حافظ محمد شارق

ہم سب وقت کو محسوس کرتے ہیں۔ ہم کہتے ہیں “وقت گزر گیا”، “یہ لمحہ قیمتی ہے”، “گزرا وقت واپس نہیں آتا”، مگر کیا ہم جانتے ہیں کہ وقت ہے کیا؟ کیا وقت واقعی بہتا ہوا دریا ہے یا صرف ہماری شعوری آنکھوں کا ایک دھوکہ؟

ایک وہ وقت ہے جو ہمیں تجربے میں محسوس ہوتا ہے۔ یہی وہ تصور ہے جسے کلاسیکل فزکس میں Linear Time کہا گیا یعنی وقت ایک سیدھی لکیر ہے جو ماضی سے حال اور حال سے مستقبل کی طرف بہتی ہے۔ ہمارے لیے وقت کی یہی صورت تجربے میں آتی ہے۔ لیکن جب ہم قرآن مجید میں قیامت، محشر یا ملکہ سبا جیسے ماورائی واقعات کو دیکھتے ہیں تو اندازہ ہوتا ہے کہ وقت کا ادراک خود انسانی شعور کا ایک نفسی تجربہ ہے۔ گویا وقت بذاتِ خود مطلق نہیں بلکہ نسبتی (Relative) حقیقت ہے۔ یہ وہی بات ہے جسے آج کی سائنسی زبان میں “Relativity of Time” کہا جاتا ہے۔

اگر گہرائی سے سوچا جائے تو حقیقت میں ماضی، حال اور مستقبل الگ الگ چیزیں نہیں بلکہ ایک ہی حقیقت کے مختلف مظاہر ہیں۔ اس کے بعد وہ درجہ آتا ہے جہاں وقت اپنی محدودیت سے نکل کر اللہ کے علم کی وحدت میں شامل ہو جاتا ہے؛ ایک ایسی حقیقت جو وقت کی قید سے آزاد ہے۔

ان تین جہتوں کو آسانی سے سمجھنے کے لیے ابن عربیؒ کے بیان کردہ مراتبِ وقت کو یوں دیکھا جا سکتا ہے:

۱۔ جب ہم محسوس کرتے ہیں کہ لمحے ایک دوسرے کے پیچھے بہہ رہے ہیں ۔ یہ “زمان” ہے۔

۲۔ جب ہمیں احساس ہوتا ہے کہ وقت ہر ایک کے لیے یکساں نہیں ۔ کسی کے لیے تیزی سے گزرتا ہے، کسی کے لیے آہستہ ۔ یہ “دَہر” ہے۔

۳۔ اور وہ مشاہدہ جس میں وقت اپنی کلیت میں موجود ہوتا ہے یہ “سَرمَد” ہے۔

یہ تین درجے زمان، دَہر، اور سرمد شیخ اکبر محیی الدین ابن عربیؒ نے فتوحاتِ مکیہ میں بیان کیے۔ حیرت کی بات یہ ہے کہ جدید سائنس، خصوصاً کوانٹم فزکس، انہی پرتوں کو سائنسی زبان میں دریافت کر رہی ہے۔ گوکہ یہ کوشش ابھی ابتدائی مرحلے میں ہے، لیکن محسوس ہوتا ہے کہ سائنس ایک ہی حقیقت کے اُن پہلوؤں کو دیکھنے کی کوشش کر رہی ہے جہاں ابن عربیؒ عرصہ پہلے پہنچ چکے تھے۔

