروں سے اچھلتی ہوئی کائنات کارُوح پرور نظارہ ظاہرہواتھا۔یہ اسرافیل کی بانگ ہوتی ہے۔ یہ ہرکُل کے پُرسکوت، ٹھنڈے اورمہیب و محیط گنبد کوپھاڑدینے والی چیخ ہوتی ہے۔یہ اب کی بار بھی شاید اُبھرےگی۔

ادریس آزاد

پڑھیں / نفسیات

ڈیجیٹل عہد اور انسانی حسیات کا بحران

فہرست

تعارف

فہرست