ابن عربیؒ کے نزدیک “زمان” وہ وقت ہے جو ہم محسوس کرتے ہیں، جو حرکت اور تبدیلی سے وجود پاتا ہے۔ صبح سے شام، جوانی سے بڑھاپے، موسم سے موسم ہر تغیر “زمان” کے اندر وقوع پذیر ہوتا ہے۔ یہ مخلوقی وقت ہے، اور اسی لیے فنا پذیر ہے۔ یہی تصور سائنس میں “کلاسیکل ٹائم” کہلاتا ہے، یعنی وہ سیدھی لکیر جس پر ماضی، حال اور مستقبل ترتیب سے گزرتے ہیں۔ ہم گھڑی کی سوئیاں دیکھ کر وقت کو ماپتے ہیں، مگر دراصل ہم تبدیلی کو ماپ رہے ہوتے ہیں، خود وقت کو نہیں۔اس کے برعکس “دَہر” ایک برتر درجہ ہے جس کی تفصیل میں ابن عربیؒ فرماتے ہیں کہ یہ وقت کا وہ درجہ ہے جس کہ اللہ کے علم میں تمام زمانے ایک ہی لمحے میں موجود ہیں۔ یہ لمحہ بھی درحقیقت ہماری سمجھ کے لیے ہے وگرنہ خدا کی ذات اس لمحے سے بھی بلند تر ہے۔ ماضی، حال اور مستقبل ہمارے لیے چاہے الگ الگ ہی ہیں، لیکن حقیقت میں وہ سب ایک ہی وحدت میں گھلے ہوئے ہیں۔ یہی بات جدید فزکس میں آئن اسٹائن کے نظریۂ اضافیت میں نظر آتی ہے۔ اضافیت کے مطابق وقت بہتا نہیں بلکہ “مکان” کے ساتھ جڑا ہوا ایک بُعد (Dimension) ہے۔ ماضی، حال اور مستقبل سب ایک “جامد بلاک” کی طرح موجود ہیں، اور ہمارا شعور ان کے درمیان حرکت کرتا ہے۔ صوفیانہ زبان میں کہا جائے تو “دَہر” وہ مقام ہے جہاں تمام زمانے بیک وقت حاضر ہیں، مگر انسانی ادراک انہیں جدا جدا دیکھتا ہے۔ تیسرا درجہ “سَرمَد” ہے، جو ابن عربیؒ کے نظریۂ وقت کا سب سے بلند اور باریک پہلو ہے۔ سرمد وہ مقام ہے جہاں وقت کا کوئی وجود باقی نہیں رہتا۔ فزکس کی زبان میں یہ وہ مرحلہ ہے جو Time-Space Fabric سے بھی ماورا ہے یعنی وہ سطح جہاں مشاہدہ ممکن ہے مگر وقت خود معنی کھو دیتا ہے۔ یہاں “پہلے” اور “بعد” کا کوئی مفہوم نہیں، کیونکہ یہ اللہ کی ذات سے متعلق ہے۔ اللہ نہ زمان میں ہے نہ دَہر میں، بلکہ ان سب سے ماورا ہے۔ وہ ازل سے ہے اور ابد تک رہے گا، مگر “ازل” اور “ابد” بھی اس کے سامنے صرف ایک “ابدی لمحہ” ہیں۔ سرمد میں کوئی تغیر نہیں، کوئی حرکت نہیں صرف ثبات اور ہمیشگی ہے۔ دلچسپ امر یہ ہے کہ کوانٹم فزکس کے جدید ترین نظریات بھی اسی طرف اشارہ کرتے ہیں۔ بعض ماڈلز، جیسے Wheeler–DeWitt Equation، بتاتے ہیں کہ بنیادی سطح پر کائنات میں وقت سرے سے موجود نہیں۔ وقت تو تب پیدا ہوتا ہے جب ذرات باہمی تعلق میں آتے ہیں، یا شعور کسی کیفیت کو “پہلے” اور “بعد” کے احساس میں دیکھتا ہے۔ دوسرے لفظوں میں، وقت خود کائنات کی ایک “ابھرتی ہوئی خاصیت” (Emergent Property) ہے، نہ کہ بنیادی حقیقت۔ یہی وہ تصور ہے جو “سَرمَد” کے قریب ترین معلوم ہوتا ہے ایک ایسی حقیقت جو وقت سے آزاد ہے۔

پڑھیں / علم الکلام

وقت کے تین درجات: ابن عربیؒ اور کوانٹم فزکس

فہرست

وقت کے تین درجات: ابن عربیؒ اور کوانٹم فزکس

فہرست